ముంబై: జీవిత భాగస్వామిని ముక్కలుగా నరికి, శరీర భాగాలను కుక్కర్‌లో ఉడకబెట్టాడు
ముంబైలో దారణం జరిగింది. ఒక వ్యక్తి తన జీవిత భాగస్వామిని హత్య చేసి, ఆమె మృతదేహాన్ని చెట్లను కట్ చేసే యంత్రంతో ముక్కలుగా చేశాడు. ఆ తర్వాత శరీర భాగాలను కుక్కర్‌లో ఉడకబెట్టాడని పోలీసు వర్గాలు తెలిపాయి. మీరా రోడ్‌లోని ఓ అపార్ట్‌మెంట్‌లో 56ఏళ్ల మనోజ్ సహాని తన జీవిత భాగస్వామి సరస్వతి వైద్య (36)తో కలిసి అద్దెకు ఉంటున్నాడు. మనోజ్ బోరివాలీలో చిన్న దుకాణం నడుపుతున్నాడు. ఈ క్రమంలో మనోజ్ సహాని ఫ్లాట్‌ నుంచి దుర్వాసన వస్తోందంటూ బుధవారం సాయంత్రం నయానగర్‌ పోలీస్ స్టేషన్‌కు అపార్ట్ మెంట్ వాసులు ఫోన్ చేశారు. దీంతో పోలీసులు వెంటనే మనోజ్ సహాని ఫ్లాట్‌‌కు వెళ్లి చూడగా, అతని ఇంట్లో కుళ్లిపోయిన శరీర భాగాలు కనిపించాయి.
మూడు లేదా నాలుగు రోజుల క్రితమే హత్య
కుళ్లిపోయిన శరీర భాగాలను చూస్తే హత్య మూడు, నాలుగు రోజుల క్రితమే జరిగి ఉండొచ్చని పోలీసులు అనుమానిస్తున్నారు. మనోజ్ సహాని, సరస్వతి వైద్య సహజీవనం చేస్తున్నారని, కొన్ని విషయాలపై భార్యాభర్తల మధ్య గొడవ జరిగిందని, ఈ క్రమంలో ఆమెను మనోజ్ హత్య చేసినట్లు డిప్యూటీ పోలీస్ కమిషనర్ (జోన్ 1) జయంత్ బజ్బాలే చెప్పారు. తమ బృందం ఇంట్లోకి వెళ్లగానే ఇది హత్య అని అర్థమైందని చెప్పారు. అయితే నిందితుడు సాక్ష్యాలను దాచడానికి ప్రయత్నించాడని వెల్లడించారు. హత్య వెనుక గల కారణాలను తెలుసుకునేందుకు పోలీసులు దర్యాప్తు చేస్తున్నారు. పోలీసులు ఇద్దరు అనుమానితులను అదుపులోకి తీసుకుని విచారిస్తున్నారు.
