Telangana Air Pollution: తెలంగాణ నగరాల్లో పెరుగుతున్న వాయు కాలుష్యం.. జాతీయ ప్రమాణాలను మించిన పీఎం-10
ఈ వార్తాకథనం ఏంటి
హైదరాబాద్‌ సహా తెలంగాణలోని మూడు నగరాల్లో గాలి నాణ్యత ఆందోళన కలిగిస్తోంది. జాతీయ స్వచ్ఛ వాయు కార్యక్రమం పరిధిలో ఉన్న హైదరాబాద్‌,నల్గొండతో పాటు జిల్లా కేంద్రం సంగారెడ్డిలోనూ వాయు కాలుష్యం జాతీయ ప్రమాణాలను మించి నమోదవుతోంది. పరిశ్రమల నుంచి వెలువడే కాలుష్యం,వాహనాల పొగ,రోడ్లపై పేరుకుపోయే ధూళి,నిర్మాణ పనుల వల్ల గాలిలో సూక్ష్మ ధూళి కణాలు పెరుగుతున్నాయి. దీంతో ప్రజలకు స్వచ్ఛమైన గాలి అందడం కష్టంగా మారుతోంది. 2025-26 వార్షిక సగటు గణాంకాల ప్రకారం.. ఈ మూడు నగరాల్లోనూ పీఎం-10 స్థాయులు జాతీయ ప్రమాణాల కంటే ఎక్కువగా ఉన్నాయి. హైదరాబాద్‌లో జాతీయ పరిమితిని మించి 33.3 శాతం కాలుష్యం నమోదైంది. సంగారెడ్డిలో 30 శాతం, నల్గొండలో 18.3 శాతం అధికంగా పీఎం-10 స్థాయులు నమోదయ్యాయి.
వివరాలు
పీఎం-10 ఎంత ఉండాలి? ఎంత నమోదైంది?
పీఎం-10 అంటే గాలిలో ఉండే సూక్ష్మ ధూళి కణాలు. ఇవి శ్వాస ద్వారా శరీరంలోకి ప్రవేశించే అవకాశం ఉంటుంది.
కేంద్ర కాలుష్య నియంత్రణ మండలి (సీపీసీబీ) నిర్దేశించిన ప్రమాణాల ప్రకారం.. ఒక క్యూబిక్‌ మీటరు గాలిలో పీఎం-10 వార్షిక సగటు 60 మైక్రోగ్రాములకు మించకూడదు.
అయితే 2025-26లో హైదరాబాద్‌లో 80 మైక్రోగ్రాములు, సంగారెడ్డిలో 78, నల్గొండలో 71 మైక్రోగ్రాములుగా నమోదయ్యాయి.
ప్రపంచ ఆరోగ్య సంస్థ (డబ్ల్యూహెచ్‌ఓ) సూచించిన మార్గదర్శకాల ప్రకారం.. పీఎం-10 వార్షిక సగటు స్థాయి క్యూబిక్‌ మీటరు గాలికి 15 మైక్రోగ్రాములుగా ఉండాలి.
ఈ ప్రమాణంతో పోలిస్తే హైదరాబాద్‌లో నమోదైన స్థాయి 5.3 రెట్లు ఎక్కువగా ఉంది. సంగారెడ్డిలో 5.2 రెట్లు, నల్గొండలో 4.7 రెట్లు అధికంగా పీఎం-10 నమోదైంది.
వివరాలు
ప్రజల ఆరోగ్యంపై ఎలాంటి ప్రభావం?
గాలిలోని సూక్ష్మ ధూళి కణాలు శ్వాస ద్వారా శరీరంలోకి చేరి ఊపిరితిత్తులపై ప్రభావం చూపుతాయి.
వాయు కాలుష్యానికి దీర్ఘకాలం గురికావడం వల్ల శ్వాసకోశ, గుండె సంబంధిత వ్యాధుల ముప్పు పెరుగుతుందని ప్రపంచ ఆరోగ్య సంస్థ హెచ్చరిస్తోంది.
ముఖ్యంగా పిల్లలు, వృద్ధులు, ఆస్తమా, గుండె, ఊపిరితిత్తుల సమస్యలతో బాధపడుతున్నవారిపై కాలుష్యం ప్రభావం ఎక్కువగా ఉంటుంది.
వాయు కాలుష్యాన్ని తగ్గించే లక్ష్యంతో కేంద్ర ప్రభుత్వం 2019లో జాతీయ స్వచ్ఛ వాయు కార్యక్రమాన్ని ప్రారంభించింది.
ఈ కార్యక్రమం ప్రారంభమైనప్పటితో పోలిస్తే హైదరాబాద్‌లో గాలి నాణ్యత కొంత మెరుగుపడినప్పటికీ.. ప్రస్తుతం పీఎం-10 స్థాయి జాతీయ ప్రమాణాల కంటే 33.3 శాతం అధికంగా ఉండటం ఆందోళన కలిగిస్తోంది.