TTD Adulterated Ghee Case: టీటీడీ కల్తీ నెయ్యి స్కాం.. సుబ్రహ్మణ్యం రిపోర్టులో సంచలన విషయాలు!
ఈ వార్తాకథనం ఏంటి
తిరుమల తిరుపతి దేవస్థానంలో కీలకస్థానమైన జనరల్ మేనేజర్ (కొనుగోళ్ల విభాగం)గా పనిచేసిన ఆర్ఎస్ఎస్వీఆర్ సుబ్రహ్మణ్యం (ప్రస్తుతం టీటీడీలో ఈఈ) నేరపూరిత కుట్రలో ప్రధాన పాత్ర పోషించినట్లు ప్రత్యేక దర్యాప్తు బృందం (సిట్) స్పష్టం చేసింది. సుబ్రహ్మణ్యం 2017 జూలై 6 నుంచి 2018 మే 17 వరకు, మరోసారి 2020 మే 13 నుంచి 2023 మే 1 వరకు రెండుసార్లు జీఎంగా విధులు నిర్వర్తించారు. సిట్ విచారణ ప్రకారం, లడ్డూ ప్రసాదానికి నెయ్యి సరఫరా చేసే అర్హతలేని భోలేబాబా, వైష్ణవి డెయిరీ, మాల్గంగా సంస్థల ప్రతినిధులతో కుమ్మక్కై సుబ్రహ్మణ్యం లంచాలు స్వీకరించారు.
Details
లంచాలు తీసుకున్నట్లు నిర్ధారణ
2021 జూలై నుంచి 2023 నవంబర్ వరకు వేర్వేరు తేదీల్లో రూ.16,700 విలువైన వెండి ప్లేటు, రూ.50 వేల శాంసంగ్ ఫోన్, రూ.3.50 లక్షల నగదు రూపంలో లంచాలు తీసుకున్నట్లు తేలింది. అర్హతలేని ఈ డెయిరీల ప్లాంట్లను తనిఖీ చేయకుండానే సాంకేతిక కమిటీ సభ్యుడిగా సుబ్రహ్మణ్యం అనుకూల నివేదిక అందించారు. మైసూరు సీఎఫ్‌టీఆర్‌ఐ ల్యాబ్ పరీక్షల్లో నెయ్యిలో వెజిటేబుల్ ఆయిల్స్ కలిపినట్లు తేలినా ఆయన పై అధికారులకు నివేదిక అందించకుండా ఉద్దేశపూర్వకంగా దాచిపెట్టారు. 2022 మేలో టీటీడీ 24.50 లక్షల కిలోల అగ్మార్క్ స్పెషల్ గ్రేడ్ నెయ్యి కొనుగోలుకు టెండర్లు పిలిచినప్పుడు భోలేబాబా సంస్థ కూడా బిడ్ వేసింది. జూన్ 6న సాంకేతిక కమిటీ ఉత్తరప్రదేశ్ ఫతేపూర్‌లోని ప్లాంట్‌ను తనిఖీ చేసింది.
Details
కోట్లాది మంది భక్తుల మనోభావాలకు దెబ్బ
చిన్న అప్పన్న నుండి వరుస ఫోన్ కాల్స్ వచ్చిన నేపథ్యంలో కమిటీ భోలేబాబా డెయిరీని టెండర్లకు అనర్హమని పేర్కొంది. అయితే అనర్హత నివేదిక ఉన్నప్పటికీ సుబ్రహ్మణ్యం 9,450 కిలోలు, అలాగే 1,07,625 కిలోల నెయ్యి సరఫరాకు ఆదేశాలు ఇచ్చినట్లు రిమాండ్ రిపోర్ట్ తెలిపింది. అక్టోబర్ 2022 వరకు భోలేబాబా సరఫరా కొనసాగింది. అదేవిధంగా 2021-22లో టెండర్లు పిలిచినప్పుడు వైష్ణవి, మాల్గంగా డెయిరీలు కూడా బిడ్డింగ్‌లో పాల్గొన్నాయి. ఈ మూడు డెయిరీలూ తప్పుడు పత్రాలు సమర్పించినా, సుబ్రహ్మణ్యం ధృవీకరించి ఎల్1, ఎల్2 బిడ్డర్లుగా అర్హత కల్పించారు. తద్వారా కోట్ల రూపాయల కాంట్రాక్టులు ఈ సంస్థలకు లభించాయి. కల్తీ నెయ్యి తిరుమల లడ్డూ తయారీలో ఉపయోగించబడటంతో కోట్లాది మంది భక్తుల మనోభావాలు దెబ్బతిన్నాయని సిట్ పేర్కొంది.
Details
సిట్ ఆధారాల ప్రకారం
2021 జూలై 23: వైష్ణవి డెయిరీ తరఫున కమీషన్ ఏజెంట్ పీపీ శ్రీనివాసన్ నుంచి రూ.16,700 విలువైన వెండి ప్లేటు స్వీకరణ 2021 డిసెంబరు 22-23: భోలేబాబా డైరెక్టర్ పోమిల్ జైన్ నుంచి రూ.50 వేల శాంసంగ్ ఫోన్ స్వీకరణ 2022 మార్చి-2023 ఏప్రిల్: పీపీ శ్రీనివాసన్ నుంచి రూ.3.50 లక్షల నగదు లంచం స్వీకరణ 2023 నవంబర్ 8: రూ.5 వేల విలువైన వెండి నాణేలు స్వీకరణ ల్యాబ్ పరీక్షల్లో బీటా సిటోస్టెరాల్ పాజిటివ్‌గా రాగానే సుబ్రహ్మణ్యం దాన్ని దాచిపెట్టి సరఫరా కొనసాగించారు. నిబంధనలు సవరించేందుకు ఈవోకు తప్పుడు నోట్లు పంపి ప్రీమియర్ అగ్రిఫుడ్స్ వంటి సంస్థలకు సహకరించినట్లు విచారణలో బయటపడింది.
Details
కీలక సూత్రదారులుగా పోమిల్ జైన్, విపిన్ జైన్
మొత్తం వ్యవహారంలో భోలేబాబా డైరెక్టర్లు పోమిల్ జైన్, విపిన్ జైన్ కీలక సూత్రధారులని సిట్ పేర్కొంది. వారి నుంచి లభించిన లంచాల ప్రతిఫలం గానే సుబ్రహ్మణ్యం వారికి అనుకూల నివేదికలు, ఆర్డర్లు ఇచ్చినట్లు నిర్ధారించింది. ఈ అవకతవకలతో డెయిరీలు భారీ లాభాలు పొందగా, తిరుమల లడ్డూలో కల్తీ నెయ్యి వినియోగించడం అత్యంత తీవ్రమైన దోషమని సిట్ స్పష్టం చేసింది. గురువారం సుబ్రహ్మణ్యం అరెస్ట్ అయ్యగా, శుక్రవారం రిమాండ్ రిపోర్టు వెలుగులోకి వచ్చింది.