Congress Party Donations: కాంగ్రెస్‌కు భారీ షాక్.. ఏడాదిలో 75 శాతం పడిపోయిన విరాళాలు
ఈ వార్తాకథనం ఏంటి
కాంగ్రెస్ పార్టీకి 2025-26 ఆర్థిక సంవత్సరంలో రూ.130.69 కోట్ల విరాళాలు అందాయి. అయితే అంతకుముందు ఆర్థిక సంవత్సరం 2024-25లో సమకూరిన రూ.517.39 కోట్లతో పోలిస్తే తాజా ఏడాదిలో విరాళాలు ఏకంగా 75 శాతం తగ్గడం గమనార్హం. గత దశాబ్ద కాలంలో నమోదైన అత్యంత భారీ తగ్గుదల ఇదే. గత 12 ఆర్థిక సంవత్సరాల గణాంకాలను పరిశీలిస్తే.. అంతకుముందు 2015-16లో కాంగ్రెస్ విరాళాల్లో భారీ క్షీణత నమోదైంది. ఆ ఏడాది పార్టీకి అందిన విరాళాలు.. అంతకుముందు ఏడాదిలో వచ్చిన రూ.141.46 కోట్లతో పోలిస్తే సుమారు 86 శాతం పడిపోయాయి.
వివరాలు
విరాళాల వివరాలను ఈసీకి సమర్పించిన కాంగ్రెస్
ప్రజాప్రాతినిధ్య చట్టం-1951లోని సెక్షన్ 29(సి) ప్రకారం.. అన్ని రాజకీయ పార్టీలు తమకు అందిన రూ.20 వేలకు మించిన విరాళాల వివరాలను ఏటా ఎన్నికల సంఘానికి సమర్పించాలి.
ఈ నిబంధనలో భాగంగా కాంగ్రెస్ పార్టీ నివేదికను ఏఐసీసీ కోశాధికారి అజయ్ మాకన్ ఎన్నికల సంఘానికి అందించారు.
వివరాలు
ప్రూడెంట్ ట్రస్ట్ నుంచి తగ్గిన విరాళాలు
2025-26లో కాంగ్రెస్ విరాళాలు భారీగా తగ్గడానికి 'ప్రూడెంట్ ఎలక్టోరల్ ట్రస్ట్' ద్వారా అందిన సాయం క్షీణించడమే ప్రధాన కారణం. 2024-25లో ఈ ట్రస్ట్ ద్వారా కాంగ్రెస్‌కు రూ.216.34 కోట్లు అందాయి. అయితే, 2025-26లో ఈ మొత్తం సుమారు 88 శాతం తగ్గి రూ.25 కోట్లకు పడిపోయింది.
బీజేపీ విరాళాల నివేదిక ఇంకా వెల్లడి కాలేదు
మరోవైపు, 2025-26 ఆర్థిక సంవత్సరానికి సంబంధించి బీజేపీ విరాళాల నివేదికను ఎన్నికల సంఘం ఇంకా బహిర్గతం చేయలేదు.
2024-25లో కమలం పార్టీకి రూ.6,074.02 కోట్ల విరాళాలు అందాయి. అదే సమయంలో కాంగ్రెస్‌కు వచ్చిన విరాళాలతో పోలిస్తే బీజేపీకి సమకూరిన మొత్తం దాదాపు 12 రెట్లు ఎక్కువ.
వివరాలు
విరాళాల నివేదికలో అన్ని ఆదాయాలు ఉండవు
అయితే, రాజకీయ పార్టీల విరాళాల నివేదికల్లో వాటికి లభించిన మొత్తం ఆదాయం వివరాలు వెల్లడికావు.
చిన్న మొత్తాల్లో వచ్చిన విరాళాలు, సభ్యత్వ రుసుములు, కూపన్ల ద్వారా సేకరించిన నిధులు, వడ్డీ వంటి ఇతర ఆదాయ వనరులను ఇందులో చేర్చరు.
2024-25 ఆర్థిక సంవత్సరంలో కాంగ్రెస్ పార్టీకి కేవలం కూపన్ల ద్వారానే రూ.350.12 కోట్ల ఆదాయం సమకూరింది.