భారత్‌లో ముస్లింలను విస్మరిస్తే వారి జనాభా ఎలా పెరుగుతుంది?: నిర్మలా సీతారామన్
ఈ వార్తాకథనం ఏంటి
భారతదేశంలో ముస్లింలపై హింస అంశంపై కేంద్ర ఆర్థిక మంత్రి నిర్మలా సీతారామన్ కీలక వ్యాఖ్యలు చేశారు. దేశంలోని ముస్లింలు సంతోషంగా ఉన్నారని చెప్పారు. భారత్‌లో ముస్లింల జీవితాలు కష్టతరం అయితే దేశంలో వారి జనాభా ఎలా పెరుగుతుందని పేర్కొన్నారు. అమెరికాలోని పీటర్సన్ ఇన్‌స్టిట్యూట్ ఫర్ ఇంటర్నేషనల్ ఎకనామిక్స్ (పీఐఐఈ)లో నిర్వహించిన సదస్సులో భారతదేశంలో 'ముస్లింలపై హింస', 'ప్రతికూల పాశ్చాత్య దేశాల అవగాహన'పై అడిగిన ప్రశ్నకు సీతారామన్ స్పందించారు. ప్రపంచంలోనే రెండో అతిపెద్ద ముస్లిం జనాభా ఉన్న దేశంగా భారత్ ఉందన్నారు నిర్మల.
నిర్మల
పాకిస్థాన్‌లో మైనారిటీల సంఖ్య తగ్గుతోంది: నిర్మల
పాకిస్థాన్‌లో మైనారిటీల సంఖ్య తగ్గిపోతోందన్నారు నిర్మలా సీతారామన్. కొన్ని ముస్లిం వర్గాలు కూడా అక్కడ అంతరించిపోయినట్లు చెప్పారు. అయితే, భారతదేశంలో ముస్లింలు చక్కగా ఎవరి పని వారు చేసుకుంటున్నారని పేర్కొన్నారు.వారి పిల్లలు చదువుతున్నారని, ప్రభుత్వాలు ఫెలోషిప్‌లు ఇస్తున్నాయని, నిర్మలా సీతారామన్ వెల్లడించారు. క్షేత్ర స్థాయిలో పరిస్థితులను తెలుసుకోని వారి అభిప్రాయాలను వినడం కంటే భారతదేశంలో ఏమి జరుగుతుందో చూడాలని పాశ్చాత్య దేశాలను నిర్మల కోరారు. పీఐఐఈ అనంతరం వాషింగ్టన్ డీసీలోని యూఎస్ ఛాంబర్‌లో కాన్ఫెడరేషన్ ఆఫ్ ఇండియన్ ఇండస్ట్రీ & యూఎస్ ఇండియా బిజినెస్ కౌన్సిల్ నిర్వహించిన వ్యాపారవేత్తలు, పెట్టుబడిదారుల రౌండ్ టేబుల్ సమావేశానికి నిర్మల హాజరయ్యారు.