Telangana Inter Exams : తెలంగాణలో ఇంటర్ పరీక్షలు ప్రారంభం.. స్టూడెంట్స్ ఈ విషయాలు గుర్తుంచుకోండి..
ఈ వార్తాకథనం ఏంటి
తెలంగాణలో ఇంటర్మీడియట్ వార్షిక పరీక్షలు నేటి నుంచి ప్రారంభమవుతున్నాయి. ఇవి మార్చి 18 వరకు కొనసాగనున్నాయి.ఈ పరీక్షల నిర్వహణ కోసం ఇంటర్మీడియట్ బోర్డు, సంబంధిత అధికారులు సమగ్ర ఏర్పాట్లు పూర్తి చేశారు. ఈరోజు ప్రథమ సంవత్సరం (ఫస్ట్ ఇయర్)విద్యార్థుల పరీక్ష ప్రారంభమవుతోంది. రేపటి నుంచి ద్వితీయ సంవత్సరం (సెకండ్ ఇయర్) విద్యార్థుల పరీక్షలు ప్రారంభం కానున్నాయి. ప్రతిరోజూ ఉదయం 9 గంటల నుంచి మధ్యాహ్నం 12 గంటల వరకు పరీక్షలు నిర్వహిస్తారు. రాష్ట్రవ్యాప్తంగా మొత్తం 9.97 లక్షల మంది విద్యార్థులు పరీక్షలకు హాజరవుతున్నారు. అందులో 4,89,126 మంది మొదటి సంవత్సరం విద్యార్థులు కాగా, 5,07,949 మంది రెండో సంవత్సరం విద్యార్థులు ఉన్నారు. వీరి కోసం రాష్ట్రంలో 1,495 పరీక్షా కేంద్రాలను ఏర్పాటు చేశారు.
వివరాలు
'ఒక నిమిషం నిబంధన' రద్దు
గత సంవత్సరం అమలులో ఉన్న 'ఒక నిమిషం నిబంధన' కారణంగా విద్యార్థులు,వారి తల్లిదండ్రులు అనేక ఇబ్బందులు ఎదుర్కొన్నారు. దీనిని పరిగణనలోకి తీసుకున్న అధికారులు ఈసారి ఆ నిబంధనను రద్దు చేశారు. పరీక్ష ఉదయం 9 గంటలకు ప్రారంభమైనప్పటికీ, 9.05 గంటల వరకు ఆలస్యంగా వచ్చిన విద్యార్థులను పరీక్షా కేంద్రంలోకి అనుమతించనున్నారు. అయినప్పటికీ, పరీక్ష సమయానికి కనీసం అరగంట ముందుగానే కేంద్రానికి చేరుకోవాలని, ఆలస్యంతో సమస్యలు తలెత్తకుండా జాగ్రత్తపడాలని అధికారులు సూచించారు. ఈ ఏడాది పరీక్షా కేంద్రాల్లో సీసీ కెమెరాలను ఏర్పాటు చేశారు.మాస్ కాపీయింగ్ను నిరోధించేందుకు జంబ్లింగ్ విధానాన్ని అమలు చేస్తున్నారు. విద్యార్థులు పూర్తి మూడు గంటలపాటు పరీక్షా కేంద్రంలోనే ఉండాలి.పరీక్షను ముందుగానే పూర్తి చేసినా,మధ్యాహ్నం 12గంటల వరకు కేంద్రాన్ని విడిచిపోవడానికి అనుమతి ఉండదు.
వివరాలు
పరీక్షల దృష్ట్యా అదనపు ప్రత్యేక బస్సులు
ఇదిలా ఉండగా, తెలంగాణ ఆర్టీసీ ఇంటర్ విద్యార్థులకు శుభవార్త తెలిపింది. బస్సులో ప్రయాణించే సమయంలో విద్యార్థినులు ఆధార్ కార్డు చూపాల్సిన అవసరం లేదు. హాల్ టికెట్ చూపిస్తే సరిపోతుంది; ఉచిత ప్రయాణ సౌకర్యం అందించబడుతుంది. పరీక్షల దృష్ట్యా అదనపు ప్రత్యేక బస్సులను కూడా ఏర్పాటు చేసినట్లు రాష్ట్ర రోడ్డు రవాణా శాఖ మంత్రి వెల్లడించారు. విద్యార్థుల సౌకర్యార్థం బస్టాండ్ల వద్ద మాత్రమే కాకుండా, వారు ఎక్కడ ఎక్కినా బస్సులు ఆపాలని అధికారులకు సూచనలు ఇచ్చారు. అలాగే, ముఖ్యమంత్రి ఇంటర్ విద్యార్థులకు శుభాకాంక్షలు తెలుపుతూ పరీక్షలు విజయవంతంగా రాయాలని ఆకాంక్షించారు.
వివరాలు
మార్చి 4 నుంచి మూల్యాంకనం
మరోవైపు, ఇంటర్ బోర్డు సమాధాన పత్రాల మూల్యాంకనానికి సంబంధించిన షెడ్యూల్ను ప్రకటించింది. మార్చి 4 నుంచి సంస్కృతం పేపర్ల మూల్యాంకనం ప్రారంభమవుతుంది. మార్చి 15 నుంచి మొదటి విడత, మార్చి 18 నుంచి రెండో విడత, మార్చి 20 నుంచి మూడో విడతగా ఇతర పేపర్ల మూల్యాంకనం చేపట్టనున్నారు. ఏప్రిల్ రెండో వారంలో పరీక్షా ఫలితాలను విడుదల చేయనున్నట్లు బోర్డు వెల్లడించింది.