Bell Pepper: మీరు తప్పక ప్రయత్నించాల్సిన 5 బెల్ పెప్పర్ వంటకాలు
ఈ వార్తాకథనం ఏంటి
బెల్ పెప్పర్స్‌ (క్యాప్సికమ్) రంగురంగులుగా ఉండటమే కాకుండా, ఎన్నో రకాల వంటకాల్లో ఉపయోగపడతాయి. ఇవి వంటలకు మంచి రుచిని, ఆకర్షణీయమైన రంగును, కరకరలాడే స్వభావాన్ని అందిస్తాయి. అంతేకాదు.. వీటిలో విటమిన్లు, యాంటీఆక్సిడెంట్లు సమృద్ధిగా ఉంటాయి. సలాడ్లు, స్టిర్ ఫ్రైలు, సూప్‌లతో పాటు అనేక వంటకాల్లో వీటిని ఉపయోగించవచ్చు. రుచితో పాటు పోషకాలు అందించే బెల్ పెప్పర్స్‌తో ఇంట్లోనే సులభంగా తయారు చేసుకోగల ఐదు వంటకాల గురించి తెలుసుకుందాం.
వంటకం 1
స్టఫ్డ్ బెల్ పెప్పర్స్‌.. కడుపు నింపే వంటకం
బెల్ పెప్పర్స్‌తో కడుపు నిండే భోజనం తయారు చేసుకోవాలనుకుంటే స్టఫ్డ్ బెల్ పెప్పర్స్‌ మంచి ఎంపిక. ముందుగా క్యాప్సికమ్‌లను తీసుకుని లోపలి గింజలను తొలగించి ఖాళీ చేయాలి.
ఉడికించిన అన్నం, బ్లాక్ బీన్స్, మొక్కజొన్న గింజలు, చిన్నగా తరిగిన టమాటాలు, జీలకర్ర, పప్రికా వంటి మసాలాలను కలిపి మిశ్రమాన్ని సిద్ధం చేసుకోవాలి.
ఈ మిశ్రమాన్ని క్యాప్సికమ్‌లలో నింపి, అవి మెత్తబడే వరకు ఓవెన్‌లో బేక్ చేయాలి.
బీన్స్ ద్వారా ప్రొటీన్లు, కూరగాయల ద్వారా ఫైబర్ అందుతాయి. దీంతో రుచికరమైన, పోషకాలు కలిగిన భోజనం సిద్ధమవుతుంది.
వంటకం 2
రంగురంగుల బెల్ పెప్పర్ స్టిర్ ఫ్రై
బెల్ పెప్పర్స్‌లోని సహజమైన తీపి రుచిని ఆస్వాదించాలంటే స్టిర్ ఫ్రై ప్రయత్నించవచ్చు.
ఎరుపు, పసుపు, ఆకుపచ్చ క్యాప్సికమ్‌లను సన్నని పొడవాటి ముక్కలుగా కోయాలి. ఉల్లిపాయలు, క్యారెట్లను కూడా అదే విధంగా తరిగి పెట్టుకోవాలి.
పాన్‌లో ఆలివ్ ఆయిల్ వేసి వేడయ్యాక వెల్లుల్లి, అల్లం ముక్కలు వేసి వేయించాలి. ఆ తర్వాత తరిగిన కూరగాయలను వేసి కలుపుతూ వేయించాలి.
రుచికి సరిపడా సోయా సాస్ లేదా తమరిని జోడించాలి. తక్కువ సమయంలో తయారయ్యే ఈ వంటకాన్ని వేడి అన్నం లేదా నూడుల్స్‌తో కలిపి తింటే రుచిగా ఉంటుంది.
వంటకం 3
రోస్ట్ చేసిన బెల్ పెప్పర్ సూప్
వేడివేడిగా సూప్ తాగాలనుకునేవారికి రోస్ట్ చేసిన బెల్ పెప్పర్ సూప్ మంచి ఎంపిక.
ముందుగా ఎర్ర క్యాప్సికమ్‌లను కొద్దిగా మాడే వరకు రోస్ట్ చేయాలి.
అనంతరం వాటిని వెజిటబుల్ బ్రాత్‌ (కూరగాయలతో తయారు చేసిన ఉడకబెట్టిన నీరు), ఉల్లిపాయలు, వెల్లుల్లి, తులసి ఆకులతో కలిపి మెత్తగా బ్లెండ్ చేయాలి.
ఈ మిశ్రమాన్ని ఒక పాత్రలోకి తీసుకుని తక్కువ మంటపై సుమారు 15 నిమిషాలు ఉడికించాలి.
సూప్ సిద్ధమైన తర్వాత వేడివేడిగా అందించాలి. పక్కన క్రస్టీ బ్రెడ్ ముక్కలను ఉంచితే మరింత రుచిగా ఉంటుంది.
వంటకం 4
బెల్ పెప్పర్ సలాడ్‌.. తాజాదనంతో కూడిన రుచి
వేసవిలో తాజాగా, తేలికగా ఉండే ఆహారం తీసుకోవాలనుకుంటే బెల్ పెప్పర్ సలాడ్‌ను ఎంచుకోవచ్చు.
పచ్చి క్యాప్సికమ్ ముక్కలను ఉపయోగించి ఈ సలాడ్‌ను సులభంగా తయారు చేసుకోవచ్చు.
ముందుగా ఒక గిన్నెలో సన్నగా తరిగిన దోసకాయలు, చెర్రీ టమాటాలు, ఎర్ర ఉల్లిపాయ వలయాలు, ఆరుగూలా లేదా పాలకూర వంటి ఆకుకూరలను వేయాలి.
వీటికి క్యాప్సికమ్ ముక్కలను జోడించాలి. ఆపై ఆలివ్ ఆయిల్, నిమ్మరసం, తగినంత ఉప్పు, మిరియాల పొడి వేసి మెల్లగా కలపాలి.
రంగురంగులగా కనిపించే ఈ సలాడ్‌ను తాజాగా ఉన్నప్పుడే ఆస్వాదించవచ్చు.
వంటకం 5
గ్రిల్ చేసిన బెల్ పెప్పర్ స్కెవర్స్
బార్బెక్యూ వంటకాల్లో రంగు, రుచి రెండింటినీ జోడించాలంటే గ్రిల్ చేసిన బెల్ పెప్పర్ స్కెవర్స్ మంచి ఎంపిక.
ఎరుపు, పసుపు, ఆకుపచ్చ క్యాప్సికమ్‌లను ముక్కలుగా కోయాలి.
వాటితో పాటు జుకినీ ముక్కలు లేదా పుట్టగొడుగులను తీసుకుని స్కెవర్స్ (పుల్లలు)కు మార్చి మార్చి గుచ్చాలి.
వీటిపై కొద్దిగా ఆలివ్ ఆయిల్ రాసి, హెర్బ్స్ డి ప్రొవెన్స్ అనే సుగంధ మూలికల మిశ్రమాన్ని చల్లాలి.
అనంతరం మధ్యస్థ మంటపై కూరగాయలు కొద్దిగా మాడి, మెత్తబడే వరకు గ్రిల్ చేయాలి. చివరగా మీకు నచ్చిన డిప్పింగ్ సాస్‌తో కలిపి అందిస్తే రుచిగా ఉంటుంది.