Varanasi: వారణాసిలో కారుతో మహిళను ఢీకొట్టాడంటూ.. వ్యాపారిని కొట్టి చంపిన స్థానికులు
ఈ వార్తాకథనం ఏంటి
ఉత్తర్ప్రదేశ్ రాష్ట్రంలోని వారణాసిలో జరిగిన ఒక సాధారణ రోడ్డు ప్రమాదం ఘోర పరిణామాలకు దారితీసింది. కారుతో మహిళను ఢీకొట్టాడన్న కోపంతో స్థానికులు మూకదాడికి దిగడంతో 38 ఏళ్ల వ్యాపారి ప్రాణాలు కోల్పోయాడు. ఈ దారుణ ఘటన ఆదివారం రాత్రి చోటుచేసుకుంది. వ్యాపారి మనీశ్ కుమార్ సింగ్ ఆదివారం రాత్రి సుమారు 11 గంటల సమయంలో కారులో ఇంటికి వెళ్తుండగా, రోడ్డు పక్కన నడుస్తున్న ఒక మహిళను ఢీకొట్టాడు. ప్రమాదంలో గాయపడిన మహిళను అక్కడున్నవారు వెంటనే చికిత్స కోసం ఆసుపత్రికి తరలించారు.
వివరాలు
తీవ్ర గాయాలతో ఆసుపత్రిలో చికిత్స పొందుతూ వ్యాపారి మృతి
ప్రమాదం జరిగిన వెంటనే అక్కడ పరిస్థితి ఉద్రిక్తంగా మారింది. కోపంతో ఉన్న స్థానికులు మనీశ్ కుమార్ను కారులో నుంచి బయటకు లాగి తీవ్రంగా దాడి చేశారు. ఈ దాడిలో తీవ్రంగా గాయపడిన అతడిని వారణాసిలోని బెనారస్ హిందూ విశ్వవిద్యాలయ ఆసుపత్రికి తరలించగా, చికిత్స పొందుతూ ప్రాణాలు విడిచాడు. ఈ ఘటనపై గోమతి పరిధి ఉప పోలీసు కమిషనర్ నీతూ కడ్యాన్ మాట్లాడుతూ, "ఆదివారం రాత్రి ఫ్యాక్టరీ నుంచి ఇంటికి వస్తుండగా మనీశ్ సింగ్ కారు ఒక మహిళను ఢీకొట్టింది. ఆ తర్వాత పరిస్థితి ఉద్రిక్తంగా మారి, తీవ్ర గాయాల కారణంగా ఆయన మరణించాడు" అని తెలిపారు. మృతుడి కుటుంబ సభ్యుల ఫిర్యాదు మేరకు ఫూల్పూర్ పోలీస్ స్టేషన్లో కేసు నమోదు చేశారు.
వివరాలు
బాధితుడి కుటుంబం ఆందోళన.. ప్రాంతంలో భారీగా పోలీసుల మోహరింపు
ఈ కేసులో ఎనిమిది మంది పేర్లను నమోదు చేసి, మరో ఏడుగురిని గుర్తుతెలియని వ్యక్తులుగా చేర్చారు. ఇప్పటివరకు నలుగురు నిందితులను పోలీసులు అదుపులోకి తీసుకున్నారు. మిగిలిన వారిని పట్టుకునేందుకు ప్రత్యేక బృందాలు గాలింపు చర్యలు కొనసాగిస్తున్నట్లు అధికారులు తెలిపారు. ఈ ఘటనతో బాధితుడి కుటుంబ సభ్యులు నిరసన వ్యక్తం చేశారు. ఎలాంటి అవాంఛనీయ సంఘటనలు జరగకుండా మనీశ్ నివాసం వద్ద,పరిసర ప్రాంతాల్లో భారీగా పోలీసులు మోహరించారు. శాంతిభద్రతలను కాపాడటంతో పాటు, దాడికి పాల్పడిన వారందరిపై కఠిన చర్యలు తీసుకుంటామని అధికారులు స్పష్టం చేశారు.