ఇండిగో ఫ్లైట్ కి తప్పిన ముప్పు.. దిల్లీలో ల్యాండ్ అవుతుండగా రన్ వేను తాకిన తోక భాగం
ఈ వార్తాకథనం ఏంటి
దిల్లీలోని ఇందిరాగాంధీ అంతర్జాతీయ విమానాశ్రయంలో ల్యాండ్ అయిన ఓ విమానం త్రుటిలో పెను ప్రమాదాన్ని తప్పించుకుంది.
విమానం రన్ వేపైకి దిగుతున్న క్రమంలో దాని తోక భాగం నేలకు తాకింది. అప్రమత్తమైన పైలెట్లు విమానాన్ని క్షేమంగా ల్యాండింగ్ చేశారు.
జూన్ 11న కోల్ కతా-దిల్లీ ఇండిగో వీటీ - ఐఎంజీ ఫ్లైట్ ల్యాండ్ అవుతన్న క్రమంలో ప్రమాదవశాత్తు దాని తోక భాగం నేలను తాకడంతో ప్రయాణికులు ఆందోళన వ్యక్తం చేశారు.
దీంతో పైలెట్లు అప్రమత్తమై విమానాన్ని సురక్షితంగా ల్యాండ్ చేశారు. ఘటనలో ఎవరూ ప్రమాదం బారిన పడకపోవడంతో ప్రయాణికులు హమ్మయ్య అని ఊపిరి పీల్చుకోగలిగారు. అయితే సదరు ఫ్లైట్ దెబ్బతినడంతో తదుపరి సర్వీసులను అధికారులు నిలిపివేయడం గమనార్హం.
DETAILS
రన్ వే పైకి దిగుతున్న క్రమంలో ఫ్లైట్ భిన్నంగా కదిలింది : డీజీసీఏ
ప్రమాదంలో ఫ్లైట్ తోక భాగం మాత్రమే దెబ్బతింది తప్ప మిగతా భాగాలన్నీ యధాతథంగానే ఉన్నాయని డైరెక్టరేట్ జనరల్ ఆఫ్ సివిల్ ఏవియేషన్ ( డీజీసీఏ ) ప్రకటించింది.
అయితే కోల్ కతా నుంచి బయల్దేరిన విమానం దిల్లీలో ల్యాండ్ అయ్యేంత వరకు అటు ఇంజిన్ లోపాలు గానీ ఇటు ఇతర భాగాల్లో సమస్యలు గానీ తలెత్తలేదని స్పష్టం చేసింది.
ఫ్లైట్ రన్ వే పైకి దిగే క్రమంలో సాధారణం కంటే భిన్నంగా విమానం కదులుతున్నట్లు పైలెట్లు గుర్తించారని ఈ నియంత్రణ సంస్థ పేర్కొంది.
కిందకు దిగే సమయంలో విమానం తోక ఒక్కసారిగా రన్ వేను తాకిందని పేర్కొంది. ఘటనపై దర్యాప్తు చేపట్టామని డీజీసీఏ వివరించింది.