PM Modi: భారత్-రష్యా సంబంధాలు రాజకీయాలకు అతీతం : ప్రధాని మోదీ
ఈ వార్తాకథనం ఏంటి
ఎప్పుడైనా కష్టకాలం వచ్చినా న్యూఢిల్లీ-మాస్కో ఒకరికి మరొకరు భరోసాగా నిలుస్తూ వచ్చాయని ప్రధాని నరేంద్ర మోదీ తెలిపారు. ఇరుదేశాల మధ్య ఉన్న బంధం కేవలం రెండు దేశాల ప్రజలకే కాకుండా ప్రపంచ శాంతి, స్థిరత్వం, సుసంపన్నతకు అత్యంత అవసరమని ఆయన అన్నారు. భారత్-రష్యా(India-Russia)ద్వైపాక్షిక సదస్సు తింజాయన్‌లోని రిట్జ్ కార్లటన్ హోటల్‌లో ప్రారంభమైంది. ఈ సందర్భంగా మోదీ మాట్లాడుతూ, రష్యా-ఉక్రెయిన్ (Russia-Ukraine) యుద్ధం ముగియాలని మానవాళి ఆకాంక్షిస్తోందని, ఇరుపక్షాలు ఆ దిశగా అడుగులు వేస్తాయని నమ్ముతున్నామని తెలిపారు. ఇటీవల జరుగుతున్న శాంతి ప్రయత్నాలను భారత్ స్వాగతిస్తుందని పేర్కొన్నారు. అదేవిధంగా, డిసెంబర్‌లో జరగనున్న భారత్-రష్యా సదస్సుకు రష్యా అధ్యక్షుడు వ్లాదిమిర్ పుతిన్ రాక కోసం 140 కోట్ల భారతీయులు ఆసక్తిగా ఎదురు చూస్తున్నారని మోదీ అన్నారు.
Details
నరేంద్ర మోదీ ఆప్త మిత్రుడు
తరచూ జరుగుతున్న ఉన్నతస్థాయి భేటీలు ఇరుదేశాల మధ్య ఉన్న ప్రత్యేక బంధానికి నిదర్శనమని పేర్కొన్నారు. భారత్-రష్యా సంబంధాలు కొన్ని సూత్రాలపై ఆధారపడి బలంగా కొనసాగుతున్నాయని, బహుముఖ సహకారంతో తాము ముందుకు సాగుతున్నామని వివరించారు. తమ బంధం రాజకీయాలకు అతీతంగా ఎంతో విశ్వాసపూర్వకంగా ఉందని మోదీ అభివర్ణించారు. ఇక ఈ భేటీలో పుతిన్ మాట్లాడుతూ, ప్రధాని నరేంద్ర మోదీని ఆప్త మిత్రుడిగా పేర్కొన్నారు. భారత ప్రధానితో భేటీ కావడం పట్ల తన ఆనందాన్ని వ్యక్తం చేశారు. షాంఘై సహకార సదస్సు గ్లోబల్ సౌత్, ఈస్ట్ దేశాలకు బలమైన వేదికగా నిలుస్తోందని అభివర్ణించారు. రానున్న భారత్-రష్యా ద్వైపాక్షిక సదస్సు తమ బహుముఖ బంధాన్ని మరింత బలపరుస్తుందని ఆయన ఆశాభావం వ్యక్తం చేశారు.