Telangana: తలసరి ఆదాయంలో దూసుకుపోతున్నతెలంగాణ.. జీఎస్‌డీపీ రూ.16.41 లక్షల కోట్లు

వ్రాసిన వారు Sirish Praharaju

Dec 16, 2025

10:55 am

ఈ వార్తాకథనం ఏంటి

రిజర్వ్ బ్యాంక్ ఆఫ్ ఇండియా తాజాగా విడుదల చేసిన 'హ్యాండ్‌బుక్ ఆఫ్ స్టాటిస్టిక్స్ ఆన్ ఇండియన్ స్టేట్స్ 2024-25' నివేదిక ప్రకారం, తలసరి ఆదాయం విషయంలో తెలంగాణ దేశంలో అగ్రస్థానాల్లో ఉన్న రాష్ట్రాల సరసన నిలిచింది. రాష్ట్రంలో తలసరి ఆదాయం రూ.3,87,623గా నమోదు కాగా, ఇది కర్ణాటక, తమిళనాడు, హర్యానా, మహారాష్ట్ర, కేరళ వంటి పారిశ్రామికంగా అభివృద్ధి చెందిన రాష్ట్రాల కంటే అధికంగా ఉంది. ఇది తెలంగాణ ఆర్థిక వ్యవస్థ బలమైన వేగంతో ముందుకు సాగుతున్నదని ఆర్థిక నిపుణులు విశ్లేషిస్తున్నారు. మరోవైపు, చిన్న రాష్ట్రంగా పరిగణించబడే ఢిల్లీ రూ.4,93,024 తలసరి ఆదాయంతో దేశంలోనే తొలి స్థానాన్ని దక్కించుకుంది. డాలర్ల లెక్కల్లో చూస్తే, తెలంగాణ తలసరి ఆదాయం 4,295 డాలర్ల స్థాయిలో ఉంది.

వివరాలు

తెలంగాణ జీఎస్‌డీపీలో వృద్ధి నమోదు

ప్రధాన రాష్ట్రాల్లో కర్ణాటక తలసరి ఆదాయం రూ.3,80,906గా ఉండగా, దానికంటే తెలంగాణ ముందంజలో నిలిచింది. తమిళనాడు రూ.3,61,619, హర్యానా రూ.3,53,182, మహారాష్ట్ర రూ.3,09,340, కేరళ రూ.3,08,338తో తదుపరి స్థానాల్లో ఉన్నాయి. ఆర్‌బీఐ గణాంకాల ప్రకారం, తెలంగాణ స్థూల రాష్ట్ర దేశీయ ఉత్పత్తి (జీఎస్‌డీపీ)లో కూడా స్పష్టమైన వృద్ధి నమోదైంది. 2024-25 ఆర్థిక సంవత్సరంలో రాష్ట్ర జీఎస్‌డీపీ రూ.16.41 లక్షల కోట్లకు చేరి, జాతీయ స్థాయిలో ఆరో స్థానాన్ని సంపాదించింది. మహారాష్ట్ర రూ.45.32 లక్షల కోట్ల జీఎస్‌డీపీతో అగ్రస్థానంలో ఉండగా, ఉత్తరప్రదేశ్ రూ.29.78 లక్షల కోట్లు, కర్ణాటక రూ.28.84 లక్షల కోట్లు, పశ్చిమ బెంగాల్ రూ.18.15 లక్షల కోట్లు, రాజస్థాన్ రూ.17.04 లక్షల కోట్లతో తదుపరి స్థానాల్లో నిలిచాయి.

వివరాలు

ఒక ఏడాదిలోనే రూ.1.79 లక్షల కోట్లకు మించిన వృద్ధి

2024-25 ఆర్థిక సంవత్సరంలో రేవంత్ రెడ్డి నేతృత్వంలోని కాంగ్రెస్ ప్రభుత్వం రాష్ట్రంలో అధికారంలోకి వచ్చింది. డిసెంబర్ 2023లో బాధ్యతలు స్వీకరించిన ఈ ప్రభుత్వ కాలంలో కనిపిస్తున్న అనుకూల ఆర్థిక సూచికలు పాలకులకు ధైర్యాన్ని కలిగించే అంశాలుగా మారాయి. 2023-24లో మునుపటి బీఆర్ఎస్ ప్రభుత్వం ఎక్కువ కాలం అధికారంలో ఉన్నప్పుడు తెలంగాణ జీఎస్‌డీపీ రూ.14,61,835 కోట్లుగా ఉండగా, కాంగ్రెస్ ప్రభుత్వం వచ్చిన తర్వాత అది రూ.16,40,901 కోట్లకు పెరిగింది. కేవలం ఒక ఏడాదిలోనే రూ.1.79 లక్షల కోట్లకు మించిన వృద్ధి నమోదైందని నిపుణులు చెబుతున్నారు.

వివరాలు

అభివృద్ధిపై నిరంతర దృష్టి

వ్యవసాయం, అనుబంధ రంగాలు, మైనింగ్, తయారీ, యుటిలిటీస్, వాణిజ్య,సేవల రంగాలు వంటి కీలక విభాగాల్లో సమగ్ర వృద్ధి చోటు చేసుకున్నట్లు అధికారులు వెల్లడించారు. ఇది ఒకే రంగంపై ఆధారపడకుండా, సమతుల్య ఆర్థిక విస్తరణకు సూచనగా భావిస్తున్నారు. అలాగే తలసరి ఆదాయం 2023-24లో రూ.3,47,714 నుంచి 2024-25లో రూ.3,87,623కు పెరగడం ద్వారా ఆర్థిక పురోగతి వేగం మరింత స్పష్టంగా కనిపిస్తోంది. సంక్షేమాన్ని కేంద్రంగా పెట్టుకున్న పాలనతో పాటు అభివృద్ధిపై నిరంతర దృష్టి సారించడం వల్లే ఈ స్థాయి ఆర్థిక పనితీరు సాధ్యమైందని ఆర్థిక శాఖ అధికారులు అభిప్రాయపడుతున్నారు. పరిశ్రమలు, వ్యవసాయం, సేవల రంగాల్లో వృద్ధిని ప్రోత్సహిస్తూ, అదే సమయంలో ప్రధాన సామాజిక సంక్షేమ పథకాలను ప్రభుత్వం కొనసాగించగలిగిందని వారు స్పష్టం చేస్తున్నారు.