Dropout Student In India: ఉన్నత విద్యకు చేరకముందే 73 శాతం మంది డ్రాప్అవుట్.. పార్లమెంటరీ కమిటీ ఆందోళన
ఈ వార్తాకథనం ఏంటి
దేశంలో విద్యార్థుల చదువు మధ్యలోనే నిలిచిపోతున్న పరిస్థితిపై పార్లమెంటరీ కమిటీ తీవ్ర ఆందోళన వ్యక్తం చేసింది. పాఠశాల విద్యలో ప్రాథమిక స్థాయి నుంచి పై తరగతులకు వెళ్లే కొద్దీ పాఠశాలల సంఖ్యతో పాటు విద్యార్థుల నమోదులోనూ భారీగా తగ్గుదల కనిపిస్తోందని పేర్కొంది. హయ్యర్ సెకండరీ విద్యను పూర్తి చేయకముందే దాదాపు 73శాతం మంది విద్యార్థులు చదువుకు దూరమవుతున్నారని వెల్లడించింది. దేశంలో అందుబాటులో ఉన్న నాణ్యమైన,అందరికీ అందుబాటులో ఉండే విద్యకు సంబంధించిన బడ్జెట్,విధానపరమైన అంశాలను పరిశీలించిన అంచనాల కమిటీ.. 2026-27 సంవత్సరానికి సంబంధించిన 10వ నివేదికను లోక్సభకు సమర్పించింది. ఈ నివేదికలో పాఠశాలల సంఖ్య, విద్యార్థుల నమోదు, డ్రాప్అవుట్ పరిస్థితి, మౌలిక వసతులు, దివ్యాంగ విద్యార్థులకు అందుతున్న సౌకర్యాలు తదితర అంశాలను కమిటీ వివరించింది.
వివరాలు
ప్రాథమికం నుంచి హయ్యర్ సెకండరీ వరకు భారీ తగ్గుదల
యూనిఫైడ్ డిస్ట్రిక్ట్ ఇన్ఫర్మేషన్ సిస్టమ్ ఫర్ ఎడ్యుకేషన్ (యూడైస్) 2024-25 గణాంకాలను కమిటీ పరిశీలించింది.
దేశవ్యాప్తంగా 10,92,671 ప్రభుత్వ, ఎయిడెడ్ పాఠశాలలు ఉన్నట్లు తెలిపింది.
వీటిలో ప్రాథమిక స్థాయిలో 9,11,032 పాఠశాలలు ఉన్నాయి. 6 నుంచి 8 తరగతులకు 4,12,805 పాఠశాలలు ఉండగా.. సెకండరీ స్థాయికి వచ్చేసరికి వాటి సంఖ్య 1,61,808కి తగ్గిపోయింది.
హయ్యర్ సెకండరీ స్థాయిలో కేవలం 90,866 పాఠశాలలు మాత్రమే ఉన్నాయని కమిటీ పేర్కొంది.
ప్రాథమిక స్థాయి తర్వాత పై తరగతులకు వెళ్లే విద్యార్థులకు సరిపడా పాఠశాలలు అందుబాటులో లేకపోవడం కూడా డ్రాప్అవుట్కు ఒక కారణంగా ఉండొచ్చని కమిటీ అభిప్రాయపడింది.
విద్యార్థులు తదుపరి స్థాయికి చేరుకునే కొద్దీ పాఠశాలల సంఖ్య గణనీయంగా తగ్గిపోవడం విద్య కొనసాగింపుపై ప్రభావం చూపుతోందని పేర్కొంది.
వివరాలు
విద్యార్థుల నమోదులోనూ భారీ వ్యత్యాసం
పాఠశాలల సంఖ్యలో కనిపిస్తున్న తగ్గుదల విద్యార్థుల విషయంలోనూ స్పష్టంగా కనిపిస్తోందని కమిటీ తెలిపింది.
దేశవ్యాప్తంగా ప్రాథమిక తరగతుల్లో 6.18 కోట్లకు పైగా విద్యార్థులు ఉన్నారు. 6 నుంచి 8 తరగతులకు వచ్చేసరికి ఈ సంఖ్య 4.08 కోట్లకు పడిపోయింది.
సెకండరీ స్థాయిలో 2.36 కోట్లకు, హయ్యర్ సెకండరీ స్థాయిలో 1.64 కోట్లకు తగ్గింది.
ఈ గణాంకాలను పరిశీలిస్తే.. దాదాపు 73 శాతం మంది విద్యార్థులు హయ్యర్ సెకండరీ విద్యను పూర్తి చేయకముందే చదువుకు దూరమవుతున్న పరిస్థితి కనిపిస్తోందని కమిటీ పేర్కొంది.
విద్యార్థులు మధ్యలోనే చదువు ఆపకుండా ఉండేందుకు ఉన్నత పాఠశాలల సంఖ్యను పెంచాల్సిన అవసరం ఉందని స్పష్టం చేసింది.
వివరాలు
పాఠశాలలను దశలవారీగా అప్గ్రేడ్ చేయాలి
ప్రస్తుతం ఉన్న ప్రాథమిక, సెకండరీ పాఠశాలలను దశలవారీగా హయ్యర్ సెకండరీ స్థాయికి అప్గ్రేడ్ చేయాలని పార్లమెంటరీ కమిటీ కేంద్ర విద్యాశాఖను కోరింది.
ప్రతి వర్గానికి చెందిన విద్యార్థులకు తమ నివాస ప్రాంతానికి సమీపంలోనే హైస్కూల్ అందుబాటులో ఉండేలా చర్యలు తీసుకోవాలని సూచించింది.
విద్య ఉమ్మడి జాబితాలో ఉన్న అంశమని కమిటీ గుర్తుచేసింది.
అందువల్ల పాఠశాల విద్యకు సంబంధించిన బాధ్యతల్లో రాష్ట్రాలు, కేంద్రపాలిత ప్రాంతాల పాత్ర కూడా కీలకమని పేర్కొంది.
దేశవ్యాప్తంగా ప్రతి రాష్ట్రం, కేంద్రపాలిత ప్రాంతంలో సెకండరీ, హయ్యర్ సెకండరీ పాఠశాలల సంఖ్యను పెంచేందుకు కేంద్రం చొరవ తీసుకోవాలని సూచించింది.
వివరాలు
దివ్యాంగ విద్యార్థులకు సౌకర్యాల కొరత
దివ్యాంగ విద్యార్థులకు అనుకూలమైన మౌలిక వసతుల విషయంలోనూ పరిస్థితి ఆందోళనకరంగా ఉందని కమిటీ తెలిపింది.
దేశంలోని సగానికి పైగా పాఠశాలల్లో దివ్యాంగ విద్యార్థులకు అవసరమైన సౌకర్యాలు పూర్తిస్థాయిలో అందుబాటులో లేవని పేర్కొంది.
యూడైస్+ 2024-25 గణాంకాల ప్రకారం దేశంలో మొత్తం 14,71,437 పాఠశాలలు ఉన్నాయి.
వీటిలో కేవలం 5,23,143 పాఠశాలల్లోనే ప్రత్యేక అవసరాలున్న పిల్లలకు అనుకూలంగా ఉండే మరుగుదొడ్లు ఉన్నాయి.
మరోవైపు 8,08,466 పాఠశాలల్లో మాత్రమే ర్యాంపులు, హ్యాండ్రైల్స్ వంటి సౌకర్యాలు అందుబాటులో ఉన్నాయని కమిటీ వెల్లడించింది.
వివరాలు
దివ్యాంగ విద్యార్థులకు సౌకర్యాల కొరత
దివ్యాంగ విద్యార్థులు పాఠశాలలోకి సురక్షితంగా ప్రవేశించడంతో పాటు తరగతి గదుల్లో పూర్తిస్థాయిలో పాల్గొనేందుకు ర్యాంపులు, హ్యాండ్రైల్స్, అందుబాటులో ఉండే మరుగుదొడ్లు వంటి వసతులను సమగ్ర శిక్ష పథకం ద్వారా కల్పిస్తున్నట్లు కమిటీ గుర్తించింది.
అయితే ఈ చర్యలు ఉన్నప్పటికీ క్షేత్రస్థాయిలో మౌలిక వసతుల విషయంలో ఇంకా భారీ లోటు కొనసాగుతోందని అభిప్రాయపడింది.
వివరాలు
నిధుల వినియోగంపై కమిటీ ప్రశ్నలు
దివ్యాంగ విద్యార్థుల కోసం చేపడుతున్న మౌలిక వసతుల పనులకు కేటాయించిన నిధుల వినియోగంపైనా పార్లమెంటరీ కమిటీ ప్రశ్నలు లేవనెత్తింది.
2024-25లో ప్రత్యేక అవసరాలున్న పిల్లలకు అనుకూలంగా 186 మరుగుదొడ్లు నిర్మించేందుకు రూ.482 లక్షలు కేటాయించినప్పటికీ.. వాస్తవంగా కేవలం రూ.2.60 లక్షలు మాత్రమే ఖర్చు చేసినట్లు పేర్కొంది.
నిర్దేశించిన భౌతిక లక్ష్యాల సాధనలోనూ గణనీయమైన పురోగతి కనిపించలేదని తెలిపింది.
కొత్త ప్రత్యేక విద్యా బోధకుల నియామకానికి కేటాయించిన నిధుల వినియోగం కూడా తక్కువగానే ఉందని కమిటీ వెల్లడించింది.
ప్రాథమిక విభాగంలో ప్రత్యేక విద్యా బోధకుల కోసం రూ.962 లక్షలు మంజూరు చేయగా.. అందులో కేవలం రూ.80.50 లక్షలు మాత్రమే ఖర్చు చేసినట్లు పేర్కొంది.
వివరాలు
హక్కుల ఆధారిత, సమ్మిళిత విద్య అవసరం
దివ్యాంగ పిల్లలకు విద్యను అందించే విషయంలో కేంద్ర విద్యాశాఖ అనుసరిస్తున్న విధానం హక్కుల ఆధారితంగా, సమ్మిళితంగా, సమగ్రంగా ఉందని పార్లమెంటరీ కమిటీ పేర్కొంది.
అయితే విధానాల అమలు క్షేత్రస్థాయిలోనూ సమర్థంగా జరిగేలా చూడాల్సిన అవసరం ఉందని స్పష్టం చేసింది.
విద్యార్థులు చదువును మధ్యలోనే ఆపకుండా ఉండేందుకు పాఠశాలల అందుబాటు, మౌలిక వసతులు, దివ్యాంగ విద్యార్థులకు అవసరమైన సౌకర్యాలు, నిధుల సమర్థ వినియోగంపై మరింత దృష్టి పెట్టాలని సూచించింది.