Heavy Rains: తెలంగాణలో జోరందుకున్న వర్షాలు.. పొంగిపొర్లుతున్న వాగులు.. తాలిపేరు నుంచి వరద నీటి విడుదల
ఈ వార్తాకథనం ఏంటి
వర్షాకాలం ప్రారంభమైన తర్వాత తొలిసారిగా తెలంగాణలోని పలు జిల్లాల్లో విస్తృతంగా భారీ వర్షాలు కురిశాయి. గత కొంతకాలంగా నెలకొన్న వర్షాభావ పరిస్థితులకు ఉపశమనం కలిగిస్తూ సోమవారం మధ్యాహ్నం మొదలైన వర్షాలు రాత్రికి మరింత ఉధృతమయ్యాయి. ఉత్తర తెలంగాణలోని అనేక ప్రాంతాల్లో మంగళవారం ఉదయం వరకు మోస్తరు వర్షాలు కొనసాగాయి. దీంతో పలు వాగులు, వంకల్లో ప్రవాహం ప్రారంభమవగా, భద్రాద్రి కొత్తగూడెం జిల్లాలోని తాలిపేరు ప్రాజెక్టు పూర్తిగా నిండిపోయింది. ములుగు జిల్లాలో కూడా పలుచోట్ల వాగుల్లో నీటి ప్రవాహం పెరిగింది. కరీంనగర్ జిల్లాలో సోమవారం నుంచి మంగళవారం వరకు ముసురు వాతావరణం నెలకొనగా, హైదరాబాద్, రంగారెడ్డి జిల్లాల్లో మంగళవారం రోజంతా జల్లులు కురిశాయి.
వివరాలు
ఉమ్మడి ఆదిలాబాద్ జిల్లాలో భారీ వర్షాలు
ఉమ్మడి ఆదిలాబాద్ జిల్లాలో పలుచోట్ల భారీ వర్షాలు నమోదయ్యాయి.
మంచిర్యాల జిల్లా కన్నెపల్లి మండలం జంకాపూర్లో అత్యధికంగా 12.2సెంటీమీటర్ల వర్షపాతం నమోదైంది.
కోటపల్లిలో 12.1సెంటీమీటర్లు,తాండూర్లో 11.9సెంటీమీటర్లు, బెల్లంపల్లిలో 11.1 సెంటీమీటర్ల వర్షం కురిసింది. వేంపల్లి, నెన్నెల, భీమిని తదితర మండలాల్లో కూడా మంచి వర్షపాతం నమోదైంది.
మంగళవారం లక్షెట్టిపేట తహసీల్దార్ కార్యాలయం సమీపంలో వెళ్తున్న కారుపై వేపచెట్టు కూలడంతో వాహనం పూర్తిగా దెబ్బతింది.
అయితే కారును నడుపుతున్న ప్రైవేట్ పాఠశాల కరస్పాండెంట్ శ్రీనివాస్ స్వల్ప వ్యవధిలోనే ప్రమాదం నుంచి బయటపడ్డారు.
చెన్నూరు మండలంలో కురిసిన వర్షాలతో అక్కెపల్లి, కత్తెరశాల, సుద్దాల వాగుల్లో నీటి ప్రవాహం పెరిగింది.
అక్కెపల్లి వాగులో వరద ఉద్ధృతి ఎక్కువగా ఉండటంతో దాదాపు రెండు గంటల పాటు రాకపోకలు నిలిచిపోయాయి.
వివరాలు
పలు జిల్లాల్లో గణనీయమైన వర్షపాతం
పెద్దపల్లి జిల్లా కమాన్పూర్లో 10.7 సెంటీమీటర్లు, ములుగు జిల్లా వెంకటాపూర్లో 10.3 సెంటీమీటర్లు, కుమురంభీం ఆసిఫాబాద్ జిల్లా రెబ్బెనలో 9.2 సెంటీమీటర్లు, జయశంకర్ భూపాలపల్లి జిల్లా మహదేవ్పూర్ మండలం పెద్దంపేట్లో 9.2 సెంటీమీటర్లు, ములుగు జిల్లా వాజేడులో 8.9 సెంటీమీటర్లు, భద్రాద్రి కొత్తగూడెం జిల్లా పాల్వంచ మండలం యానంబైలులో 8.6 సెంటీమీటర్ల వర్షపాతం నమోదైంది.
జగిత్యాల, యాదాద్రి భువనగిరి, మేడ్చల్ మల్కాజిగిరి జిల్లాల్లో కూడా వర్షాలు కురిశాయి.
మంగళవారం మధ్యాహ్నం రంగారెడ్డి జిల్లా నందిగామలో 5.6 సెంటీమీటర్లు, భద్రాద్రి కొత్తగూడెం జిల్లా దమ్మపేట మండలం నాగుపల్లిలో 3.2 సెంటీమీటర్ల వర్షం నమోదైంది.
వివరాలు
తాలిపేరు నుంచి 10,738 క్యూసెక్కుల నీటి విడుదల
భద్రాద్రి కొత్తగూడెం జిల్లా చర్ల మండలంలోని తాలిపేరు మధ్యతరహా జలాశయం 0.73 టీఎంసీల నిల్వ సామర్థ్యాన్ని కలిగి ఉంది.
ఇటీవల కురిసిన భారీ వర్షాల ప్రభావంతో జలాశయం పూర్తిగా నిండిపోయింది.
మంగళవారం ఉదయం 481 క్యూసెక్కులుగా ఉన్న ఇన్ఫ్లో సాయంత్రానికి ఒక్కసారిగా 9,679 క్యూసెక్కులకు చేరింది.
దీంతో అధికారులు ప్రాజెక్టులోని మొత్తం 25 గేట్లలో 15 గేట్లను ఒక అడుగు మేర ఎత్తి 10,738 క్యూసెక్కుల వరద నీటిని దిగువ గోదావరి నదిలోకి విడుదల చేశారు.
పరిస్థితిని పరిశీలించేందుకు డీఈ తిరుపతి, ఏఈఈ సంపత్ ప్రాజెక్టు వద్దకు చేరుకుని పరిస్థితిని సమీక్షించారు.
వివరాలు
పలు జిల్లాలకు పసుపు రంగు హెచ్చరికలు
బుధవారం కూడా రాష్ట్రంలోని పలు జిల్లాల్లో వర్షాలు కొనసాగనున్నాయని భారత వాతావరణ శాఖ తెలిపింది.
ఈ నేపథ్యంలో పలు జిల్లాలకు పసుపు రంగు హెచ్చరికలు జారీ చేసింది.
ఆదిలాబాద్, కుమురంభీం ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం జిల్లాల్లో అక్కడక్కడ మోస్తరు నుంచి భారీ వర్షాలు కురిసే అవకాశం ఉందని అధికారులు వెల్లడించారు.