AP Local Body Elections: ఏపీ స్థానిక ఎన్నికల్లో క్రాస్ ఓటింగ్ కలకలం.. ఎంపీటీసీ, జడ్పీటీసీ ఫలితాల్లో ట్విస్ట్‌!
ఈ వార్తాకథనం ఏంటి
ఆంధ్రప్రదేశ్ లో నిర్వహించిన జిల్లా, మండల పరిషత్‌ ప్రాదేశిక నియోజకవర్గాల (జడ్పీటీసీ, ఎంపీటీసీ) ఎన్నికల ఫలితాల్లో క్రాస్ ఓటింగ్ ప్రభావం స్పష్టంగా కనిపిస్తోంది. పలు మండలాల్లో ఎంపీటీసీ స్థానాల్లో ఆధిక్యం సాధించిన పార్టీలు జడ్పీటీసీ స్థానాలను కోల్పోయాయి. మరికొన్ని చోట్ల ఇందుకు భిన్నమైన ఫలితాలు వెలువడ్డాయి. ఈ పరిణామం అధికార కూటమి (టీడీపీ-జనసేన-బీజేపీ), ప్రతిపక్ష వైసీపీపైనా ప్రభావం చూపింది.
వివరాలు
జగ్గయ్యపేట, గన్నవరంలో భిన్నమైన ఫలితాలు
ఎన్టీఆర్‌ జిల్లా జగ్గయ్యపేటలో వైసీపీ అభ్యర్థి 1,108 ఓట్ల మెజారిటీతో జడ్పీటీసీగా విజయం సాధించారు.
అయితే, ఇక్కడి 19 ఎంపీటీసీ స్థానాల్లో కూటమి 12 సీట్లు గెలుచుకోగా, వైసీపీ 8 స్థానాలకే పరిమితమైంది. ఇదే జిల్లాలోని వీరులపాడు, కృష్ణా జిల్లా గన్నవరంలోనూ ఇలాంటి ఫలితాలే నమోదయ్యాయి.
గన్నవరంలో కూటమి 18 ఎంపీటీసీ స్థానాలను కైవసం చేసుకున్నప్పటికీ.. వైసీపీ అభ్యర్థి కేవలం 63 ఓట్ల స్వల్ప తేడాతో జడ్పీటీసీ స్థానాన్ని దక్కించుకున్నారు.
ఏలూరు జిల్లా బుట్టాయగూడెంలోనూ ఎంపీటీసీల్లో కూటమికి మెజారిటీ లభించినా.. జడ్పీటీసీ స్థానం వైసీపీ ఖాతాలో పడింది.
వివరాలు
కొరుక్కుండలో ఇందుకు భిన్నంగా..
తూర్పుగోదావరి జిల్లా కొరుక్కుండలో మాత్రం ఇందుకు భిన్నమైన ఫలితం వచ్చింది.
ఇక్కడ 12 ఎంపీటీసీ స్థానాల్లో వైసీపీ ఆధిక్యం సాధించినప్పటికీ.. జడ్పీటీసీ ఎన్నికల్లో కూటమి అభ్యర్థి 602 ఓట్ల మెజారిటీతో విజయం సాధించారు.
చిత్తూరు జిల్లా పెనుమూరు, కార్వేటినగరంలోనూ ఇదే తరహా విలక్షణ ఫలితాలు నమోదయ్యాయి.
వివరాలు
కూటమి సమన్వయ లోపాలే కారణమా?
కూటమిలో సమన్వయ లోపాలు, కొన్ని చోట్ల అభ్యర్థుల ఎంపికలో తలెత్తిన సమస్యల కారణంగానే ఇలాంటి ఫలితాలు వచ్చాయనే విశ్లేషణలు వినిపిస్తున్నాయి.
ముఖ్యంగా బలమైన పట్టున్న ప్రాంతాల్లోనూ క్రాస్ ఓటింగ్ ధోరణి కనిపించడం రాజకీయ వర్గాల్లో చర్చనీయాంశంగా మారింది.