విడాకులపై సుప్రీంకోర్టు కీలక ఆదేశాలు; 6నెలల వెయిటింగ్ పీరియడ్‌ అవసరం లేదని తీర్పు
విడాకుల విషయంలో 6నెలల వెయిటింగ్ పీరియడ్‌‌పై సుప్రీంకోర్టు సోమవారం కీలక ఆదేశాలు జారీ చేసింది. ఆర్టికల్ 142 ప్రకారం వివాహం బంధం కోలుకోలేని విధంగా విచ్ఛిన్నమైతే, ఆ కారణంతో వివాహాలను వెంటనే రద్దు చేయొచ్చని సుప్రీంకోర్టు పేర్కొంది. ఇలాంటి కేసుల్లో పరస్పర అంగీకారంతో 6నెలల వెయిటింగ్ పీరియడ్‌ తప్పనిసరి లేకుండానే విడాకులను మంజూరు చేయొచ్చని జస్టిస్ సంజయ్ కిషన్ కౌల్, జస్టిస్ సంజీవ్ ఖన్నా, జస్టిస్ ఏఎస్ ఓకా, జస్టిస్ విక్రమ్ నాథ్, జస్టిస్ జేకే మహేశ్వరిలతో కూడిన రాజ్యాంగ ధర్మాసనం పేర్కొంది. అలాగే మెయింటెనెన్స్, భరణం, పిల్లల హక్కులకు సంబంధించి ఈక్విటీలను ఎలా బ్యాలెన్స్ చేయాలో కూడా కోర్టు వివరించింది.
రాజ్యాంగ ధర్మాసనం సుదీర్ఘ విచారణ, గతేడాది సెప్టెంబర్‌లో తీర్పు రిజర్వు
హిందూ వివాహ చట్టంలోని సెక్షన్ 13బీ కింద నిర్దేశించిన విధంగా పరస్పర అంగీకారంతో 6నెలల నిరీక్షణ కాలం అవసరం లేకుండానే తన అపారమైన అధికారాలను వినియోగించుకుని సుప్రీంకోర్టు విడాకులను మంజూరు చేయొచ్చా అనే అంశంపై సోమవారం ధర్మాసనం విచారణ చేపట్టింది. దంపతుల మధ్య బంధం కోలుకోలేని విధంగా దెబ్బతింటే ఆర్టికల్ 142 ప్రకారం నిరీక్షణ కాలం లేకుండానే విడాకులను మంజూరు చేసే అధికారం సుప్రీంకోర్టుకు ఉందని ఐదుగురు జడ్జిలతో కూడిన ధర్మాసనం తీర్పు చెప్పింది. ఈ కేసును ఏడేళ్ల క్రితం ఐదుగురు న్యాయమూర్తుల రాజ్యాంగ ధర్మాసనానికి బదిలీ చేశారు. సుదీర్ఘ వాదనలు విన్న రాజ్యాంగ ధర్మానసం సెప్టెంబర్ 29, 2022న రిజర్వు చేసింది. తాజాగా తీర్పు చెప్పింది.
ఈ టైమ్ లైన్ ని షేర్ చేయండి