Local Body Election : స్థానిక సంస్థల ఎన్నికల నిర్వహణకు వేగంగా అడుగులు.. రెండు రోజుల్లో షెడ్యూల్..?
ఈ వార్తాకథనం ఏంటి
తెలంగాణలో స్థానిక సంస్థల ఎన్నికలు వేగంగా జరగనున్నాయి. ఈ నేపథ్యంలో హైకోర్టు తీర్పును పరిగణనలోకి తీసుకుని,ఈ నెలలోనే ఎన్నికల షెడ్యూల్‌ను ప్రకటించే దిశగా ప్రభుత్వం ఏర్పాట్లు చేస్తోంది. ముఖ్యంగా, స్థానిక సంస్థల ఎన్నికల్లో బీసీలకు 42% రిజర్వేషన్లు ఇవ్వాలన్న ప్రభుత్వం నిర్ణయం తీసుకుంది. దీనిని అమలు చేసేందుకు గురువారం ప్రత్యేక జీవో జారీ చేయనున్నట్లు సమాచారం. బీసీ రిజర్వేషన్లకు సంబంధించిన అన్ని తుది ప్రక్రియలను ప్రభుత్వం ఇప్పటికే పూర్తి చేసింది. ఈ ప్రక్రియలో భాగంగా 26వ తేదీ రాత్రి జిల్లా కలెక్టర్లకు సంబంధిత జీవో పంపిణీ చేసే ప్రణాళిక ఉంది. ఆ తరువాత, 27వ తేదీన పోలిటికల్ పార్టీలు పాల్గొని కలెక్టర్లతో సమావేశాలు ఏర్పాటు చేస్తారు.
వివరాలు
29వ తేదీన ఎన్నికల షెడ్యూల్‌ను ప్రకటించే అవకాశం
ఈ సమావేశాల్లో రిజర్వేషన్లను ప్రకటించే తుదీ నిర్ణయం తీసుకుంటారు. దాని అనంతరం, రాష్ట్ర ప్రభుత్వం గెజిట్ ప్రకటనను ఈ నెల 28వ తేదీకి ముందే పూర్తి చేసి, రాష్ట్ర ఎన్నికల సంఘానికి అందజేయడానికి సిద్ధంగా ఉంది. 29వ తేదీన రాష్ట్ర ఎన్నికల సంఘం ఎంపీటీసీ, జడ్పీటీసీ, సర్పంచ్ ఎన్నికల షెడ్యూల్‌ను ప్రకటించే అవకాశం ఉంది. ఎన్నికల ఏర్పాట్లలో ఎలాంటి అడ్డంకులు రాకుండా, అప్రమత్తంగా, పకడ్బందీగా ముందడుగు వేయాలని సీఎం రేవంత్ రెడ్డి ఉన్నతాధికారులకు సూచించినట్లు సమాచారం. ఎన్నికల ప్రక్రియ ప్రారంభమైన తర్వాత, కోర్టులు పెద్ద జోక్యం చేసుకోకపోవచ్చన్న భావన ప్రభుత్వంలో ఉంది. ప్రస్తుతం బీసీ రిజర్వేషన్లకు సంబంధించిన బిల్ రాష్ట్రపతి కార్యాలయంలో పెండింగ్‌లో ఉంది.
వివరాలు
పీవోలకు రెండు రోజుల పాటు శిక్షణ
ఈ పరిస్థితిని దృష్టిలో ఉంచుకొని, ప్రభుత్వం జీవో ద్వారా 42% రిజర్వేషన్లను అమలు చేయాలని నిర్ణయించింది. స్థానిక సంస్థల ఎన్నికల షెడ్యూల్ రెండుమూడు రోజుల్లో విడుదల అయ్యే అవకాశాలు ఉన్న నేపథ్యంలో, రాష్ట్ర ఎన్నికల సంఘం అన్ని జిల్లా కలెక్టర్లకు లేఖలు రాసి, పంచాయతీ ఎన్నికలకు అవసరమైన పోలింగ్ అధికారులు (పీవోలు)ను నియమించాలని సూచించింది. నియమిత పీవోలు జిల్లాల వారీగా రెండు రోజుల పాటు శిక్షణ పొందాలని పేర్కొన్నారు. ఈ శిక్షణ కార్యక్రమాలను 26, 27 తేదీలలో డివిజన్‌ వారీగా నిర్వహించేందుకు ఏర్పాట్లు చేసినట్లు తెలుస్తుంది.