Singareni: సింగరేణి ఉద్యోగులకు గుడ్‌న్యూస్.. దసరా, దీపావళికి భారీ బోనస్
ఈ వార్తాకథనం ఏంటి
సింగరేణి కార్మికులకు పండగ వేళ కేంద్ర ప్రభుత్వం శుభవార్త చెప్పింది. రానున్న దసరా, దీపావళి పర్వదినాలను పురస్కరించుకుని ఒక్కో కార్మికుడికి రూ.1,10,250 చొప్పున బోనస్ అందించాలని నిర్ణయించినట్లు కేంద్ర బొగ్గు గనుల శాఖ మంత్రి జి. కిషన్ రెడ్డి తెలిపారు. ఈ విషయాన్ని ఆయన సోషల్ మీడియా వేదిక 'ఎక్స్' ద్వారా వెల్లడించారు.
ట్విట్టర్ పోస్ట్ చేయండి
కిషన్ రెడ్డి చేసిన ట్వీట్
రానున్న దసరా, దీపావళి, నవరాత్రుల పండుగల కానుకగా సింగరేణి కార్మికులకు ఒక్కొక్కరికి రూ.1,10,250 చొప్పున బోనస్ ఇవ్వాలని నిర్ణయమైనది.
— G Kishan Reddy (@kishanreddybjp) October 5, 2026
దేశానికి వెలుగులు పంచేందుకు పగలు, రాత్రి కష్టపడి పనిచేస్తున్న సింగరేణి కార్మికుల శ్రమ వెలకట్టలేనిది. సింగరేణి బొగ్గు ఉత్పత్తి సంస్థ మాత్రమే కాదు.…
వివరాలు
తెలంగాణకు 'కొంగు బంగారం' సింగరేణి
బోనస్ ప్రకటనతో సింగరేణి కార్మికులు, వారి కుటుంబాల్లో పండగ సందడి మరింత పెరిగింది.
దేశానికి విద్యుత్, ఇంధన అవసరాలను తీర్చడంలో సింగరేణి కార్మికులు ఎంతో కీలక పాత్ర పోషిస్తున్నారని కిషన్ రెడ్డి పేర్కొన్నారు.
దేశానికి వెలుగులు అందించేందుకు వారు పగలు, రాత్రి అనే తేడా లేకుండా చేస్తున్న కృషి ఎంతో విలువైనదని ప్రశంసించారు.
సింగరేణి కేవలం బొగ్గు ఉత్పత్తి చేసే సంస్థ మాత్రమే కాదని.. తెలంగాణకు 'కొంగు బంగారం' లాంటి సంస్థ అని అభివర్ణించారు.
లక్షలాది కుటుంబాలకు ఉపాధి, జీవనాధారం కల్పించడంతో పాటు రాష్ట్ర, దేశ అభివృద్ధిలోనూ సింగరేణి ముఖ్యమైన భాగస్వామిగా ఉందని తెలిపారు.
ఈ సందర్భంగా సంస్థలో పనిచేస్తున్న కార్మికులతో పాటు వారి కుటుంబ సభ్యులకు దసరా, దీపావళి శుభాకాంక్షలు తెలిపారు.
వివరాలు
సింగరేణికి రాష్ట్ర ప్రభుత్వం రూ.60 వేల కోట్లు చెల్లించాలని విజ్ఞప్తి
కార్మికులకు బోనస్ ప్రకటించిన కిషన్ రెడ్డి.. సింగరేణి భవిష్యత్తు, ఉద్యోగుల సంక్షేమానికి సంబంధించి పలు సూచనలు చేశారు.
సంస్థ యాజమాన్యం, కార్మికులు పరస్పర సమన్వయంతో ముందుకు సాగాలని కోరారు.
రానున్న రోజుల్లో బొగ్గుకు ఉండే అవసరాలను దృష్టిలో పెట్టుకుని ఉత్పత్తిని మరింత పెంచే విధంగా ప్రణాళికలు రూపొందించాలని సూచించారు.
ఇదే సమయంలో తెలంగాణ ప్రభుత్వం సింగరేణి సంస్థకు చెల్లించాల్సిన బకాయిల అంశాన్ని కూడా కిషన్ రెడ్డి ప్రస్తావించారు.
రాష్ట్ర ప్రభుత్వం చెల్లించాల్సిన సుమారు రూ.60,000 కోట్ల బకాయిలను తక్షణమే విడుదల చేయాలని విజ్ఞప్తి చేశారు.
ఈ మొత్తాన్ని అందుబాటులోకి తీసుకురావడం ద్వారా సింగరేణి సంస్థ అభివృద్ధి, విస్తరణ కార్యక్రమాలకు మరింత ఊతం లభిస్తుందని పేర్కొన్నారు.
వివరాలు
సంస్థలో 42,000 మందికి పైగా రెగ్యులర్ ఉద్యోగులు
తెలంగాణ ఆర్థిక వ్యవస్థలో సింగరేణి కాలరీస్ కంపెనీ లిమిటెడ్ (ఎస్‌సీసీఎల్‌)కు ప్రత్యేక ప్రాధాన్యం ఉంది.
ప్రస్తుతం సంస్థలో 42,000 మందికి పైగా రెగ్యులర్ ఉద్యోగులు విధులు నిర్వహిస్తున్నారు. వీరితో పాటు వేలాది మంది కాంట్రాక్ట్, ఔట్‌సోర్సింగ్ విధానంలో ఉపాధి పొందుతున్నారు.
గోదావరి లోయ ప్రాంతంలో విస్తరించిన ఓపెన్‌కాస్ట్, అండర్‌గ్రౌండ్ గనుల ద్వారా సింగరేణి భారీ స్థాయిలో బొగ్గును ఉత్పత్తి చేస్తోంది.
సంస్థ ఏటా సగటున 67 నుంచి 70 మిలియన్ టన్నుల వరకు బొగ్గు ఉత్పత్తి చేస్తూ దేశ ఇంధన అవసరాల్లో తన వంతు పాత్ర పోషిస్తోంది.