Anurag Thakur: టాలీవుడ్‌పై బీజేపీ ఎంపీ అనురాగ్ ఠాకూర్ ప్రశంసలు
బీజేపీ ఎంపీ అనురాగ్ ఠాకూర్ టాలీవుడ్ పరిశ్రమపై ప్రశంసలు కురిపించారు. "భారతీయ చిత్ర పరిశ్రమను ప్రపంచవ్యాప్త స్థాయిలో నిలబెట్టేందుకు టాలీవుడ్ కీలక పాత్ర పోషించింది." అలాగే, "పుష్ప 2: ది రూల్" ప్రీమియర్ షో సందర్భంగా చోటుచేసుకున్న తొక్కిసలాట ఘటన నేపథ్యంలో నటుడు అల్లు అర్జున్‌పై తెలంగాణ పోలీసులు తీసుకున్న చర్యలపై ఆయన స్పందించారు. ఈ సందర్భంగా, అనురాగ్ ఠాకూర్, బ‌న్నీకి మద్దతుగా నిలిచారు. కొందరు తెలుగు నటుల ప్రతిష్టను దెబ్బతీసేందుకు కొందరు ప్రయత్నిస్తున్నారని ఆయన తెలిపారు.
తెలుగు సినిమా సేవ‌ల్ని దేశం, ప్రపంచం గుర్తించింద‌న్న ఎంపీ
ఏఎన్ఐతో మాట్లాడుతూ, "భారతీయ సినిమా పరిశ్రమలో తెలుగు నటీనటుల సహకారం అమోఘం. వారు భారతీయ సినిమాను ప్రపంచవ్యాప్తంగా ప్రాచుర్యం పొందేలా చేశారు. కానీ కొందరు తెలుగు నటులను దిగజార్చేందుకు ప్రయత్నిస్తున్నారు"అని అన్నారు. గత కొన్నేళ్లుగా చూస్తే.. అల్లు అర్జున్‌కు జాతీయ అవార్డు, చిరంజీవికి లైఫ్‌టైమ్‌ అచీవ్‌మెంట్‌ అవార్డు ఇచ్చినట్టు చెప్పారు. తెలుగు సినిమాను దేశం, ప్రపంచం మొత్తం గుర్తించిందని కూడా ఆయన వివరించారు. "ఆర్‌ఆర్‌ఆర్‌, పుష్ప, కేజీఎఫ్‌, బాహుబలి వంటి చిత్రాలు భారతీయ సినిమా పట్ల అంతర్జాతీయ గుర్తింపును తెచ్చిపెట్టాయి"అని అనురాగ్ ఠాకూర్ అన్నారు. అంతేకాకుండా, "రాజకీయాల రీత్యా విమర్శలు కాకుండా,చర్చలు జరిపి వివాదాలకు ముగింపు ఇవ్వాలి.రాష్ట్రంలో కాంగ్రెస్ నేతలు,ఎమ్మెల్యేలు చేసిన ప్రకటనలు ప్రభుత్వ ఉద్దేశాన్ని ప్రశ్నార్థకం చేస్తున్నాయి" అని ఆయన వ్యాఖ్యానించారు.
