Revanth Reddy: 2034 నాటికి కోటి మంది మహిళలను కోటీశ్వరులను చేస్తా: రేవంత్ రెడ్డి
ఈ వార్తాకథనం ఏంటి
మహిళా శక్తే నా బలం.. 2034 నాటికి కోటి మంది మహిళలను కోటీశ్వరులుగా తీర్చిదిద్దడమే తమ ప్రభుత్వ లక్ష్యమని తెలంగాణ ముఖ్యమంత్రి రేవంత్ రెడ్డి ప్రకటించారు. మహిళలు ఆర్థికంగా ఎదిగి వ్యాపారవేత్తలు, పారిశ్రామికవేత్తలుగా మారాలని ఆకాంక్షించారు. మహిళా సాధికారతకు తమ ప్రభుత్వం అత్యంత ప్రాధాన్యం ఇస్తోందని స్పష్టం చేశారు. మహిళా స్వయం సహాయక సంఘాల సభ్యులతో నిర్వహించిన ముఖాముఖి కార్యక్రమంలో సీఎం మాట్లాడారు. తన పుట్టినరోజు సందర్భంగా శుభాకాంక్షలు తెలిపేందుకు వచ్చిన మహిళలకు కృతజ్ఞతలు తెలియజేశారు.
వివరాలు
మీరే నా కుటుంబం.. నా ఆత్మబంధువులు!
దీపావళి పండుగ ఉన్నప్పటికీ తనకు జన్మదిన శుభాకాంక్షలు తెలిపేందుకు వచ్చిన మహిళలందరికీ రేవంత్ రెడ్డి ధన్యవాదాలు చెప్పారు.
"మీరే నా కుటుంబం.. మీరే నా ఆత్మబంధువులు. మహిళల ఆశీర్వాదంతోనే నేను ఈ స్థాయికి చేరుకున్నాను. నేను అడిగిన దానికంటే ఎక్కువగా మీరు నాకు ఇచ్చారు. ఇక జీవితంలో నాకు వ్యక్తిగతంగా ఆశించేది ఏమీ లేదు. మీ అందరినీ ఆర్థికంగా ఉన్నత స్థాయికి తీసుకెళ్లడమే నా లక్ష్యం" అని పేర్కొన్నారు.
వివరాలు
కోటి మంది మహిళలను కోటీశ్వరులుగా తీర్చిదిద్దడమే లక్ష్యం!
ప్రస్తుతం తెలంగాణలో సుమారు 70 లక్షల మంది మహిళలు స్వయం సహాయక సంఘాల్లో సభ్యులుగా ఉన్నారని ముఖ్యమంత్రి వెల్లడించారు.
2034 నాటికి ఈ సంఖ్యను కోటికి పెంచాలని లక్ష్యంగా పెట్టుకున్నట్లు తెలిపారు.
సంఘాల్లోని ప్రతి మహిళను కోటీశ్వరురాలిగా తీర్చిదిద్దేందుకు ప్రభుత్వం కృషి చేస్తుందని హామీ ఇచ్చారు.
మహిళలు ఇంటి బాధ్యతలకే పరిమితం కాకుండా సొంతంగా వ్యాపారాలు ప్రారంభించి పారిశ్రామికవేత్తలుగా ఎదగాలని సూచించారు.
వివరాలు
మహిళలకు ఉపాధి అవకాశాలు.. ఆర్థిక స్వావలంబన!
మహిళలు ఆర్థికంగా నిలదొక్కుకునేందుకు ప్రభుత్వం వివిధ రంగాల్లో ఉపాధి అవకాశాలు కల్పిస్తోందని రేవంత్ రెడ్డి వివరించారు.
ప్రభుత్వ పాఠశాలల్లో విద్యార్థుల యూనిఫామ్ కుట్టే పనులను మహిళా స్వయంసహాయక సంఘాలకు అప్పగించినట్లు తెలిపారు.
దీనివల్ల ఏటా రూ.15కోట్ల నుంచి రూ.20కోట్ల వరకు వ్యాపారం చేసుకునే అవకాశం ఏర్పడిందన్నారు.
పెట్రోల్ బంకుల నిర్వహణతో పాటు సోలార్ విద్యుత్ ఉత్పత్తి రంగంలోనూ మహిళలకు భాగస్వామ్యం కల్పించామని చెప్పారు.
సచివాలయం సహా వివిధ ప్రభుత్వ కార్యాలయాల్లో ఇందిరమ్మ క్యాంటీన్ల నిర్వహణ బాధ్యతలను మహిళా సంఘాలకే అప్పగించినట్లు వెల్లడించారు.
గత 34నెలల్లో బ్యాంకు లింకేజీ ద్వారా మహిళలకు రూ.79వేల కోట్ల రుణాలు అందించామని పేర్కొన్నారు.
మహిళల ఆర్థిక అభివృద్ధికి కృషి చేస్తున్న మంత్రి సీతక్కను ఈ సందర్భంగా ప్రత్యేకంగా అభినందించారు.
వివరాలు
మహిళల సంక్షేమానికి పెద్దపీట!
కొత్తగా మంజూరు చేసిన 4.5 లక్షల పెన్షన్లలో 3.5 లక్షలను ఒంటరి మహిళలు, వితంతువులకు కేటాయించినట్లు ముఖ్యమంత్రి తెలిపారు.
నేత, గీత కార్మికులకు కూడా కొత్త పెన్షన్లు సంతృప్తికర స్థాయిలో మంజూరు చేశామని చెప్పారు.
ఇందిరమ్మ ఇళ్లు, 200 యూనిట్ల ఉచిత విద్యుత్, సన్నబియ్యం పంపిణీ వంటి పథకాలు మహిళల కుటుంబాలకు ఎంతో తోడ్పాటునిస్తున్నాయని వివరించారు.
ప్రతిరోజూ 37 లక్షల మంది మహిళలు ఆర్టీసీ బస్సుల్లో ఉచితంగా ప్రయాణిస్తున్నారని తెలిపారు.
మహిళలకు ఉచిత ప్రయాణ సదుపాయం కల్పిస్తూనే ఆర్టీసీకి ప్రభుత్వం అవసరమైన నిధులు చెల్లిస్తోందని చెప్పారు.
ఈ చర్యలతో సంస్థను లాభాల బాటలోకి తీసుకువస్తున్నామని పేర్కొన్నారు.
వివరాలు
కేటీఆర్‌పై సీఎం విమర్శలు!
కార్యక్రమంలో బీఆర్ఎస్ నేత కేటీఆర్‌ను ఉద్దేశించి రేవంత్ రెడ్డి విమర్శలు చేశారు.
సొంత చెల్లెలికే న్యాయం చేయలేని వ్యక్తి మహిళల సంక్షేమం గురించి మాట్లాడుతున్నారని వ్యాఖ్యానించారు.
పదేళ్లపాటు అధికారంలో ఉన్న సమయంలో మహిళల కోసం ఏం చేశారో, వారికి ఎలాంటి ప్రయోజనాలు కల్పించారో ప్రజలు ప్రశ్నించాలని అన్నారు.
వివరాలు
పిల్లల చదువుపై ప్రత్యేక శ్రద్ధ పెట్టాలి!
మహిళలు ఆర్థికంగా ఎదగడంతో పాటు తమ పిల్లల విద్యకు కూడా అధిక ప్రాధాన్యం ఇవ్వాలని ముఖ్యమంత్రి సూచించారు.
తల్లిదండ్రులు పడిన కష్టాలు పిల్లలు పడకుండా చూడాలన్నారు. ముఖ్యంగా ఆడపిల్లలను ఉన్నత చదువులు చదివించాలని కోరారు.
విద్య ద్వారానే వారి జీవితాల్లో మంచి మార్పు వస్తుందని చెప్పారు. "మీరు ఎదుర్కొన్న కష్టాలు మీ పిల్లలకు రాకూడదు.
ఆడబిడ్డలను ఉన్నత చదువులు చదివించండి. చదువే వారి భవిష్యత్తును మారుస్తుంది. మీ పిల్లల చదువులపై మీకు ఎంత శ్రద్ధ ఉందో.. నాకు కూడా అంతే శ్రద్ధ ఉంది" అని రేవంత్ రెడ్డి అన్నారు.
తన పుట్టినరోజు సందర్భంగా మహిళలందరూ తమ పిల్లలకు ఉన్నత విద్య అందిస్తామని మాట ఇవ్వాలని కోరారు.
వివరాలు
మహిళా శక్తే నా శక్తి!
మహిళలు ఆర్థికంగా బలోపేతం కావాలని, సొంత కాళ్లపై నిలబడాలని, వ్యాపారవేత్తలుగా, పారిశ్రామికవేత్తలుగా ఎదగాలని పిలుపునిచ్చారు.
"మీ అన్నగా, మీ తమ్ముడిగా సేవ చేసే అవకాశం దేవుడు నాకు కల్పించాడు. మీ సంతోషమే నా సంతోషం. మీ కోసమే నేను కష్టపడుతున్నాను. నా పుట్టినరోజును మీ మధ్య జరుపుకోవాలనే ఉద్దేశంతో ఇక్కడికి వచ్చాను. ఈ జన్మదినాన్ని నా ఆడబిడ్డలకు అంకితం చేస్తున్నాను. కోటి మంది మహిళలను కోటీశ్వరులుగా తీర్చిదిద్దగలిగితే నా జన్మ ధన్యమవుతుంది" అని రేవంత్ రెడ్డి తన ప్రసంగాన్ని ముగించారు.