Arnab Cyclone Rains: అర్నబ్‌ తుపానుతో పెరిగిన నీటి నిల్వలు.. రాష్ట్రానికి 30 టీఎంసీలకు పైగా అదనపు జలాలు

వ్రాసిన వారు Jayachandra Akuri

Oct 31, 2026

08:40 am

ఈ వార్తాకథనం ఏంటి

అతి తీవ్ర తుపాను 'అర్నబ్‌' ప్రభావంతో కురిసిన భారీ వర్షాలు ఆంధ్రప్రదేశ్ లోని జలవనరులకు కొత్త కళను తీసుకొచ్చాయి. వర్షాల కారణంగా జలాశయాలు, చిన్న చెరువుల్లో నీటి నిల్వలు గణనీయంగా పెరిగాయి. ఇప్పటివరకు జలాశయాలు, చిన్న నీటివనరుల్లో కలిపి అదనంగా 30.85 టీఎంసీల నీరు చేరినట్లు అధికారులు వెల్లడించారు. రాష్ట్రవ్యాప్తంగా కురిసిన వర్షపాతం ద్వారా మొత్తం 380 టీఎంసీల నీరు లభించినట్లు జలవనరులశాఖ అంచనా వేసింది. భారీ వర్షాలు కురిసిన ప్రాంతాల్లోని జలాశయాల్లోకి కేవలం మూడు రోజుల్లోనే 8.85 టీఎంసీల నీరు వచ్చి చేరింది. మరో 2 టీఎంసీల నీరు అదనంగా చేరే అవకాశం ఉందని అధికారులు అంచనా వేస్తున్నారు.

వివరాలు

ఇప్పటికే 22 టీఎంసీల నీరు అదనంగా చేరింది

ఇక చిన్న నీటివనరుల్లోకి ఇప్పటికే 22 టీఎంసీల నీరు అదనంగా చేరింది. రానున్న రోజుల్లో మరో 8 నుంచి 12 టీఎంసీల వరకు నీరు చేరే అవకాశాలున్నాయని విశ్లేషిస్తున్నారు.

మరోవైపు, భూగర్భజలాల రూపంలో కూడా భారీగా నీటిని నిల్వ చేయగలిగారు. ఈ వర్షాల ద్వారా సుమారు 46.2 టీఎంసీల నీరు భూగర్భజలాల రూపంలో భద్రపడినట్లు అంచనా వేశారు.

రాష్ట్రంలో జలవనరుల సంరక్షణకు ముఖ్యమంత్రి దిశానిర్దేశం చేయడంతో పాటు, జిల్లా కలెక్టర్లు క్షేత్రస్థాయిలో అవసరమైన చర్యలు చేపట్టారు.

ఈ సమన్వయంతోనే వర్షపు నీటిని సమర్థంగా ఒడిసిపట్టి అదనపు నీటి నిల్వలను సాధించగలిగామని ప్రభుత్వం పేర్కొంది.

భారీ వర్షాలను నీటి వనరుల పెంపునకు ఉపయోగపడేలా చర్యలు తీసుకున్నట్లు వెల్లడించింది.