Andhra Pradesh :ఏపీలో పాక్‌ హనీట్రాప్‌ కలకలం.. నేవీ ఉద్యోగి సహా ఇద్దరి అరెస్ట్
ఈ వార్తాకథనం ఏంటి
దేశ రక్షణ వ్యవస్థకు సంబంధించిన కీలక సమాచారాన్ని లక్ష్యంగా చేసుకుని పాకిస్థాన్‌ నిఘా సంస్థలు సాగిస్తున్న గూఢచర్య కార్యకలాపాలు మరోసారి వెలుగులోకి వచ్చాయి. సోషల్‌ మీడియాలో అందమైన యువతుల పేర్లతో నకిలీ ఖాతాలను సృష్టించి.. భారత రక్షణ రంగ ఉద్యోగులను హనీట్రాప్‌లోకి దింపుతున్న పాక్‌ ఏజెంట్ల నెట్‌వర్క్‌ను ఆంధ్రప్రదేశ్‌ కౌంటర్‌ ఇంటెలిజెన్స్‌ (సీఐసీ) అధికారులు ఛేదించారు. ఈ ఉచ్చులో చిక్కుకుని దేశ భద్రతకు సంబంధించిన సమాచారాన్ని చేరవేశారనే ఆరోపణలపై భారత నావికాదళ ఉద్యోగితో పాటు మరో వ్యక్తిని అరెస్ట్ చేశారు.
వివరాలు
'ఆపరేషన్ ఫైర్‌వాల్‌-2026'తో భారీ సోదాలు
విశాఖపట్నంలోని నావికాదళ కేంద్రాన్ని కేంద్రంగా చేసుకుని సాగుతున్న గూఢచర్య కార్యకలాపాలపై దృష్టి సారించిన కౌంటర్‌ ఇంటెలిజెన్స్‌ అధికారులు.. అక్టోబర్‌ 1న 'ఆపరేషన్ ఫైర్‌వాల్‌-2026' చేపట్టారు.
ఆంధ్రప్రదేశ్‌తో పాటు కేరళ, మహారాష్ట్ర, కర్ణాటక, గుజరాత్‌, గోవా, ఢిల్లీ, తమిళనాడు, ఛత్తీస్‌గఢ్‌, బిహార్‌ సహా 10 రాష్ట్రాలు, కేంద్రపాలిత ప్రాంతాల్లో 12 ప్రత్యేక బృందాలు ఏకకాలంలో సోదాలు నిర్వహించాయి.
ఈ ఆపరేషన్‌లో ఆయా రాష్ట్రాల ఉగ్రవాద నిరోధక దళాలు (ఏటీఎస్‌), నేవీ అధికారులు, స్థానిక పోలీసులు కూడా పాల్గొన్నారు.
మొత్తం 18 మంది అనుమానితుల పాత్రపై అధికారులు విచారణ జరిపారు. వారి నుంచి పలు ఎలక్ట్రానిక్‌ పరికరాలను స్వాధీనం చేసుకున్నారు.
వివరాలు
ఇద్దరిని అరెస్ట్ చేసిన సీఐసీ
విశాఖపట్నం నావల్‌ బేస్‌లో విధులు నిర్వహిస్తున్న నేవీ ఉద్యోగి ప్రదీప్‌ ముఖర్జీతో పాటు నావికాదళంలో కాంట్రాక్ట్‌ డ్రైవర్‌గా పనిచేస్తున్న అన్నం సాయి వరప్రసాద్‌ను సీఐసీ పోలీసులు అరెస్ట్ చేశారు.
విశాఖపట్నంలో పట్టుబడిన సాయి వరప్రసాద్‌.. రక్షణ రంగానికి సంబంధించిన అత్యంత సున్నితమైన సమాచారాన్ని పాక్‌ ఏజెంట్లకు అందించినట్లు దర్యాప్తులో ఆధారాలు లభించాయి.
ఇందుకు ప్రతిఫలంగా అతడు డబ్బులు తీసుకున్నట్లు అధికారులు గుర్తించారు.
మరోవైపు కోయంబత్తూరులో అరెస్టయిన ప్రదీప్‌ ముఖర్జీ.. పాక్‌ ఏజెంట్లకు వాట్సాప్‌ ఖాతా యాక్టివేట్‌ చేసేందుకు అవసరమైన ఓటీపీని షేర్‌ చేసినట్లు తేలింది.
అంతేకాకుండా నేవీకి సంబంధించిన రహస్య సమాచారాన్ని ఎన్‌క్రిప్టెడ్‌ ఛానెళ్ల ద్వారా పాక్‌ ఏజెంట్లకు చేరవేసినట్లు దర్యాప్తులో వెల్లడైంది.
వివరాలు
అధికారిక రహస్యాల చట్టం కింద కేసులు
ఈ వ్యవహారంలో విజయవాడలోని కౌంటర్‌ ఇంటెలిజెన్స్‌ పోలీస్‌ స్టేషన్‌లో సెప్టెంబర్‌ 2న కేసు నమోదైంది.
నిందితులపై అధికారిక రహస్యాల చట్టం (Official Secrets Act)తో పాటు భారతీయ న్యాయ సంహిత (BNS)లోని దేశంపై యుద్ధం ప్రకటించడం, రాజ్యానికి వ్యతిరేకంగా కుట్రలకు పాల్పడటం వంటి తీవ్రమైన అభియోగాలకు సంబంధించిన సెక్షన్ల కింద కేసులు నమోదు చేశారు.
తమిళనాడులో అరెస్టయిన ప్రదీప్‌ ముఖర్జీని ట్రాన్సిట్‌ వారెంట్‌పై విజయవాడకు తీసుకొచ్చారు.
వివరాలు
అధికారిక రహస్యాల చట్టం కింద కేసులు
అనంతరం ఇద్దరు నిందితులను విజయవాడ, విశాఖపట్నంలోని సంబంధిత న్యాయస్థానాల ముందు హాజరుపరిచారు.
వారిని అక్టోబర్‌ 14 వరకు రిమాండ్‌కు తరలించాలని కోర్టు ఆదేశించింది.
ప్రస్తుతం సాయి వరప్రసాద్‌ విశాఖపట్నం జిల్లా జైలులో, ప్రదీప్‌ ముఖర్జీ విజయవాడ జిల్లా జైలులో ఉన్నారు.
ఈ కేసులో మిగిలిన 13 మంది నేవీ సిబ్బంది సహా ఇతర అనుమానితుల పాత్రపైనా నిఘా వర్గాలు దర్యాప్తును ముమ్మరం చేశాయి.