DRDO: శత్రు దేశాల యుద్ధ నౌకలే లక్ష్యంగా.. భారత్ తొలి హైపర్సోనిక్ యాంటీ షిప్ మిసైల్.. గణతంత్ర వేడుకల్లో తొలిసారి ప్రదర్శన
ఈ వార్తాకథనం ఏంటి
సముద్రంపై ఎంతో దూరంలో ఉన్న శత్రుదేశాల యుద్ధనౌకలను పూర్తిగా నాశనం చేయగల సామర్థ్యంతో భారత్ అభివృద్ధి చేసిన తొలి లాంగ్ రేంజ్ యాంటీ షిప్ హైపర్సోనిక్ గ్లైడ్ మిసైల్ (ఎల్ఆర్ఏఎస్హెచ్ఎం) తొలిసారి ప్రజల ముందుకు రానుంది. సోమవారం దిల్లీలో నిర్వహించనున్న గణతంత్ర దినోత్సవ కవాతులో ఈ అత్యాధునిక క్షిపణిని ప్రదర్శించనున్నారు. ఈ మిసైల్ 1500 కిలోమీటర్ల వరకు దాడి చేసే శక్తిని కలిగి ఉండగా, గంటకు సుమారు 6,100 కిలోమీటర్ల వేగంతో ప్రయాణిస్తుంది. హైదరాబాద్లోని అడ్వాన్స్డ్ సిస్టమ్స్ లేబొరేటరీలో రూపొందించిన ఈ క్షిపణిని 2024 నవంబర్లో విజయవంతంగా ప్రయోగాత్మకంగా పరీక్షించారు. పరీక్షలు విజయవంతం కావడంతో మరో రెండేళ్లలో దీన్ని సైనిక దళాల్లో ప్రవేశపెట్టాలని నిర్ణయించారు.
వివరాలు
ఎల్ఆర్ఏఎస్హెచ్ఎం ప్రత్యేకతలు ఇవే..
సముద్రంలో అత్యంత వేగంగా కదిలే యుద్ధనౌకలను కూడా ఈ క్షిపణి ఖచ్చితంగా గుర్తించి పూర్తిస్థాయిలో ధ్వంసం చేసే సామర్థ్యం కలిగి ఉంది. హైపర్సోనిక్ వేగంతో దూసుకెళ్లే ఈ మిసైల్ను శత్రుదేశ యుద్ధనౌకలు గుర్తించేలోపే దాడి పూర్తవుతుంది. ఇందుకోసం అత్యంత ఆధునిక ఏరోడైనమిక్ డిజైన్ను ఉపయోగించి దీనిని ప్రత్యేకంగా రూపకల్పన చేశారు. ఈ క్షిపణిని ప్రత్యేకంగా రూపొందించిన మొబైల్ లాంచర్ నుంచి ప్రయోగిస్తారు. ఇందులో 'బూస్ట్ అండ్ గ్లైడ్' సాంకేతికతను వినియోగించారు. ప్రయోగించిన క్షణాల్లోనే ఇది గరిష్ఠ వేగాన్ని అందుకొని లక్ష్య దిశగా దూసుకెళ్తుంది. సముద్రంలోని లక్ష్యాలే కాకుండా భూ ఉపరితలాలపై ఉన్న టార్గెట్లను కూడా ఇది సులభంగా ఛేదించగలదు.
వివరాలు
ఎల్ఆర్ఏఎస్హెచ్ఎం ప్రత్యేకతలు ఇవే..
శత్రుదేశాల రాడార్ వ్యవస్థలు, ఎయిర్ డిఫెన్స్ నెట్వర్క్లు ఈ క్షిపణి రాకను ముందుగా గుర్తించలేని విధంగా దీన్ని రూపొందించారు. తక్కువ ఎత్తులోనే ప్రయాణిస్తూ లక్ష్యాన్ని చేరుకునే ప్రత్యేక సామర్థ్యం దీనికుంది. అన్ని రకాల పేలోడ్లను మోసుకెళ్లగల ఈ మిసైల్ ఏ విధమైన యుద్ధనౌకనైనా క్షణాల్లో తుత్తునియలు చేయగల శక్తిని కలిగి ఉంది.
వివరాలు
ప్రాజెక్ట్కు నేతృత్వం వహిస్తున్నది తెలుగు వ్యక్తే..
డీఆర్డీవో ప్రతిష్ఠాత్మకంగా చేపట్టిన ఈ కీలక ప్రాజెక్టుకు గత ఐదేళ్లుగా తెలుగు వ్యక్తి ఎ. ప్రసాద్ గౌడ్ డైరెక్టర్గా వ్యవహరిస్తున్నారు. నంద్యాల జిల్లా డోన్ ప్రాంతానికి చెందిన ఆయన, సుమారు 30 సంవత్సరాల క్రితం డీఆర్డీవోలో అడుగుపెట్టి, అంచెలంచెలుగా ఎదుగుతూ ప్రస్తుతం ఉన్నత స్థాయికి చేరుకున్నారు. దేశ రక్షణ రంగంలో ఆయన చేసిన సేవలు ఈ ప్రాజెక్టుతో మరోసారి దేశానికి గర్వకారణంగా నిలుస్తున్నాయి.