APSDMA: బంగాళాఖాతంలో మరో అల్పపీడనం... సోమవారం నాటికి తుపాను
ఈ వార్తాకథనం ఏంటి
ఆగ్నేయ బంగాళాఖాతంలో మరో కొత్త అల్పపీడన వ్యవస్థ రూపుదిద్దుకుంది. ఇది వేగంగా బలపడుతున్నందున, రాబోయే 72 గంటల్లో తుపానుగా మారే అవకాశం ఉందని భారత వాతావరణ శాఖ (ఐఎండీ) ప్రకటించింది. ఈ వాతావరణ మార్పుల ప్రభావంతో ఆంధ్రప్రదేశ్ రాష్ట్ర వ్యాప్తంగా భారీ నుంచి అత్యంత భారీ వర్షాలు కురిసే అవకాశముందని, ప్రజలు అప్రమత్తంగా ఉండాలని అధికారులు సూచించారు. శుక్రవారం ఉదయం నాటికి ఆగ్నేయ బంగాళాఖాతంలో కేంద్రీకృతమైన ఈ అల్పపీడనం పశ్చిమ-వాయువ్య దిశగా మెల్లగా కదులుతోంది. ఇది దశలవారీగా బలపడి, అక్టోబర్ 25వ తేదీ (శనివారం) నాటికి వాయుగుండంగా, అక్టోబర్ 26వ తేదీ (ఆదివారం) నాటికి తీవ్ర వాయుగుండంగా మారుతుందని ఐఎండీ అంచనా వేసింది.
వివరాలు
మత్స్యకారులు, రైతులు అప్రమత్తంగా ఉండాలని ఏపీఎస్డీఎంఏ సూచన
ఇక అక్టోబర్ 27వ తేదీ (సోమవారం) ఉదయానికి ఇది నైరుతి, పశ్చిమ-మధ్య బంగాళాఖాత ప్రాంతాల్లో తుపానుగా మారే అవకాశం ఉందని పేర్కొంది. ఈ నేపథ్యంలో, ఆంధ్రప్రదేశ్ రాష్ట్ర విపత్తుల నిర్వహణ సంస్థ (APSDMA) ఎండీ ప్రఖర్ జైన్ ముఖ్యమైన వివరాలు వెల్లడించారు. అల్పపీడనం ప్రభావంతో శుక్రవారం, శనివారాల్లో రాష్ట్రంలోని కొన్ని ప్రాంతాల్లో భారీ వర్షాలు కురిసే అవకాశం ఉందని తెలిపారు. అలాగే, ఆదివారం భారీ నుంచి అతి భారీ వర్షాలు, సోమవారం అత్యంత భారీ వర్షాలు పడే అవకాశం ఉన్నందున రైతులు, ప్రజలు ముందస్తు జాగ్రత్తలు తీసుకోవాలని ఆయన సూచించారు. వ్యవసాయ కార్యకలాపాలు నిర్వహించే రైతులు జాగ్రత్తలు పాటించాలి, సాధ్యమైనంతవరకు ప్రజలు ఇళ్లలోనే సురక్షితంగా ఉండాలని ఆయన విజ్ఞప్తి చేశారు.
వివరాలు
తీరం వెంబడి బలమైన ఈదురుగాలులు వీస్తాయని వెల్లడి
తీరం ప్రాంతాల్లో బలమైన ఈదురుగాలులు వీచే అవకాశం ఉండటంతో మత్స్యకారులు సముద్రంలోకి వేటకు వెళ్లరాదని అధికారులు కఠిన హెచ్చరికలు జారీ చేశారు. అన్ని విభాగాలు అప్రమత్తంగా ఉన్నాయని, వాతావరణ శాఖ నుంచి వచ్చే తాజా సూచనలను ప్రజలు గమనిస్తూ జాగ్రత్తగా ఉండాలని ప్రభుత్వ యంత్రాంగం సూచించింది.