Railway: దసరా పండగకు ముందే రైళ్లలో రిజర్వేషన్ల భారం
ఈ వార్తాకథనం ఏంటి
దసరా పండగ సమీపిస్తుండటంతో నగరాలు, పట్టణాల్లో నివసిస్తున్నవారు తమ సొంత గ్రామాల పయనానికి సన్నద్ధమవుతున్నారు. పెద్దలు, చిన్నపిల్లలు సైతం సొంత ఊరికి వెళ్లి అక్కడ బంధువులతో కలసి పండగ సంబరాలు జరుపుకోవాలనే ఉత్సాహంతో ఉన్నారు. పండగ వేళ కుటుంబ సభ్యులు,బంధుమిత్రులతో కలసి చేసే ఉత్సాహభరిత వేడుకలు, విందులు అందరికీ ఆనందాన్ని పంచుతాయి. దూర ప్రాంతాలకు వెళ్లే వారిలో చాలా మంది రైలు ప్రయాణానికే తొలి ప్రాధాన్యత ఇస్తుంటారు. ఈసారి అక్టోబర్ 2న దసరా రావడం వల్ల, సెప్టెంబరు చివరి వారం నుంచే చాలామంది తమ ప్రయాణానికి ముందుగానే ప్రణాళికలు సిద్ధం చేసుకుంటున్నారు. అందుకే రిజర్వేషన్లపై తీవ్ర ప్రభావం కనిపిస్తోంది.
వివరాలు
సెప్టెంబరు 28, 29, 30 తేదీల్లో భారీగా నిరీక్షణ జాబితా
ఇప్పటికే సెప్టెంబరు 28, 29, 30 తేదీల్లో రైలు ప్రయాణాలు చేసేందుకు చాలామంది టిక్కెట్లు బుక్‌ చేసుకుంటున్నారు. ఈ మూడు తేదీలకు సంబంధించిన అనేక రైళ్లలో రిజర్వేషన్‌లు పూర్తిగా నిండిపోయి,వందల సంఖ్యలో వెయిటింగ్‌ లిస్టులు కనిపిస్తున్నాయి. ఉదాహరణకు, సికింద్రాబాద్‌ నుంచి విజయవాడ, విశాఖపట్టణం, భువనేశ్వర్ మీదుగా కోల్‌కతా వెళ్లే ఫలక్‌నుమా ఎక్స్‌ప్రెస్‌కు సెప్టెంబరు 28న మాత్రం వెయిటింగ్‌ లిస్టు ఉన్నా, మిగిలిన సెప్టెంబరు 23 నుంచి 30 వరకు అన్నీ 'రిగ్రెట్‌' స్థితికి చేరాయి. అంటే టిక్కెట్లకు ఎలాంటి అవకాశం లేదు. అలాగే, చర్లపల్లి నుంచి విజయవాడ,విశాఖపట్నం, భువనేశ్వర్,కటక్,ఖరగ్‌పుర్, గువాహటి మీదుగా సిల్చర్‌ వెళ్లే ఎక్స్ప్రెస్ కూడా సెప్టెంబరు 27 నాటికే 'రిగ్రెట్‌' స్టేటస్‌కు చేరింది. ఇది ప్రయాణికుల భారీ డిమాండ్‌ను సూచిస్తోంది.
వివరాలు
రైళ్లలో వందల సంఖ్యలో వెయిటింగ్‌ లిస్టులు
ఇక కోణార్క్ ఎక్స్ప్రెస్, విశాఖ ఎక్స్ప్రెస్, విశాఖ ఎల్‌టీటీ, పుణె-భువనేశ్వర్, నారాయణాద్రి, శబరి ఎక్స్ప్రెస్ వంటి అనేక రైళ్లలో వందల సంఖ్యలో వెయిటింగ్‌ లిస్టులు నమోదవుతున్నాయి. హైదరాబాద్, వరంగల్, విజయవాడ వంటి ప్రధాన నగరాల నుంచి సొంతూర్లకు వెళ్లాలనుకునే ప్రయాణికులు పెద్ద సంఖ్యలో రిజర్వేషన్‌ కోసం ప్రయత్నిస్తున్నప్పటికీ, టిక్కెట్ల లభ్యతను బట్టి తమ ప్రయాణ తేదీలను లేదా ఎంచుకునే రైలును మార్చుకోవాల్సిన పరిస్థితి ఏర్పడుతోంది.