Trump: యుద్ధం వద్దు.. ఒప్పందం వద్దు.. ఇరాన్‌ను లొంగదీసేందుకు ట్రంప్ కొత్త ప్లాన్
ఈ వార్తాకథనం ఏంటి
ఇరాన్ విషయంలో అమెరికా అధ్యక్షుడు డొనాల్డ్ ట్రంప్ మరో కీలక వ్యూహాన్ని అమలు చేయాలని నిర్ణయించారు. ఆ దేశంపై కొత్తగా సైనిక దాడులు చేయకుండానే,అదే సమయంలో అమెరికాకు అనుకూలంగా లేని శాంతి ఒప్పందానికి అంగీకరించకుండా మధ్యేమార్గాన్ని ఎంచుకున్నారు. ఇరాన్‌పై ఆర్థిక ఒత్తిడిని మరింత పెంచడమే తమ తదుపరి కార్యాచరణగా స్పష్టం చేశారు. జీ7 దేశాల విదేశాంగ మంత్రుల సమావేశంలో అమెరికా విదేశాంగ మంత్రి మార్కో రూబియో ఈ వ్యూహానికి సంబంధించిన వివరాలను వెల్లడించారు. ఇరాన్ విషయంలో అధ్యక్షుడు ట్రంప్ ముందు యుద్ధం చేయడం,లేదంటే బలహీనమైన ఒప్పందానికి అంగీకరించడం అనే రెండు మార్గాలే లేవని ఆయన పేర్కొన్నారు. అర్థంలేని ఒప్పందం చేసుకునే ప్రసక్తే లేదని,ప్రస్తుతం అనుసరిస్తున్న విధానాన్ని కొనసాగించడమే మూడో మార్గమని స్పష్టం చేశారు.
వివరాలు
నావికా దిగ్బంధనంతో పాటు 'ఐరన్ గేట్' ఆపరేషన్ చేపట్టనున్నట్లు వెల్లడి
ఈ వ్యూహంలో భాగంగా ఇరాన్ ఆర్థిక వ్యవస్థను మరింత బలహీనపరచాలని అమెరికా భావిస్తోంది.
ప్రపంచవ్యాప్తంగా కార్యకలాపాలు సాగిస్తున్న సాయుధ గ్రూపులకు ఇరాన్ నుంచి నిధులు అందకుండా అడ్డుకోవడం, ఆ దేశ సైనిక సామర్థ్యాన్ని దెబ్బతీయడం కూడా అమెరికా లక్ష్యాల్లో ఉన్నాయి.
సోమవారం ఖతార్ ప్రధానితో సమావేశమైన అనంతరం ట్రంప్ మీడియాతో మాట్లాడారు.
ఇరాన్‌పై మరోసారి సైనిక దాడులు జరిగే అవకాశం చాలా తక్కువగా ఉందని తెలిపారు.
అయితే, ఇప్పటికే అమలు చేస్తున్న ఆర్థిక ఆంక్షలు, నావికా దిగ్బంధనాన్ని మాత్రం కొనసాగిస్తామని స్పష్టం చేశారు.
అంతేకాకుండా ఇరాన్‌కు ఆయుధాలు, సాంకేతిక పరిజ్ఞానం చేరకుండా భూ మార్గాలను మూసివేసేందుకు 'ఐరన్ గేట్' పేరుతో కొత్త ఆపరేషన్ చేపట్టనున్నట్లు వెల్లడించారు.
వివరాలు
ఆందోళన వ్యక్తం చేస్తున్న మిత్రదేశాలు
ట్రంప్ అనుసరిస్తున్న ఈ వ్యూహానికి అమెరికా ప్రభుత్వంలోని పలువురు కీలక అధికారులు మద్దతు పలుకుతున్నారు.
విదేశాంగ మంత్రి మార్కో రూబియో, ట్రెజరీ సెక్రటరీ స్కాట్ బెసెంట్, సీఐఏ డైరెక్టర్ జాన్ రాట్‌క్లిఫ్, ట్రంప్ సలహాదారు జారెడ్ కుష్నర్ ఈ నిర్ణయానికి మద్దతు తెలిపిన వారిలో ఉన్నారు.
అయితే, ఇరాన్‌పై అమెరికా అనుసరిస్తున్న కఠిన వైఖరిపై కొన్ని మిత్రదేశాలు ఆందోళన వ్యక్తం చేస్తున్నాయి.
వివరాలు
ఆర్థిక, సైనిక ఒత్తిడిని కొనసాగించడం సరైన విధానం కాదు
టర్కీ, ఇరాక్, పాకిస్థాన్ వంటి దేశాలు ఈ విషయంలో తమ అభిప్రాయాలను వెల్లడిస్తున్నాయి.
శాంతి చర్చల ద్వారా సమస్యను పరిష్కరించుకునే ప్రయత్నం చేయకుండా ఆర్థిక, సైనిక ఒత్తిడిని కొనసాగించడం సరైన విధానం కాదని అవి భావిస్తున్నాయి.
మరోవైపు అమెరికా తన నావికా దిగ్బంధనాన్ని కొనసాగిస్తుండగా, ఇరాన్ మాత్రం తమ షరతులకు అనుగుణంగానే ఒప్పందం జరగాలని పట్టుబడుతోంది.
ఇరాన్ ప్రతిపాదనలు ఆమోదయోగ్యంగా లేవని అమెరికా తేల్చిచెబుతోంది. దీంతో ఇరు దేశాల మధ్య చర్చలకు అవకాశం తగ్గి, ప్రతిష్టంభన కొనసాగుతోంది.