Encounter : కిష్త్వార్‌లో భారీ ఆపరేషన్.. ఉగ్రవాదిని హతమార్చిన భద్రతా దళాలు!
ఈ వార్తాకథనం ఏంటి
జమ్ముకశ్మీర్‌లోని కిష్త్వార్ జిల్లాలో భద్రతా బలగాలు మరోసారి కీలక విజయాన్ని సాధించాయి. ఉగ్రవాదుల చొరబాటును అడ్డుకునే క్రమంలో, చత్రు ప్రాంతంలోని అటవీ ప్రాంతంలో భద్రతా దళాలు ఓ ఉగ్రవాదిని హతమార్చాయి. ఈ నెల 9న ప్రారంభమైన సెర్చ్ ఆపరేషన్ అనంతరం, శుక్రవారం ఉదయం ఈ విజయం సాధించారు. ఉగ్రవాదులు చత్రు అటవీ ప్రాంతంలో సంచరిస్తున్నారన్న కచ్చితమైన సమాచారం ఆధారంగా బుధవారం నుంచి ఆ ప్రాంతంలో జమ్మూ కశ్మీర్ పోలీసులు, భద్రతా బలగాలు సంయుక్తంగా గాలింపు చర్యలు చేపట్టాయి.
Details
రెండు రోజుల పాటు సాగిన ఆపరేషన్
ఇదే సమయంలో బుధవారం సాయంత్రం ఉగ్రవాదులతో భద్రతా బలగాలకు ఎన్‌కౌంటర్ చోటుచేసుకుంది. పరిస్థితిని గమనించిన భద్రతా దళాలు, ఉగ్రవాదులను చుట్టుముట్టి భారీ ఆపరేషన్ కొనసాగించాయి. రెండు రోజులపాటు సాగిన ఈ ఆపరేషన్‌లో శుక్రవారం ఉదయం ఓ ఉగ్రవాదిని మట్టుబెట్టారు. అయితే ఘటనాస్థలిలో ఇంకా మరికొంతమంది ఉగ్రవాదులు దాక్కొన్న అవకాశం ఉండటంతో సెర్చ్ ఆపరేషన్ కొనసాగుతున్నట్లు అధికారులు తెలిపారు. ఈ ఆపరేషన్‌తో కిష్త్వార్ జిల్లాలో భద్రతా పరిస్థితులు మరింత మెరుగవుతాయని భావిస్తున్నారు. భద్రతా బలగాల ఈ విజయం నేపథ్యంలో స్థానికుల్లో ఉత్సాహం నెలకొంది.