YCP-Zakia Khanam: వైసీపీకి మండలి డిప్యూటీ ఛైర్‌పర్సన్‌ రాజీనామా.. రెండేళ్ల నుంచి అసంతృప్తిగా జకియా ఖానం
ఈ వార్తాకథనం ఏంటి
వైఎస్సార్సీపీకి మరో షాక్ తగిలింది. ఆంధ్రప్రదేశ్ శాసన మండలి ఉపాధ్యక్షురాలిగా ఉన్న జకియా ఖానం పార్టీకి రాజీనామా చేశారు.
ఆమె ఎమ్మెల్సీ పదవికి కూడా రాజీనామా చేస్తున్నట్టు మండలి చైర్మన్‌కు లేఖ పంపించారు.
ఈ లేఖను ఆమె తన వ్యక్తిగత సిబ్బంది ద్వారా మండలి చైర్మన్‌కు చేరవేశారు.
గత కొన్ని నెలలుగా జకియా ఖానం వైఎస్సార్సీపీ కార్యకలాపాలకు దూరంగా ఉంటున్నారు. ఆమె రాజీనామా ఆమోదిస్తే , ఉపాధ్యక్షురాలిగా ఆమె పదవిని కూడా కోల్పోతారు.
వివరాలు
2020 జూలైలో గవర్నర్ నామినేట్‌ చేసిన ఎమ్మెల్సీగా..
జకియా ఖానం స్వస్థలం అన్నమయ్య జిల్లాలోని రాయచోటి. ఆమెను 2020 జూలైలో గవర్నర్ నామినేట్‌ చేసిన ఎమ్మెల్సీగా నియమించారు.
గత రెండేళ్లుగా ఆమె పార్టీపై అసంతృప్తిగా ఉన్నారు. వైఎస్సార్సీపీ చేపట్టిన కార్యక్రమాల్లో ఆమె పాల్గొనడం గానీ, ప్రాతినిధ్యం వహించడం గానీ జరగలేదు.
అంతేకాదు, గతంలో టీడీపీ నేత నారా లోకేశ్ ను ఆమె, కుటుంబ సభ్యులతో కలిసి శాలువా కప్పి సత్కరించారు.
దీనితో అప్పుడే ఆమె తెలుగుదేశం పార్టీలోకి చేరనున్నారన్న ఊహాగానాలు చర్చకు తెరలేచాయి.
వివరాలు
ఆరుగురు ఎమ్మెల్సీలు వైఎస్సార్సీపీకి రాజీనామా
2024 అసెంబ్లీ ఎన్నికల అనంతరం వైఎస్సార్సీపీకి వరుసగా ఎదురు దెబ్బలు తగులుతున్నాయి.
పార్టీకి చెందిన నాయకులు ఒక్కొక్కరిగా రాజీనామా చేస్తూ బయటకు వస్తున్నారు. ఇప్పటికే పలువురు ఎమ్మెల్సీలు, ఎంపీలు పార్టీతో పాటు తమ పదవులను కూడా వదులుకుంటున్నారు.
ఇప్పుడు జకియా ఖానం రాజీనామాతో కలిపి మొత్తం ఆరుగురు ఎమ్మెల్సీలు వైఎస్సార్సీపీకి రాజీనామా చేసిన వారిలో చేరిపోయారు.
ఈ జాబితాలో కర్రి పద్మశ్రీ, పోతుల సునీత, జయమంగళ వెంకటరమణ, బల్లి కల్యాణ్ చక్రవర్తి, మర్రి రాజశేఖర్‌ లాంటి ప్రముఖ నేతలు ఉన్నారు.