Assam: అస్సాంలో రూ.22,000 కోట్ల ఆన్‌లైన్ ట్రేడింగ్ స్కామ్.. ముఖ్యమంత్రి హెచ్చరిక
ఈ వార్తాకథనం ఏంటి
అసోంలో రూ. 22 వేల కోట్ల భారీ కుంభకోణం వెలుగు చూసింది. అసోం రాష్ట్ర పోలీసులు ఈ కుంభకోణం గుట్టు రట్టు చేశారు.
స్టాక్‌మార్కెట్ పెట్టుబడుల పేరుతో ప్రజలను మోసగించిన వారు భారీ మొత్తంలో డబ్బు చోరీ చేశారు.
ఈ కేసులో, దిబ్రూగఢ్‌కు చెందిన 22ఏళ్ల వ్యాపారి విశాల్ ఫుకాన్, గౌహతికి చెందిన స్వప్నిల్ దాస్ అనే ఇద్దరు వ్యక్తులను అరెస్టు చేశారు.
ఈ కుంభకోణంలో మరిన్ని అరెస్టులు జరగవచ్చని పోలీసులు తెలిపారు. ఫుకాన్ తన సంపన్న జీవనశైలిని ఉపయోగించి ప్రజలను ఆకర్షించాడని,60 రోజుల్లో 30 శాతం రాబడి వస్తుందని ప్రజలను మభ్యపెట్టాడని పేర్కొన్నారు.
నాలుగు నకిలీ కంపెనీలను స్థాపించి, అస్సామీ చిత్ర పరిశ్రమలో పెట్టుబడులు పెట్టి, పలు ఆస్తులు సంపాదించాడని గుర్తించారు.
వివరాలు
పరారీలో అస్సామీ కొరియోగ్రాఫర్
దిబ్రూగఢ్‌లోని ఫుకాన్ ఇంటిపై పోలీసులు దాడులు నిర్వహించి, స్కామ్‌కు సంబంధించిన పత్రాలను స్వాధీనం చేసుకున్నారు.
అస్సామీ కొరియోగ్రాఫర్ సుమీ బోరా కోసం కూడా పోలీసులు వెతుకుతున్నారు.
ముఖ్యమంత్రి హిమంత బిస్వా శర్మ ప్రజలను మోసపూరిత ఆన్‌లైన్ స్టాక్ మార్కెట్ పెట్టుబడుల నుండి దూరంగా ఉండాలని కోరారు.
తక్కువ ప్రయత్నంతో డబ్బు రెట్టింపు చేస్తామన్న చేస్తామంటే.. అవన్నీ మోసపూరితమైనవే అని తెలిపారు.
"ఆన్‌లైన్ ట్రేడింగ్ సంస్థల ద్వారా స్టాక్ మార్కెట్‌లో పెట్టుబడులు పెట్టే సరికొత్త వ్యవస్థ లేదని ప్రజలకు తెలియజేయాలని చెప్పాలనుకుంటున్నాను. మోసగాళ్లకు దూరంగా ఉండాలని ప్రజలకు సూచిస్తున్నాను. అక్రమ పెట్టుబడులపై పోలీసులు కేసులు నమోదు చేశారు. రాష్ట్రంలో ఉన్న మొత్తం నెట్‌వర్క్‌ను ఛేదించేందుకు ప్రయత్నిస్తాం" అని సీఎం హిమంత బిశ్వశర్మ పేర్కొన్నారు.