CAA : పశ్చిమ బెంగాల్‌లోని మతువా కమ్యూనిటీపై 'సీఏఏ' ప్రభావం ఎంత?
ఈ వార్తాకథనం ఏంటి
దేశంలో ఎట్టకేలకు పౌరసత్వ సవరణ చట్టం (CAA) అమల్లోకి వచ్చింది. లోక్‌సభ ఎన్నికల నోటిఫికేషన్ రావడానికి ముందు సీఏఏ నిబంధనలను మోదీ ప్రభుత్వం నోటిఫై చేసింది.
సీఏఏ నోటిఫికేషన్‌ను జారీ చేయడం ద్వారా.. పాకిస్థాన్, బంగ్లాదేశ్, ఆఫ్ఘనిస్తాన్ నుంచి హింస కారణంగా భారతదేశానికి వచ్చిన ముస్లిమేతరులకు పౌరసత్వం ఇవ్వడానికి మార్గం సుగమం అయ్యింది.
సీఏఏ అమల్లోకి రావడంతో బంగ్లాదేశ్ నుంచి వలస వచ్చిన శరణార్థుల హిందూ శాఖ అయిన పశ్చిమ బెంగాల్‌లోని 'మతువా' కమ్యూనిటీ సంబురాలు జరుపుకుంటున్నారు.
మతువా శరణార్థులకు శాశ్వత పౌరసత్వం ఇవ్వాలనే ఎప్పటి నుంచి డిమాండ్ ఉంది.
ఈ క్రమంలో లోక్‌సభ ఎన్నికల వేళ.. శరార్ధులను లక్ష్యంగా చేసుకొని మోదీ ప్రభుత్వం సీఏఏను అమల్లోకి తీసుకురావడం చర్చనీయాంశంగా మారింది.
సీఏఏ
మతువా కమ్యూనిటీ ప్రజలు ఎవరు?
భారతదేశ విభజన తరువాత తూర్పు పాకిస్థాన్ (ప్రస్తుతం బంగ్లాదేశ్) నుంచి పెద్ద సంఖ్యలో హిందూ మతువా శరణార్థులు బెంగాల్‌కు భారీ సంఖ్యలో వచ్చారు.
వీరికి ఇప్పటికీ భారత పౌరసత్వం లేదు. దశాబ్దాలుగా భారతీయ పౌరసత్వాన్ని డిమాండ్ చేస్తున్నారు. ఇప్పుడు ఆ కల నెరవేరింది.
బెంగాల్‌లోని మతువా శరణార్థులు ఉత్తర 24 పరగణాలు, దక్షిణ 24 పరగణాలు, నదియా, జల్పాయిగురి, సిలిగురి, కూచ్ బెహార్, బంగ్లాదేశ్ సరిహద్దులో ఉన్న తూర్పు, పశ్చిమ బద్దమాన్ జిల్లాల్లో విస్తరించి ఉన్నారు.
మతువా కమ్యూనిటీని హరిచంద్ ఠాకూర్ స్థాపించారు. దేశ విభజన తర్వాత హరిచంద్-గురుచంద్ ఠాకూర్ వారసుడైన ప్రమథ రంజన్ ఠాకూర్, అతని భార్య వీణాపాణి రాష్ట్రంలోని మతువా సమాజాన్ని ఏకం చేశారు. భారత పౌరసత్వం కోసం ఉద్యమించారు.
బంగాల్
పశ్చిమ బెంగాల్ మొత్తం ఎస్సీ జనాభాలో 17.4 శాతంగా మతువా కమ్యూనిటీ
బంగ్లాదేశ్ నుంచి వచ్చిన హిందూ శరణార్థులను షెడ్యూల్డ్ కులం (SC)గా పశ్చిమ బెంగాల్‌లో వర్గీకరించారు.
వీరిని మతువా నామశూద్ర లేదా దిగువ కుల హిందూ శరణార్థులుగా పిలుస్తారు. పశ్చిమ బెంగాల్ మొత్తం SC జనాభాలో 17.4శాతం నామసుద్రలు ఉన్నారు.
ఉత్తర బెంగాల్‌లో రాజ్‌బంషీల తర్వాత రాష్ట్రంలో రెండవ అతిపెద్ద ఎస్సీ కమ్యూనిటీ నామసుద్రలు కావడం గమనార్హం.
బెంగాల్‌లోని 1.8కోట్ల షెడ్యూల్డ్ కులాల జనాభాలో (99.96%) హిందువుల సంఖ్య అత్యధికంగా ఉంది.
రాష్ట్రంలోని 42 లోక్‌సభ స్థానాల్లో బెంగాల్‌లోని 10 సీట్లు షెడ్యూల్డ్ కులాలకు రిజర్వ్ చేయబడ్డాయి. వీటిలో 2019లో బీజేపీ నాలుగు సీట్లను గెలుచుకుంది.
ఇప్పుడు సీఏఏ అమలు నిర్ణయంతో షెడ్యూల్డ్ కులాలు గంపగుత్తగా బీజేపీ వైపు మొగ్గే అవకాశాలు స్పష్టంగా ఉన్నాయి.