Maulana Sajid Rashidi: బాబ్రీ మసీదు కూల్చివేతపై సోనియా వ్యాఖ్యలు.. కాంగ్రెస్‌పై ముస్లిం నేతలు, మాజీ కరసేవకుల విమర్శలు
ఈ వార్తాకథనం ఏంటి
అయోధ్యలో 1992లో జరిగిన బాబ్రీ మసీదు కూల్చివేత ఘటనపై కాంగ్రెస్ పార్లమెంటరీ పార్టీ (సీపీపీ) చైర్‌పర్సన్ సోనియా గాంధీ చేసిన తాజా వ్యాఖ్యలు చర్చనీయాంశంగా మారాయి. టీవీలో మసీదు కూల్చివేత దృశ్యాలను చూసి తాను కన్నీళ్లు పెట్టుకున్నానని ఆమె వెల్లడించడంపై ముస్లిం మత పెద్దలు, మాజీ కరసేవకులు తీవ్రంగా స్పందిస్తున్నారు. త్వరలో విడుదల కానున్న తన జ్ఞాపకాల పుస్తకం 'బిలాంగింగ్: ఎ జర్నీ ఆఫ్ లవ్' (Belonging: A Journey of Love) నేపథ్యంలో 'ది గార్డియన్' పత్రికకు ఇచ్చిన ప్రత్యేక ఇంటర్వ్యూలో సోనియా ఈ వ్యాఖ్యలు చేశారు. బాబ్రీ మసీదు కూల్చివేత సమయంలో తాను తీవ్రంగా కలత చెందానని పేర్కొన్నారు.
వివరాలు
సోనియావి మొసలి కన్నీళ్లు: మౌలానా సాజిద్ రషీదీ
సోనియా వ్యాఖ్యలపై ఆల్ ఇండియా ఇమామ్ అసోసియేషన్ అధ్యక్షుడు మౌలానా సాజిద్ రషీదీ ఘాటుగా స్పందించారు.
సోనియా గాంధీ కార్చినవి మొసలి కన్నీళ్లని, ప్రజలను మభ్యపెట్టేందుకే ఈ వ్యాఖ్యలు చేస్తున్నారని విమర్శించారు.
బాబ్రీ మసీదు కూల్చివేత తర్వాత 1992 నుంచి 1996 వరకు, ఆ తర్వాత 2004 నుంచి 2014 వరకు దాదాపు 14 ఏళ్ల పాటు కాంగ్రెస్ దేశంలో అధికారంలో ఉందని ఆయన గుర్తుచేశారు.
ఈ ఘటన వెనుక ఉన్న కుట్రదారులపై చర్యలు తీసుకోవాలని న్యాయస్థానం స్పష్టం చేసినప్పటికీ, కాంగ్రెస్ ప్రభుత్వం ఎలాంటి కఠిన చర్యలూ చేపట్టలేదని ఆరోపించారు.
వివరాలు
ఎందుకు తిరిగి నిర్మించలేదు
నిజంగానే బాబ్రీ మసీదు కూల్చివేతపై సోనియా గాంధీకి అంతటి బాధ ఉంటే, కాంగ్రెస్ అధికారంలో ఉన్న దశాబ్దాల కాలంలో మసీదును తిరిగి ఎందుకు నిర్మించలేదని రషీదీ ప్రశ్నించారు.
కూల్చివేతకు కారణమైన శక్తులపై నిషేధం విధించి, బాధ్యులను జైలుకు పంపే అధికారం ఉన్నప్పటికీ కాంగ్రెస్ మౌనంగా వ్యవహరించిందని విమర్శించారు.
గతంలో కాంగ్రెస్ పాలనలో వందలాది మత ఘర్షణలు జరిగాయని, వాటిలో ముస్లిం సమాజమే భారీగా నష్టపోయిందని ఆయన ఆవేదన వ్యక్తం చేశారు.
కాంగ్రెస్ తన తప్పులను సరిదిద్దుకోవడానికి ఇప్పటికీ సమయం ఉందని పేర్కొంటూ.. నిజంగా పశ్చాత్తాపం ఉంటే బాబ్రీ మసీదును పునర్నిర్మిస్తామని, దోషులను శిక్షిస్తామని హామీ ఇవ్వాలని డిమాండ్ చేశారు.
వివరాలు
కూల్చివేతకు కాంగ్రెస్‌దే బాధ్యత: మాజీ కరసేవకుడు
మరోవైపు మాజీ కరసేవకులు కూడా సోనియా వ్యాఖ్యలపై స్పందిస్తున్నారు. మాజీ కరసేవకుడు సంతోష్ దూబే మాట్లాడుతూ.. బాబ్రీ మసీదు కూల్చివేతకు కాంగ్రెస్ పార్టీయే ప్రధాన బాధ్యత వహించాలని అన్నారు.
సోనియా గాంధీ కుటుంబంతో పాటు రాజీవ్ గాంధీ, ఇందిరా గాంధీ, అప్పటి ప్రధాని పి.వి. నరసింహారావుకు కూడా ఈ ఘటనలో పాత్ర ఉందని ఆరోపించారు.
రెండు వర్గాలను ప్రలోభపెట్టే రాజకీయాలకు కాంగ్రెస్ పాల్పడిందని, జమ్మూకశ్మీర్‌లో హిందువుల వలసల అంశంలోనూ ఆ పార్టీ ద్వంద్వ వైఖరి ప్రదర్శించిందని సంతోష్ దూబే విమర్శించారు.
మొత్తంగా జ్ఞాపకాల పుస్తకం విడుదలకు ముందు సోనియా గాంధీ చేసిన వ్యాఖ్యలు రాజకీయ, సామాజిక వర్గాల్లో చర్చకు దారితీశాయి.