Ap news: నవ్యాంధ్ర చరిత్రలో తొలిసారి.. 175 నియోజకవర్గాల్లో ప్రైవేటు పరిశ్రమల పార్కు
ఈ వార్తాకథనం ఏంటి
నవ్యాంధ్రప్రదేశ్ చరిత్రలో తొలిసారిగా ప్రైవేటు పరిశ్రమల పార్కుల అభివృద్ధికి కూటమి ప్రభుత్వం శ్రీకారం చుట్టింది. ఈ పార్కులను అభివృద్ధి చేసే ఔత్సాహికులకు తగిన ప్రోత్సాహకాలు అందించే విధానాన్ని బుధవారం మంత్రిమండలి ఆమోదించింది. ఈ విధానం కింద ఎవరైనా ప్రైవేటు పరిశ్రమల పార్కులను అభివృద్ధి చేయవచ్చు. ప్రభుత్వం తీసుకున్న ఈ నిర్ణయం ప్రకారం, రాష్ట్రంలోని ప్రతీ నియోజకవర్గంలో ఒక ప్రైవేటు పరిశ్రమల పార్కును ఏర్పాటు చేయాలని లక్ష్యంగా పెట్టుకుంది. మొత్తం 175 నియోజకవర్గాల్లో పరిశ్రమల కేంద్రాలు ఏర్పాటవుతాయి. భూమిని కొనుగోలు చేసి పరిశ్రమలను అభివృద్ధి చేయడం సాధ్యం కాని చిన్న పరిశ్రమలకు ఈ ప్రైవేటు పార్కులు దన్నుగా నిలుస్తాయి.
వివరాలు
పాలసీలో ముఖ్యాంశాలు
ఈ పార్కుల్లో పరిశ్రమలకు అవసరమైన మౌలిక సదుపాయాలు కల్పించబడతాయి..అందులో స్టోరేజి, ఉత్పత్తుల స్థలం, రవాణా సదుపాయాలు ప్రధానంగా ఉంటాయి. కేరళ వంటి ఇతర రాష్ట్రాల్లో ఇప్పటికే ఇలాంటి ప్రైవేటు పార్కులు విజయవంతంగా అమలు చేయబడుతున్నాయి. ఈ ప్రైవేటు పార్కులను 100% ప్రైవేటు భూమిలో లేదా పాక్షికంగా ప్రభుత్వ భూమిలో లేదా పూర్తిగా ప్రభుత్వ భూమిలో అభివృద్ధి చేయవచ్చు. చిన్న పరిశ్రమలకు ఈ పార్కులు ప్రోత్సాహకాలు అందిస్తాయి. పార్కును అభివృద్ధి చేసే అభివృద్ధిదారులు సాధారణ మౌలిక సదుపాయాలు కల్పించాలి. రహదారులు, విద్యుత్, నీరు వంటి మౌలిక సదుపాయాలను ప్రభుత్వం అందిస్తుంది.
వివరాలు
వినియోగం ఇలా ఉంటుందని అంచనా
ప్రభుత్వం మూలధన రాయితీ కింద ఎకరానికి రూ.3 లక్షల నుంచి రూ.5 లక్షల వరకు ప్రోత్సాహకాలు అందిస్తుంది. నాలా, లే అవుట్ అప్రూవల్, స్టాంప్, రిజిస్ట్రేషన్ ఛార్జీలు మినహాయింపుగా ఉంటాయి. ఆక్వా, వ్యవసాయ, బయో టెక్నాలజీ, ఎలక్ట్రిక్ వాహనాలు, టెక్స్‌టైల్స్, ఫార్మాస్యూటికల్స్ వంటి అనేక పరిశ్రమల కోసం ఈ పార్కులను వినియోగించనున్నారు.