Recruitment: విశ్వవిద్యాలయాల్లో అధ్యాపకుల నియామకం: 1,500 పోస్టులకు త్వరలో ప్రకటన
ఈ వార్తాకథనం ఏంటి
ఏపీలోని విశ్వవిద్యాలయాల్లో అధ్యాపకుల నియామక ప్రకటన విడుదలకు ఉన్నత విద్యాశాఖ వేగంగా ఏర్పాట్లు చేస్తోంది. ఉద్యోగాల వార్షిక పట్టికలో ప్రకటించినట్టే ఈ నెల 15న 1,500 పోస్టులకు ప్రకటన విడుదల చేయాలని నిర్ణయించింది. విశ్వవిద్యాలయాలకు మంజూరు చేసిన పోస్టుల్లో మిగిలిన ఖాళీల్లో 43 శాతం వరకు భర్తీ చేసే విధంగా ప్రణాళిక రూపొందించారు. ఈ పోస్టులకు సంబంధించిన రిజర్వేషన్ క్రమాన్ని ఖరారు చేసే ప్రక్రియను సంబంధిత విశ్వవిద్యాలయాలు కొనసాగిస్తున్నాయి. ప్రస్తుతం అన్ని విశ్వవిద్యాలయాల్లో కలిపి 3,220 పోస్టులు ఖాళీగా ఉన్నాయి.
వివరాలు
ఆంధ్ర విశ్వవిద్యాలయంలో 246 ఖాళీలు
ఇంతకుముందు 2017-18లో ప్రభుత్వం 1,109 పోస్టుల భర్తీకి ప్రకటన ఇచ్చినప్పటికీ, ఆ విషయం సుప్రీంకోర్టులో విచారణలో ఉండటంతో ఆ పోస్టులను పక్కన పెట్టి మొదటి విడతగా 1,500 పోస్టులను భర్తీ చేయనున్నారు. మొత్తం బ్యాక్లాగ్ పోస్టులు 279 ఉండగా, వాటిని కూడా ఈ ప్రకటనలో చేర్చనున్నారు. అత్యధికంగా ఆంధ్ర విశ్వవిద్యాలయంలో బ్యాక్లాగ్ పోస్టులతో కలిపి 246 ఖాళీలను భర్తీ చేయనున్నారు. ఆ తర్వాత రాజీవ్ గాంధీ విజ్ఞాన విశ్వవిద్యాలయంలో 207 పోస్టులు భర్తీ చేసే అవకాశం ఉంది. శ్రీవేంకటేశ్వర విశ్వవిద్యాలయంలో 125, రాజీవ్ గాంధీ విజ్ఞాన విశ్వవిద్యాలయంలో మరో విభాగంలో 104, శ్రీకృష్ణదేవరాయ విశ్వవిద్యాలయంలో 103 పోస్టులను భర్తీ చేయడానికి చర్యలు తీసుకుంటున్నారు.
వివరాలు
ఆ విభాగాల్లో పోస్టుల భర్తీని తాత్కాలికంగా వాయిదా
ఇక ఆంధ్రకేసరి విశ్వవిద్యాలయంలో 13, ద్రవిడ విశ్వవిద్యాలయంలో 18,డాక్టర్ అబ్దుల్ హక్ ఉర్దూ విశ్వవిద్యాలయంలో 32 పోస్టులు భర్తీ అయ్యే అవకాశం ఉంది. బ్యాక్లాగ్ పోస్టుల్లో రాజీవ్ గాంధీ విజ్ఞాన విశ్వవిద్యాలయంలోనే అత్యధికంగా 103 ఉండగా,యోగివేమన విశ్వవిద్యాలయంలో 43 ఉన్నాయి. అత్యల్పంగా ఆచార్య నాగార్జున విశ్వవిద్యాలయంలో ఒకటి, డాక్టర్ బీఆర్ అంబేద్కర్ విశ్వవిద్యాలయంలో 4, ద్రవిడ విశ్వవిద్యాలయంలో 5 పోస్టులు ఉన్నాయి. పోస్టుల సర్దుబాటు ప్రక్రియ పూర్తయింది. రిజర్వేషన్ క్రమాన్ని ఖరారు చేసిన తర్వాత తుది జాబితా సిద్ధం కానుంది. అయితే కొన్ని విశ్వవిద్యాలయాల్లో కొన్ని విభాగాల్లో విద్యార్థుల ప్రవేశాలు లేకపోవడంతో అక్కడ పని చేసే సిబ్బంది కూడా లేని పరిస్థితి ఉంది. అలాంటి విభాగాల్లో పోస్టుల భర్తీని తాత్కాలికంగా వాయిదా వేశారు.