India-Afghanistan: ఢిల్లీలో తొలి దౌత్యవేత్తను నియమించనున్న తాలిబన్లు
ఈ వార్తాకథనం ఏంటి
భారత్-ఆఫ్ఘనిస్తాన్‌ దేశాల మధ్య ఉన్న బంధం రోజురోజుకీ మరింతగా బలపడుతోంది. ఇటీవల ఆఫ్ఘన్‌ విదేశాంగ మంత్రి అమీర్‌ ఖాన్‌ ముత్తా భారత్ పర్యటన చేశారు. ఆ సందర్శన తర్వాత రెండు దేశాల మధ్య ఉన్న సంబంధాలు మరింత సుస్థిరంగా మారుతున్నాయి. ఈ నేపథ్యంలో ఢిల్లీలో తొలి తాలిబన్‌ దౌత్యవేత్తను నియమించేందుకు చర్యలు ప్రారంభమైనట్టు సమాచారం. 2021లో తాలిబన్‌ ప్రభుత్వం ఆఫ్ఘనిస్థాన్‌లో అధికారంలోకి వచ్చినప్పటి నుంచి ఇప్పటివరకు భారత్‌లో ఎలాంటి అధికారిక నియామకాలు జరగలేదు. అయితే తాజాగా రెండు దేశాల మధ్య సానుకూల వాతావరణం నెలకొనడంతో, తొలి దౌత్యవేత్త నియామకానికి ఏర్పాట్లు జరుగుతున్నాయి. ఈ నియామకం జరిగితే అది భారత్‌లో తాలిబన్‌ తరఫున తొలి అధికారిక నియామకంగా నిలుస్తుంది.
వివరాలు
భారతదేశ సార్వభౌమాధికారానికి తాలిబన్‌ సంపూర్ణ మద్దతు
ఈనెలలోనే మొదటి దౌత్యవేత్త నియామకం జరిగే అవకాశం ఉండగా,రెండవ దౌత్యవేత్తను డిసెంబర్‌ లేదా జనవరి ఆరంభంలో నియమించే అవకాశం ఉందని వర్గాలు చెబుతున్నాయి. భారత్ ఇప్పటివరకు తాలిబన్‌ ప్రభుత్వాన్ని అధికారికంగా గుర్తించకపోయినా,మానవతా సహాయం, వైద్య సహకారం వంటి అంశాల్లో ఎప్పటికప్పుడు ముందుండి సహకరిస్తోంది. అలాగే జమ్ముకశ్మీర్‌పై భారతదేశ సార్వభౌమాధికారానికి తాలిబన్‌ సంపూర్ణ మద్దతు తెలిపిన సంగతి తెలిసిందే. త్వరలోనే రెండు దేశాల మధ్య దౌత్య సంబంధాలు తిరిగి ప్రారంభం కానున్నట్లు సమాచారం.
వివరాలు
శాంతి చర్చలు విఫలం
ఇదిలా ఉండగా, భారత్ ఇటీవల 16 టన్నులకు పైగా యాంటీ-వెక్టర్‌-బోర్న్‌ డిసీజ్‌ మందులను ఆఫ్ఘనిస్థాన్‌కు విరాళంగా అందజేసింది. ఈ సాయాన్ని తాలిబన్‌ ప్రతినిధి హర్షంగా స్వాగతించారు. అవసరమైన సహాయం అందించడంలో భారత్ ఎప్పటికీ విశ్వసనీయ భాగస్వామిగా ఉంటుందని ఆయన పేర్కొన్నారు. ఇక మరోవైపు పాకిస్థాన్-ఆఫ్ఘనిస్థాన్‌ దేశాల మధ్య ఉద్రిక్తతలు తీవ్రరూపం దాల్చాయి. ఇటీవల ఇస్లామాబాద్‌ ప్రభుత్వం ఆఫ్ఘనిస్థాన్‌లోని టీటీపీ ఉగ్రవాద శిబిరాలపై వైమానిక దాడులు జరపడంతో రెండు దేశాల మధ్య పరిస్థితులు ఉద్రిక్తంగా మారాయి. శాంతి చర్చలు విఫలమవడంతో ఈ ఉద్రిక్తతలు మరింతగా పెరిగినట్లు తెలుస్తోంది.