Rain: వానల కోసం ఎదురుచూపులు.. రాష్ట్రంలో 462 మండలాల్లో లోటు వర్షపాతం

వ్రాసిన వారు Sirish Praharaju

Jul 20, 2026

11:39 am

ఈ వార్తాకథనం ఏంటి

తెలంగాణలో వానాకాలం ప్రారంభమై దాదాపు 50 రోజులు పూర్తవుతున్నా ఆశించిన స్థాయిలో వర్షాలు కురవడం లేదు. చేలు బీడుగా మారుతుండగా,ఎండిపోయిన చెరువులు నీటి కోసం ఎదురుచూస్తున్నాయి. నేలలో తేమ లేకపోవడంతో రైతులు నాటిన విత్తనాలు మొలకెత్తక ముందే మాడిపోతున్నాయి. మొలకలు వచ్చిన చోట్ల కూడా తేమ కొరత కారణంగా అవి నిలబడలేక ఎండిపోతున్న పరిస్థితి నెలకొంది. వాతావరణ శాఖ గణాంకాల ప్రకారం జూన్ 1 నుంచి జులై 19 వరకు రాష్ట్రంలో సగటున 254.3 మిల్లీమీటర్ల వర్షపాతం నమోదు కావాల్సి ఉండగా,కేవలం 170.7మిల్లీమీటర్లే కురిశాయి. దీంతో మొత్తం 33శాతం వర్షపాతం లోటు నమోదైంది. రాష్ట్రంలోని 462మండలాల్లో లోటు వర్షపాతం కొనసాగుతుండగా, 133మండలాల్లో మాత్రమే సాధారణ స్థాయిలో వర్షాలు నమోదయ్యాయి.

వివరాలు

ములుగు మినహా అన్ని జిల్లాల్లో వర్షపాతం సాధారణం కంటే తక్కువ

మరో 78 మండలాల్లో ఇప్పటివరకు ఒక్క చుక్క వాన కూడా పడకపోవడం పరిస్థితి తీవ్రతను తెలియజేస్తోంది.

జిల్లాల వారీగా పరిశీలిస్తే ములుగు మినహా అన్ని జిల్లాల్లో వర్షపాతం సాధారణం కంటే తక్కువగా నమోదైంది.

ములుగు జిల్లాలో మాత్రం సాధారణంగా కురవాల్సిన 343.2 మిల్లీమీటర్లకు బదులుగా 350 మిల్లీమీటర్ల వర్షం కురవడంతో రెండు శాతం అధిక వర్షపాతం నమోదైంది.

గత ఏడాది ఇదే సమయానికి, అంటే జులై 19 నాటికి రాష్ట్రంలో 204.3 మిల్లీమీటర్ల వర్షపాతం నమోదై 13 శాతం లోటు మాత్రమే ఉండగా, ఈ ఏడాది పరిస్థితి మరింత దిగజారింది.

వివరాలు

జులైలోనే భారీ లోటు

నైరుతి రుతుపవనాల ప్రభావంతో సాధారణంగా జులై నెలలోనే అత్యధిక వర్షాలు కురుస్తాయి. కానీ ఈసారి ఆ అంచనాలు తారుమారయ్యాయి.

రాష్ట్ర వార్షిక సాధారణ వర్షపాతం 923.8 మిల్లీమీటర్లు కాగా, వానాకాలమైన జూన్ నుంచి సెప్టెంబరు వరకు 740.6 మిల్లీమీటర్ల వర్షం కురవాల్సి ఉంటుంది.

జూన్ నెలలో సాధారణంగా 130.3 మిల్లీమీటర్ల వర్షపాతం నమోదవ్వాల్సి ఉండగా, ఈసారి 115.3 మిల్లీమీటర్లే కురవడంతో 12 శాతం లోటు నమోదైంది.

జులైలో 227.4 మిల్లీమీటర్ల వర్షపాతం రావాల్సి ఉండగా, 19వ తేదీ నాటికి కేవలం 61.5 మిల్లీమీటర్లే నమోదై 53 శాతం లోటు కనిపించింది.

ఇక ఆగస్టులో 215.8 మిల్లీమీటర్లు, సెప్టెంబరులో 167.1 మిల్లీమీటర్ల సాధారణ వర్షపాతం నమోదవాల్సి ఉంది.

వివరాలు

కేవలం 24 రోజులే వర్షాలు

జూన్ ప్రారంభం నుంచి జులై 19 వరకు రాష్ట్రంలో కేవలం 24 రోజులే వర్షపు దినాలు నమోదయ్యాయని వాతావరణ శాఖ తెలిపింది.

వర్షాలు కురిసే రోజుల మధ్య విరామం(డ్రై స్పెల్)ఎక్కువగా ఉండటం వల్ల నేలలో తేమ నిలవక వ్యవసాయంపై తీవ్ర ప్రభావం పడుతోంది.

జోగులాంబ గద్వాల జిల్లాలో అత్యల్పంగా కేవలం ఎనిమిది రోజులే వర్షాలు కురిశాయి.

రాజధాని హైదరాబాద్‌లో కూడా పరిస్థితి భిన్నంగా లేదు.అక్కడ సాధారణంగా 209.6మిల్లీమీటర్ల వర్షపాతం నమోదవ్వాల్సి ఉండగా, 121.8 మిల్లీమీటర్లే కురవడంతో 42 శాతం లోటు నమోదైంది.

వర్షాల కొరత కొనసాగుతుండటంతో ఖరీఫ్ సాగుపై రైతుల్లో తీవ్ర ఆందోళన నెలకొంది.

రానున్న రోజుల్లో నైరుతి రుతుపవనాలు చురుకుగా మారి రాష్ట్రవ్యాప్తంగా విస్తృతంగా వర్షాలు కురవాలని రైతులు ఆశగా ఎదురుచూస్తున్నారు.