Agriculture: కుంభమేళా ఎఫెక్టు.. కొనసీమ కొబ్బరికి రెట్టింపు డిమాండ్!
ఈ వార్తాకథనం ఏంటి
కోనసీమ కొబ్బరికి ఈ సారి రెండు విధాలా కలిసొచ్చాయి. గతంలో ధరలు ఉన్నప్పుడు దిగుబడి తక్కువగా ఉండేది. దిగుబడి ఎక్కువగా ఉన్నప్పుడు అమ్మకాలు నామమాత్రంగా ఉండేవి. కానీ ఈ సారి ధరలూ, దిగుబడి రెండూ ఆశాజనకంగా ఉండటంతో రైతులు సంతోషంలో మునిగితేలుతున్నారు. ప్రధానంగా ఉత్తర్‌ ప్రదేశ్‌లోని ప్రయాగ్‌రాజ్‌లో జరుగుతున్న మహా కుంభమేళా కురిడీ కాయల ఎగుమతులకు ఊతమిచ్చింది. తమిళనాడు, కర్ణాటక రాష్ట్రాల్లో కాయల ఉత్పత్తి తగ్గడం కూడా కోనసీమ కొబ్బరి ధర పెరగడానికి కారణమైంది. వసంత పంచమి, మహాశివరాత్రి, హోలీ, శ్రీరామనవమి వంటి పండగల కారణంగా కూడా డిమాండ్ పెరిగింది. ఒడిశా, మహారాష్ట్ర, రాజస్థాన్, మధ్యప్రదేశ్, ఛత్తీస్‌గఢ్, తెలంగాణకు కోనసీమ కొబ్బరిని పెద్దఎత్తున ఎగుమతి చేస్తున్నారు.
Details
ఎకరాకు రెట్టింపు దిగుబడి
గతంలో ఎకరానికి 400 నుంచి 500 కాయల దిగుబడి వచ్చేది. ప్రస్తుతం అది 800 నుంచి 1,000 కాయల వరకు పెరిగింది. గత ఏడాది సంక్రాంతి సమయానికి వెయ్యి పచ్చికాయల ధర రూ.9 వేలు పలికింది. ఇప్పుడు అదే పచ్చికాయలు రూ.15 వేలకు చేరుకున్నాయి. వెయ్యి కురిడీ కాయల గండేరా రకం ధర రూ.19 వేలు, గటగట రకం ధర రూ.17 వేలు పలుకుతోంది. కొత్తకొబ్బరి క్వింటాకు ధర కూడా రూ.14 వేల వద్ద స్థిరంగా ఉంది. ఇంతకాలం ధరలు, దిగుబడుల మధ్య బాధపడిన రైతులకు ఇప్పుడు ఈ అనుకూల పరిస్థితులు ఎంతో ఉపశమనం కలిగించాయి. మార్కెట్‌ విశ్లేషకులు కూడా ఈ పెరుగుదల రైతుల పక్షాన పనిచేస్తుందని భావిస్తున్నారు.