పాత పార్లమెంట్ సెంట్రల్ హాల్కు 'సంవిధాన్‌ సదన్‌' పేరు.. ప్రధాని మోదీ ప్రతిపాదన
పార్లమెంట్ పాత భవనంలోని సెంట్రల్ హాల్‌లో మంగళవారం ప్రధాని నరేంద్ర మోదీ కీలక ప్రసంగం చేశారు. పార్లమెంట్ కొత్త భవనంలోకి లోక్‌సభ, రాజ్యసభ కార్యకలాపాలను ప్రారంభడానికి ముందు ఆయన మాట్లాడారు. 1947లో బ్రిటీష్ వారు సెంట్రల్ హాల్‌లోనే అధికార మార్పిడి చేశారని మోదీ అన్నారు. ఆ చారిత్రాత్మక ఘట్టానికి ఈ సెంట్రల్ హాల్ సాక్షిగా నిలిచిందన్నారు. పాత భవనం గౌరవాన్ని కాపాడేందుకు పాత పార్లమెంట్ హౌస్‌ సెంట్రల్ హాల్కు 'సంవిధాన్‌ సదన్‌(రాజ్యాంగ సభ)'గా నామకరణం చేయాలని ప్రధాని నరేంద్ర మోదీ ప్రతిపాదించారు. రాజ్యాంగ సభను చూసినప్పుడల్లా ఇక్కడ కూర్చున్న మహానుభావుల జ్ఞాపకాలను గుర్తు చేస్తుందన్నారు. తద్వారా అది మన జీవితాలకు స్ఫూర్తిగా మిగిలిపోతుందన్నారు. ఇది భవిష్యత్ తరానికి బహుమతి అవుతుందన్నారు.
పార్లమెంట్ గౌరవం ఎప్పటికీ తగ్గకూడదు: మోదీ
నేడు గణేష్ చతుర్థి రోజున కొత్త ఇంటి(కొత్త పార్లమెంట్ భవనం)కి వెళ్తున్నామని, దాని గౌరవం ఎప్పటికీ తగ్గకూడదని మోదీ సూచించారు. అమృత్ కాల్‌లో అభివృద్ధి చెందిన దేశంగా భారత్ ఎదగాలన్న లక్ష్యంతో కొత్త పార్లమెంటు భవనానికి వెళ్తున్నామన్నారు. ఇప్పటి వరకు లోక్‌సభ, రాజ్యసభలు 4,000 చట్టాలను ఆమోదించాయి. అవసరమైనప్పుడు, బిల్లులను ఆమోదించడానికి వ్యూహాలను రూపొందించడానికి ఈ సెంట్రల్ హాల్‌లోనే ఉమ్మడి సమావేశాలు జరిగాయన్నారు. ట్రిపుల్ తలాక్ చట్టంపై మోదీ మాట్లాడుతూ.. ఈ పార్లమెంట్ వల్ల ముస్లిం తల్లులు, సోదరీమణులకు న్యాయం జరిగిందన్నారు. ట్రిపుల్ తలాక్‌ను వ్యతిరేకించే చట్టం ఇక్కడి నుంచే ఆమోదం పొందిందని అన్నారు. ట్రాన్స్‌జెండర్లకు న్యాయం చేసే చట్టాలను కూడా పార్లమెంట్ ఆమోదించిందన్నారు.
పార్లమెంట్ కొత్త భవనంలో ఎంపీలకు బహుమతులు
భవిష్యత్తు కోసం సరైన సమయంలో సరైన నిర్ణయాలు తీసుకోవాలని మోదీ అన్నారు. కేవలం రాజకీయ ప్రయోజనాల గురించి మాత్రమే ఆలోచించడం వరకే పరిమితం కాలేమన్నారు. చంద్రయాన్-3 విజయం తర్వాత, భారత యువత సైన్స్ అండ్ టెక్నాలజీ రంగం నుండి ప్రేరణ పొందిందన్నారు. ఈ అవకాశాన్ని మనం వదులుకోవలసిన అవసరం లేదన్నారు. తన ప్రసంగం ముగిసిన వెంటనే, ప్రధాని మోదీ, ఎంపీలందరూ పాత భవనం నుంచి కొత్త భవనంలోకి వెళ్లారు. కొత్త పార్లమెంట్ భవనం ప్రారంభం రోజున ఎంపీలందరికీ రాజ్యాంగం కాపీ, పార్లమెంట్‌కు సంబంధించిన పుస్తకాలు, స్మారక నాణెం, స్టాంపుతో కూడిన బహుమతి బ్యాగ్‌ని అందజేశారు.
