Shehzad Poonawalla: వ్యక్తిగత కారణాలతో బీజేపీకి షెహజాద్ పూనావాలా రాజీనామా
ఈ వార్తాకథనం ఏంటి
భారతీయ జనతా పార్టీ(బీజేపీ)జాతీయ అధికార ప్రతినిధి షెహజాద్ పూనావాలా తన పదవికి రాజీనామా చేసినట్లు రాజకీయ వర్గాల్లో విస్తృతంగా ప్రచారం జరుగుతోంది. వ్యక్తిగతకారణాల దృష్ట్యా ఆయన ఈ నిర్ణయం తీసుకున్నారని,రాజీనామా లేఖను ఇప్పటికే పార్టీ అగ్రనాయకత్వానికి సమర్పించినట్లు విశ్వసనీయ వర్గాలు చెబుతున్నాయి. అయితే ఈ అంశంపై బీజేపీ నుంచి ఇప్పటివరకు ఎలాంటి అధికారిక ప్రకటన వెలువడలేదు. త్వరలోనే దీనిపై స్పష్టత వచ్చే అవకాశం ఉందని సమాచారం. బీజేపీ తరఫున చాలాకాలంగా జాతీయ స్థాయిలో పార్టీ వాణిని బలంగా వినిపిస్తున్న షెహజాద్ పూనావాలా,టెలివిజన్ చర్చలు, ప్రజా వేదికలపై ప్రతిపక్షాలపై ఘాటు విమర్శలు చేస్తూ గుర్తింపు పొందారు. అలాగే ప్రధానమంత్రి నరేంద్ర మోదీకి అత్యంత సన్నిహిత మద్దతుదారుల్లో ఒకరిగా కూడా ఆయనకు ప్రత్యేక గుర్తింపు ఉంది.
వివరాలు
సోషల్ మీడియా బయోలో మార్పులు
రాజీనామా వార్తలు చక్కర్లు కొడుతున్న సమయంలో షెహజాద్ పూనావాలా తన అధికారిక ఎక్స్ (X) ఖాతా బయోలో చేసిన మార్పులు మరింత చర్చకు దారితీశాయి.
తాజాగా సవరించిన బయోలో తాను "నరేంద్ర మోదీకి జీవితాంతం అనుచరుడిని" అని మాత్రమే పేర్కొన్నారు.
అయితే గతంలో ఉన్న బీజేపీ ప్రస్తావనను తొలగించడం రాజకీయ వర్గాల్లో ఆసక్తిని రేకెత్తిస్తోంది.
మరోవైపు, ఆయన ఇన్స్టాగ్రామ్ ఖాతాలో మాత్రం ఇప్పటికీ "బీజేపీ జాతీయ అధికార ప్రతినిధి" అనే వివరాలు యథాతథంగా కనిపిస్తున్నాయి.
ట్విట్టర్ పోస్ట్ చేయండి
షెహజాద్ పూనావాలా తన అధికారిక ఎక్స్ (X) ఖాతా
My updated bio : pic.twitter.com/qGG5s9WMOG
— Shehzad Jai Hind (@Shehzad_Ind) July 30, 2026
వివరాలు
కాంగ్రెస్తో ప్రారంభమైన రాజకీయ ప్రస్థానం
వృత్తిరీత్యా న్యాయవాది, పౌర హక్కుల ఉద్యమకర్త అయిన షెహజాద్ పూనావాలా తన రాజకీయ ప్రయాణాన్ని కాంగ్రెస్ పార్టీతో ప్రారంభించారు.
2017లో కాంగ్రెస్ అంతర్గత ఎన్నికల విధానంపై బహిరంగంగా ప్రశ్నలు లేవనెత్తడం ద్వారా దేశవ్యాప్తంగా వార్తల్లో నిలిచారు.
ముఖ్యంగా కాంగ్రెస్ అధ్యక్షుడి ఎంపిక కోసం నిర్వహించిన అంతర్గత ఎన్నికలు ముందే నిర్ణయించిన ప్రక్రియలో భాగమేనని ఆరోపిస్తూ తీవ్ర విమర్శలు చేశారు.
ఆ ఘటన తర్వాత కాంగ్రెస్ పార్టీతో ఆయన విభేదాలు మరింత ముదిరాయి.
అదే సమయంలో ఆయన సోదరుడు తెహసీన్ పూనావాలాతో పాటు కుటుంబ సభ్యులు కూడా షెహజాద్ పూనావాలా వైఖరికి బహిరంగంగా దూరమైన విషయం అప్పట్లో చర్చనీయాంశమైంది.
వివరాలు
బీజేపీలో కీలక బాధ్యతలు
తర్వాత కాంగ్రెస్కు రాజీనామా చేసిన షెహజాద్ పూనావాలా బీజేపీలో చేరారు.
రాజకీయ, సామాజిక అంశాలపై పార్టీ తరఫున సమర్థవంతంగా వాదనలు వినిపించే సామర్థ్యాన్ని గుర్తించిన బీజేపీ అధిష్ఠానం ఆయనను జాతీయ అధికార ప్రతినిధిగా నియమించింది.
అప్పటి నుంచి టీవీ డిబేట్లు, మీడియా వేదికల్లో పార్టీ సిద్ధాంతాలు, కేంద్ర ప్రభుత్వ విధానాలను బలంగా సమర్థిస్తూ వస్తున్నారు.
ఇలాంటి సమయంలో ఆయన పదవికి రాజీనామా చేసినట్లు ప్రచారం జరగడం రాజకీయ వర్గాల్లో తీవ్ర చర్చకు దారితీసింది.
అయితే ఈ వార్తలపై ఇప్పటివరకు అధికారిక ధృవీకరణ రాకపోవడంతో పార్టీ నుంచి వచ్చే ప్రకటనపై అందరి దృష్టి నిలిచింది.