Andhra Pradesh: రాజధాని అమరావతి ప్రత్యేక ప్రాజెక్టుల కోసం ఎస్పీవీ ఏర్పాటు
ఈ వార్తాకథనం ఏంటి
ఏపీ రాజధాని అమరావతి మరియు సీఆర్‌డీఏ పరిధిలో ప్రత్యేక ప్రాజెక్టులను అమలు చేయడానికి కంపెనీల చట్టం ప్రకారం ప్రత్యేక వాహక సంస్థ (SPV) ఏర్పాటుకు పురపాలకశాఖ మంగళవారం అధికారిక ఉత్తర్వులు జారీ చేసింది. ఇప్పటికే నిర్ణయించిన ఎనిమిది ప్రాజెక్టులతో పాటు, భవిష్యత్తులో కాలానుగుణంగా చేపట్టే ఇతర ప్రత్యేక ప్రాజెక్టుల బాధ్యత కూడా ఈ ఎస్పీవీకి అప్పగించారు. ఎస్పీవీ ద్వారా చేపట్టనున్న ముఖ్య ప్రాజెక్టులు: ఈ ఎస్పీవీ ద్వారా గ్రీన్‌ఫీల్డ్ విమానాశ్రయం నిర్మాణం, నీరుకొండపై ఎన్టీఆర్ విగ్రహ ప్రతిష్టాపన, స్మార్ట్ ఇండస్ట్రీల అభివృద్ధి, కృష్ణానదిపై ఐకానిక్ బ్రిడ్జి నిర్మాణం, స్పోర్ట్స్ సిటీ నిర్మాణం, రివర్‌ఫ్రంట్ డెవలప్‌మెంట్, రోప్‌ వే వ్యవస్థ ఏర్పాటు, అమరావతి ఇన్నర్ రింగ్ రోడ్ ప్రాజెక్ట్ వంటి ప్రాజెక్టులు అమలు అవుతాయి.
వివరాలు
ఎస్పీవీ నిర్మాణం,వాటాదారుల వివరాలు:
ప్రాథమికంగా రూ. 10 కోట్ల అధిక షేర్ క్యాపిటల్‌తో ఎస్పీవీ ఏర్పాటు అవుతుంది. ఇందులో రాష్ట్ర ప్రభుత్వాన్ని ప్రతినిధి చేసే పురపాలకశాఖ ముఖ్య కార్యదర్శికి 99.99% ఈక్విటీ ఉండనుంది. మిగతా 0.01% ఈక్విటీ సీఆర్‌డీఏ లేదా ప్రభుత్వం నిర్ణయించే ఇతర సంస్థలకు కేటాయించబడుతుంది. ఎస్పీవీ బోర్డు ఏర్పాటు: పురపాలకశాఖ ముఖ్య కార్యదర్శి ఎస్పీవీకి నాన్ ఎగ్జిక్యూటివ్ ఛైర్మన్‌గా వ్యవహరిస్తారు. అదనంగా ఆర్థిక,ఇంధన,రవాణా-రోడ్లు,భవనాలు,పరిశ్రమల శాఖల ముఖ్య కార్యదర్శులు,సీఆర్‌డీఏ కమిషనర్ డైరెక్టర్లుగా ఉంటారు. ఎస్పీవీ ఏర్పాటైన తర్వాత పారిశ్రామిక రంగాలకు చెందిన ముగ్గురు స్వతంత్ర డైరెక్టర్లను కూడా నియమిస్తారు. బోర్డు డైరెక్టర్లను సమయానుగుణంగా, అవసరాల మేరకు ప్రభుత్వం అనుమతితో మార్చే అవకాశం ఉంటుంది. ఎస్పీవీకి ఎండీగా (Managing Director) పురపాలకశాఖ ముఖ్య కార్యదర్శి నియమిస్తారు.
వివరాలు
ఎస్పీవీ బాధ్యతల్లో ముఖ్యమైనవి
రాష్ట్ర ప్రభుత్వం, సీఆర్‌డీఏతో సమన్వయంతో అమరావతి రాజధానిలో, సీఆర్‌డీఏ పరిధిలో ప్రత్యేక ప్రాజెక్టులను అభివృద్ధి చేయడం. సబ్సిడరీలు లేదా జాయింట్ వెంచర్ల ద్వారా ప్రాజెక్టుల అమలు, వనరుల సమన్వయం. కొత్త ప్రాజెక్టులను గుర్తించడం, వాటికి సంబంధించి కాన్సెప్ట్ డిజైన్‌లు, ఫీజిబిలిటీ రిపోర్టులు, డీటెయిల్డ్ ప్రాజెక్ట్ రిపోర్టులు (DPR), ఆర్థిక నమూనాలు రూపొందించడం. ప్రభుత్వం నుండి అవసరమైన అనుమతులను పొందడం. ప్రత్యేక ప్రాజెక్టుల అభివృద్ధి, నిర్మాణం, నిర్వహణ కోసం పీపీపీ (PPP), ఈపీసీ (EPC), హైబ్రిడ్ యాన్యుటీ విధానాల ద్వారా సరైన సంస్థలను ఎంపిక చేయడం.