Andhra pradesh: కోర్టు మార్గదర్శకాలు అనుసరించి క్రీడా కోటా ఎంబీబీఎస్‌ తుది జాబితా: శాప్
ఈ వార్తాకథనం ఏంటి
ఏపీ హైకోర్టు ఆదేశాలు, మార్గదర్శకాలను అనుసరించి క్రీడా కోటా కింద ఎంబీబీఎస్‌ (నీట్‌) ప్రవేశాలకు సంబంధించిన తుది ఎంపిక జాబితాను తయారు చేసి, సంబంధిత విశ్వవిద్యాలయానికి పంపనున్నామని శాప్ స్పష్టంచేసింది. పశ్చిమ బెంగాల్‌కు చెందిన ఒక ఐపీఎస్‌ అధికారి కుమార్తెకు నిబంధనలను పట్టించుకోకుండా ఏపీ క్రీడా కోటాలో సీటు కేటాయించారని కొన్ని మీడియా సంస్థలు ప్రచారం చేసిన వార్తలు పూర్తిగా అసత్యమని తెలిపింది. గురువారం విడుదల చేసిన ప్రకటనలో ఆ ఆరోపణలను శాప్ ఖండించింది. సీట్ల కేటాయింపు ప్రక్రియలో శాప్ మేనేజింగ్‌ డైరెక్టర్‌కు ఎటువంటి ప్రమేయం లేదని, ఆ విషయంలో వచ్చిన అభియోగాలు నిజం కాదని పేర్కొంది.
వివరాలు
హైకోర్టు ఉత్తర్వులపై అప్పీల్‌ దాఖలుకు శాప్ అధికారుల యోచన
"2025-26 విద్యా సంవత్సరంలో ఎంబీబీఎస్‌ ప్రవేశాల కోసం క్రీడా కోటా అభ్యర్థుల ప్రాధాన్యత క్రమం (టెంటేటివ్‌ ప్రియారిటీ లిస్ట్‌)ను గత నెల 9న మేము విడుదల చేశాం. ఆ జాబితాపై అభ్యంతరాలు స్వీకరించేందుకు ఏడు రోజుల సమయం ఇచ్చాం. ఈ సమయంలో ఐపీఎస్‌ అధికారి వి.ఎస్.ఆర్. అనంతనాగ్‌ తన కుమార్తె పద్మావతికి ఏపీ క్రీడా కోటా కింద సీటు ఇవ్వాలని శాప్‌కు వినతి పత్రం సమర్పించారు. అనంతరం ఈ విషయంపై ఆయన ఏపీ హైకోర్టును కూడా ఆశ్రయించారు. తాజాగా హైకోర్టు ఆమెకు సీటు కేటాయించేలా ఆదేశాలు జారీ చేసింది" అని శాప్ స్పష్టం చేసింది. ఈ హైకోర్టు ఉత్తర్వులపై శాప్ అధికారులు అప్పీల్‌ దాఖలు చేయాలని యోచిస్తున్నట్లు సమాచారం.