రాహుల్ గాంధీపై అనర్హత వేటు తప్పదా? నిపుణులు ఏం అంటున్నారు? ఆందోళనకు సిద్ధమవుతున్న కాంగ్రెస్
ఈ వార్తాకథనం ఏంటి
పరువు నష్టం కేసులో కాంగ్రెస్ అగ్రనేత రాహుల్ గాంధీని దోషిగా తేల్చుతూ సూరత్ కోర్టు రెండేళ్ల జైలు శిక్ష విధించడం దేశవ్యాప్తంగా సంచలనంగా మారింది.
సూరత్ కోర్టు ఇచ్చిన తీర్పు రాహుల్ రాజకీయ భవిష్యత్‌పైనే కాకుండా కాంగ్రెస్‌పై కూడా ప్రభావం చూపే అవకాశం ఉన్న నేపథ్యంలో పార్టీ ఈ అంశాన్ని సీరియస్‌గా తీసుకుంటోంది.
ఇది కేవలం న్యాయపరమైన అంశం కాదని, ఇది తీవ్రమైన రాజకీయ సమస్య అని కాంగ్రెస్ సీనియర్ నాయకుడు జైరాం రమేష్ అన్నారు. ప్రధాని మోదీ ప్రభుత్వ ప్రతీకార రాజకీయాలకు ఇదొక గొప్ప ఉదాహరణగా అభివర్ణించారు.
ఈ వ్యవహారంలో రాహుల్‌కి ప్రతిపక్షాలు బాసటగా నిలుస్తున్నాయి.
విపక్షాలతో కలిసి మోదీకి వ్యవతిరేకంగా, రాహుల్‌కు మద్దతుగా దేశవ్యాప్తంగా ఆందోళనలు చేయాలని కాంగ్రెస్ నిర్ణయించింది.
ప్రాతినిధ్య చట్టం
ప్రజాప్రాతినిధ్య చట్టం ఏం చెబుతోంది?
ప్రాతినిధ్య చట్ట ప్రకారం ఒక ఎంపీ లేదా ఎమ్మెల్యేకు రెండేళ్లు లేదా అంతకంటే ఎక్కువ సంవత్సరాలు జైలు శిక్షను ఖరారు చేసినట్లయితే, దోషిగా తేలిన సమయం నుంచి చట్టసభలకు అనుమతి ఉండదని, అనర్హులుగా పరిగణించబడతారని 2013లో సుప్రీంకోర్టు ఇచ్చిన తీర్పు చేప్పింది.
ఇప్పుడు పరువు నష్టం కేసులో రాహుల్‌కు రెండేళ్ల జైలు శిక్షపడింది. అందుకే రాహుల్‌పై అనర్హత వేటు ఖాయని నిపుణులు అంటున్నారు.
అయినా కూడా రాహుల్ అనర్హత వేటు తప్పించుకోవడానికి మార్గం ఉందంటున్నారు రాజ్యాంగ న్యాయ నిపుణుడు రాకేష్ ద్వివేది. శిక్షపడినప్పటి నుంచి 90 రోజుల లోపు పై కోర్టుకు అప్పీల్ చేసుకొని, శిక్షను రద్దు చేసుకోవడమో లేక నేరారోపణపై స్టే తెచ్చుకోవడమో చేయాలని చెప్పారు.