దేశంలో కొత్తగా 1,500పైగా కరోనా కేసులు; 146రోజుల గరిష్ఠానికి వైరస్ బాధితులు
భారతదేశంలో గత 24గంటల్లో 1,500పైగా కోవిడ్ కేసులు నమోదయ్యాయి. 146 రోజుల తర్వాత ఈ స్థాయిలో కేసులు నమోదు కావడం ఇదే మొదటిసారి అని కేంద్ర ఆరోగ్య మంత్రిత్వ శాఖ తెలిపింది. దేశంలో కొత్త కేసులు 1,590 నమోదు కాగా, గత 24 గంటల్లో 910 రికవరీలు నమోదయ్యాయని కేంద్ర ఆరోగ్య మంత్రిత్వ శాఖ తెలిపింది. దేశంలో యాక్టివ్ కేసులు 8,601 ఉన్నట్లు నివేదికలు చెబుతున్నాయి. దేశంలో కరోనాతో తాజాగా ఆరుగురు మరణించినట్లు ఆరోగ్య మంత్రిత్వ శాఖ తెలిపింది. కొత్త మరణాలతో దేశంలో కరోనా మృతుల సంఖ్య 5,30,824కి పెరిగినట్లు కేంద్రం వెల్లడించింది.
జాతీయ కోవిడ్ రికవరీ రేటు 98.79 శాతం
తాజాగా మరణించిన ఆరుగురిలో మహారాష్ట్ర నుంచి ముగ్గురు, కర్ణాటక, రాజస్థాన్, ఉత్తరాఖండ్‌ నుంచి ఒక్కరు చొప్పున మరణించినట్లు కేంద్రం పేర్కొంది. అదే సమయంలో రోజువారీ పాజిటివిటీ రేటు 1.33 శాతంగా నమోదు కాగా, వారంవారీగా 1.23 శాతంగా ఉన్నట్లు కేంద్రం తెలిపింది. దేశంలో ఇప్పటికి వరకు నమోదైన కేసుల సంఖ్య 4,47,02,257కి పెరిగింది. ఇందులో ప్రస్తుతం క్రియాశీల కేసులు 0.02 శాతంగా ఉన్నాయి. జాతీయ కోవిడ్ రికవరీ రేటు 98.79 శాతంగా నమోదైంది. రికవరీలు 4,41,62,832కి పెరిగినట్లు కేంద్రం డేటా చెబుతోంది. కరోనా మరణాల రేటు 1.19 శాతంగా నమోదైంది. ఇప్పటివరకు దేశంలో 220.65 కోట్ల డోస్‌ల వ్యాక్సిన్‌లను అందించినట్లు ఆరోగ్య మంత్రిత్వ శాఖ తెలిపింది.
