ఏ తప్పూ చేయలేదు, ఈడీ విచారణను ఎదుర్కొంటా: బీఆర్‌ఎస్ ఎమ్మెల్సీ కవిత
ఈ వార్తాకథనం ఏంటి
ఎన్నికలు ఉన్న చోట మోదీ కంటే ముందే ఈడీ చేరిపోతుందని బీఆర్‌ఎస్ ఎమ్మెల్సీ కవిత విమర్శించారు. ఎన్నికలు దగ్గర పడుతున్నందున తెలంగాణలో కూడా కేంద్ర ఏజెన్సీలు దాడులు చేస్తున్నాయని ఆరోపించారు. గురువారం దిల్లీలో ఏర్పాటు చేసిన విలేకరుల సమావేశంలో ఆమె మాట్లాడారు.
దిల్లీ మద్యం కేసులో కల్వకుంట కవితకు బుధవారం ఈడీ నోటీసులు జారీ చేసింది. తొలుత ఈడీ మార్చి 9న కవితను విచారణకు పిలిచింది. అయితే 16వ తేదీన వస్తానని కవిత రిప్లే ఇచ్చింది. కానీ ఈడీ అధికారులు ఎందుకు తొందర పడుతున్నారో తెలియదు కానీ, మార్చి 11న విచారణకు అంగీకరించారని కవిత వెల్లడించారు.
తాము ఎలాంటి తప్పు చేయలేదని, ఎన్‌ఫోర్స్‌మెంట్ డైరెక్టరేట్‌విచారణను ఎదుర్కొంటామని కవిత పేర్కొన్నారు.
కవిత
మహిళా రిజర్వేషన్ బిల్లుపై రేపు ధర్నా: కవిత
మహిళా రిజర్వేషన్ బిల్లుపై శుక్రవారం ధర్నా చేపట్టనున్నట్లు కవిత తెలిపారు. దిల్లీలో నిరాహారదీక్షపై మార్చి 2న పోస్టర్‌ను విడుదల చేసినట్లు చెప్పారు. 18 పార్టీలకు చెందిన ప్రతినిధులు నిరాహార దీక్షలో పాల్గొననున్నట్లు కవిత వెల్లడించారు.
మహిళా రిజర్వేషన్ బిల్లు ఆమోదం పొందేలా చూడాలని రాష్ట్రపతి ద్రౌపది ముర్ముని కవిత అభ్యర్థించారు. మహిళా రిజర్వేషన్ బిల్లును రాజ్యసభలో ప్రవేశపెట్టిన యూపీఏ ఛైర్ పర్సన్ సోనియా గాంధీకి సెల్యూట్ చేస్తున్నట్లు చెప్పారు.
అలాగే పార్లమెంట్‌లో మహిళల ప్రాతినిధ్య 14శాతం మాత్రమేనని, అదే పాకిస్థాన్‌లో అయితే 17శాతం ఉన్నారని పేర్కొన్నారు.
మహిళా రిజర్వేషన్ బిల్లు సాధనకు చేస్తున్న ధర్నాకు మద్దతు తెలిపిన ప్రతి ఒక్కరికి కవిత కృతజ్ఞతలు తెలిపారు.