VRO: తెలంగాణలో మళ్లీ VRO వ్యవస్థ.. సంక్రాంతి లోపే వీఆర్వోల నియామకం.. మంత్రి పొంగులేటి కీలక ప్రకటన
ఈ వార్తాకథనం ఏంటి
తెలంగాణలో గత బీఆర్ఎస్ ప్రభుత్వం వీఆర్వో వ్యవస్థను రద్దు చేసిన విషయం తెలిసిందే.
అప్పట్లో సీఎం కేసీఆర్, రెవెన్యూ డిపార్ట్‌మెంట్‌లో అవినీతి ఎక్కువగా వీఆర్వో వ్యవస్థ ద్వారా జరుగుతున్నదని భావించి, వీఆర్వో వ్యవస్థను రద్దు చేయాలని నిర్ణయించారు.
వీఆర్వోలుగా పనిచేసిన అధికారులను వివిధ ఇతర డిపార్ట్‌మెంట్లలో సర్దుబాటు చేశారు.
అప్పట్లో ఈ నిర్ణయానికి ఉద్యోగులు వ్యతిరేకత వ్యక్తం చేసినప్పటికీ, కేసీఆర్ ప్రభుత్వం తన నిర్ణయాన్ని మార్చుకోలేదు.
వివరాలు
పబ్లిక్ సర్వీస్ కమిషన్ ద్వారా ఎంపికైన వీఆర్వోలకు నేరుగా బాధ్యతలు
ఇప్పుడు, తెలంగాణలో మళ్లీ వీఆర్వో వ్యవస్థను పునరుద్ధరించాలనే నిర్ణయాన్ని రేవంత్ ప్రభుత్వం తీసుకుంది.
వీఆర్వో వ్యవస్థను పునరుద్ధరిస్తామని మంత్రి పొంగులేటి శ్రీనివాస్ రెడ్డి ప్రకటించారు.
సంక్రాంతి సమయం లోపు ఈ వ్యవస్థను తిరిగి తీసుకురాబోతున్నామని చెప్పారు.
పబ్లిక్ సర్వీస్ కమిషన్ ద్వారా ఎంపికైన వీఆర్వోలకు నేరుగా బాధ్యతలు అప్పగించి, మిగతా వారికి ప్రత్యేక రిక్రూట్‌మెంట్ ద్వారా పరీక్షలు నిర్వహించి నియమిస్తారని సమాచారం.
రాష్ట్రంలో ప్రస్తుతం 3,000 మంది వీఆర్వోలు ఉన్నారు, ఇక మరో 8,000 మందిని రాత పరీక్ష ఆధారంగా నియమిస్తారని తెలిపారు.
10,909 రెవెన్యూ గ్రామాలకు వీఆర్వోలను నియమిస్తారని కూడా తెలిసింది.
వివరాలు
శాసనసభ సమావేశాల్లోనే ఆర్వోఆర్ చట్టానికి ఆమోదం
మాజీ సీఎం కేసీఆర్ అసెంబ్లీకి వచ్చి, ప్రభుత్వం అమలు చేయబోయే ఆర్వోఆర్ చట్టంపై సూచనలు చేయాలని మంత్రి పొంగులేటి కోరారు.
ఈ శాసనసభ సమావేశాల్లోనే ఆర్వోఆర్ చట్టానికి ఆమోదం ఇవ్వాలని చెప్పారు.
గురువారం సెక్రటేరియట్‌లో మీడియాతో మాట్లాడుతూ, ధర్నాచౌక్‌ను పునరుద్ధరించామని తెలిపారు.
నిరసన తెలియజేయాలనుకునే వారిని అడ్డుకోబోమని స్పష్టం చేశారు. ఈ నెలాఖరులోగా వసతి గృహాలకు పెండింగ్‌లో ఉన్న బకాయిల సొమ్ములను విడుదల చేస్తామని చెప్పారు.
ఇంకా, ఖాళీగా ఉన్న మంత్రి పదవులను భర్తీ చేస్తామని, డిసెంబర్ 31 లోపు మంత్రివర్గ విస్తరణ ఉంటుందని వెల్లడించారు.
వివరాలు
ఇందిరమ్మ ఇళ్ల యాప్‌లో 10 కొత్త అంశాలు
పేదల సొంతింటి కలను సాకారం చేసేందుకు, ఇందిరమ్మ ఇండ్ల పథకం అమలు చేస్తున్నామని పేర్కొన్నారు.
ఇందిరమ్మ ఇళ్ల యాప్‌లో 10 కొత్త అంశాలు చేర్చామని, సర్వే అధికారులు పైరవీలు చేసే అవకాశాన్ని అడ్డుకునే అన్ని చర్యలను తీసుకుంటున్నామని చెప్పారు.
ఇప్పటివరకు 2.32 లక్షల దరఖాస్తులను ఇందిరమ్మ ఇళ్ల యాప్‌లో నమోదు చేసినట్లు తెలిపారు.
అర్హులైన లబ్ధిదారులకు మాత్రమే ఇళ్లను మంజూరు చేయాలని, ఐటీడీఏ పరిధిలో ఇళ్ల కోసం ప్రత్యేక నిధులు కేటాయించనున్నట్లు చెప్పారు.