Jubliee hills Byelection: జూబ్లీహిల్స్ ఉపఎన్నిక ఓట్ల లెక్కింపునకు సర్వం సిద్ధం.. గెలుపు ఎవరిదీ?
ఈ వార్తాకథనం ఏంటి
జూబ్లీహిల్స్ ఉపఎన్నిక ఓట్ల లెక్కింపుకు అన్ని ఏర్పాట్లు పూర్తయ్యాయి. పోలింగ్ ముగిసినప్పటి నుంచే ఈ ఎన్నికలో ఎవరు విజయం సాధించబోతున్నారు అన్నది రాష్ట్రవ్యాప్తంగా చర్చనీయాంశమైంది. రాజకీయ పార్టీలన్నింటిలోనూ ఇదే హాట్ టాపిక్‌గా మారింది. ఇక ఇంకొన్ని గంటల్లోనే విజేత ఎవరో స్పష్టమవనుంది. ఈసీ కౌంటింగ్ కోసం పకడ్బందీ ఏర్పాట్లు చేసింది.
వివరాలు
లెక్కింపు వివరాలు - 42 టేబుల్స్, 10 రౌండ్లు
నవంబర్ 14న యూసుఫ్‌గూడలోని కోట్ల విజయభాస్కర్‌ రెడ్డి స్టేడియంలో ఓట్ల లెక్కింపు జరుగుతుంది. ఉదయం 8 గంటలకు కౌంటింగ్ ప్రారంభమవుతుంది. మొత్తం 42 టేబుల్స్ ఏర్పాటు చేయగా, 10 రౌండ్లలో ఫలితాలు తేలేలా అధికారులు ప్రణాళిక సిద్ధం చేశారు. లెక్కింపు మొదటి బూత్‌ షేక్‌పేట్‌ డివిజన్‌ నుంచి ప్రారంభమై, చివరగా ఎర్రగడ్డ డివిజన్‌తో ముగుస్తుంది. లెక్కింపు కేంద్రాల వద్ద కఠినమైన భద్రతా ఏర్పాట్లు అమలులోకి రానున్నాయి.
వివరాలు
అధిక పోలింగ్ నమోదైన ప్రాంతాలు
రహ్మత్‌నగర్‌ డివిజన్‌లోని 15 కేంద్రాల్లో, బోరబండ డివిజన్‌లో 13, ఎర్రగడ్డలో 3, వెంగళరావునగర్‌లో ఒక కేంద్రంలో 60 శాతం కంటే ఎక్కువ పోలింగ్ నమోదైంది. ఈ ప్రాంతాల్లో నమోదైన ఓట్లు ఉపఎన్నిక ఫలితంపై కీలక ప్రభావం చూపే అవకాశం ఉంది. మొత్తంగా 48.49 శాతం పోలింగ్ నమోదైన విషయం తెలిసిందే. కౌంటింగ్ పర్యవేక్షణ కౌంటింగ్ ప్రక్రియను పర్యవేక్షించేందుకు ఒక ప్రత్యేక అధికారి నియమించబడ్డారు. మొత్తం 186 మంది సిబ్బంది లెక్కింపులో పాల్గొంటారు. రిటర్నింగ్ ఆఫీసర్ కౌంటింగ్ ప్రగతిని ఎప్పటికప్పుడు పరిశీలిస్తారు. అభ్యర్థులు, వారి ఏజెంట్లకు మాత్రమే కేంద్రంలో ప్రవేశం అనుమతించబడుతుంది; ఇతరులకు ప్రవేశం లేదని అధికారులు స్పష్టం చేశారు.
వివరాలు
భద్రతా చర్యలు
పోలింగ్ సమయంలో ముగ్గురు ప్రస్తుత ఎమ్మెల్యేలతో పాటు ఇద్దరు మాజీ ఎమ్మెల్యేలపై కేసులు నమోదైన సంగతి తెలిసిందే. కౌంటింగ్ రోజు ఎలాంటి అవాంఛనీయ ఘటనలు జరగకుండా పోలీసులు ముందస్తు చర్యలు చేపడుతున్నారు. నిబంధనలు ఉల్లంఘిస్తే చట్టపరమైన చర్యలు తీసుకోవాలని పోలీసులు హెచ్చరించారు. కౌంటింగ్ కేంద్రం పరిసరాల్లో 144 సెక్షన్ అమల్లోకి రానుంది. ఎగ్జిట్ పోల్స్ అంచనాలు ఈ ఉపఎన్నికపై పలు ఎగ్జిట్ పోల్స్ కూడా వెలువడ్డాయి. వాటిలో కాంగ్రెస్‌కు స్వల్ప ఆధిక్యం ఉన్నట్లు ఫలితాలు సూచిస్తున్నాయి. అయితే మౌన ఓటర్లు తమ వైపు ఉన్నారని బీఆర్ఎస్ విశ్వసిస్తోంది. మొత్తం పోటీ ప్రధానంగా కాంగ్రెస్-బీఆర్ఎస్ మధ్యే జరుగుతుందని అన్ని సర్వేలు సూచిస్తున్నాయి. బీజేపీ మూడో స్థానంలో నిలిచే అవకాశముందని అవి అంచనా వేస్తున్నాయి.
వివరాలు
నవంబర్ 14న జరిగే ఓట్ల లెక్కింపు ఫలితాలు
మొత్తంగా నవంబర్ 14న జరిగే ఓట్ల లెక్కింపులో ఎవరు విజయం సాధిస్తారనేది ఆసక్తికరంగా మారింది. ఇక ఈ ఎన్నికలో బీఆర్ఎస్ నుంచి మాగంటి సునీత, కాంగ్రెస్ నుంచి నవీన్ యాదవ్, బీజేపీ నుంచి ప్రదీప్ రెడ్డి బరిలో ఉన్నారు.