మహారాష్ట్రలో ఘోరం.. కొండచరియలు విరిగిపడి 15 మంది మృతి
ఈ వార్తాకథనం ఏంటి
మహారాష్ట్రలోని రాయ్‌గఢ్‌లో భారీ వర్షాలు బీభత్సాలు సృష్టిస్తున్నాయి. ఈ మేరకు కొండచరియలు విరిగిపడి 15 మంది ప్రాణాలు కోల్పోయారు. శిథిలాల్లో మరింత మంది చిక్కుకున్నట్లు తెలుస్తోంది.
ప్రమాద విషయం తెలియడంతో సీఎం ఏక్ నాథ్ షిండే గురువారం ఉదయం ఘటనా స్థలికి చేరుకున్నారు.వేగంగా సహాయక చర్యలు చేపట్టాలని ఆదేశించారు.
ఘటనా స్థలానికి నేషనల్ డిజాస్టర్ రెస్య్కూ ఫోర్స్ (NDRF)కి చెందిన రెండు బృందాలు చేరుకుని సహాయక చర్యలను వేగం చేశాయి. రెస్క్యూ ఆపరేషన్ లో భాగంగా ముంబై నుంచి అదనంగా మరో రెండు బృందాలు బయలుదేరాయి.
ఇర్సల్ వాడి కొండపై ఉన్న గ్రామంలో కొండపై నుంచి మట్టిపెళ్లలు, రాళ్లు నివాసాలపై జారిపడి నిద్రలోనే పలువురు ప్రజలు చనిపోయారు. ప్రమాదంలో పలు ఇళ్లు నేలరాలాయి.
DETAILS
ముంబై, రాయ్‌గఢ్, పాల్ఘార్ జిల్లాలకు రెడ్ అలెర్ట్
రాయ్‌గఢ్‌లో బుధవారం అర్థరాత్రి కొండచరియలు విరిగిపడి దాదాపు 30 కుటుంబాలు చిక్కుకుపోయాయి. కాగా ఇప్పటి వరకు దాదాపు 75కిపైగా గ్రామస్థులను సురక్షిత ప్రాంతాలకు తరలించారు.
ప్రస్తుతం 100 మందికిపైగా NDRF, నేవీ, పోలీసులు సహాయక చర్యల్లో నిమగ్నమయ్యారు. గత కొద్ది రోజులుగా మహారాష్ట్రలోని పలు జిల్లాల్లో కురుస్తున్న ఎడతెరిపి లేని వర్షాలకు ప్రధాన నదులు సావిత్రి, పాతాళగంగ ఉద్ధృతంగా ప్రవహిస్తున్నాయి.
మరోవైపు కుండలికా, అంబా నదులు ప్రమాదకర స్థాయికి మించి ప్రవహిస్తున్నాయి. గాధి, ఉల్లాస్ నదులు డేంజర్ మార్క్ కు చేరువలో ప్రవహిస్తున్నట్లు అధికారులు వెల్లడించారు.
భారీ వర్షాల కారణంగా ముంబైలోని అన్ని విద్యాసంస్థలకు గురువారం ప్రభుత్వం సెలవు ప్రకటించింది. ముంబై, రాయ్‌గఢ్, పాల్ఘార్ జిల్లాలకు రెడ్ అలెర్ట్ జారీ అయ్యింది.