Motivational: ఎప్పటికీ అడుగు పెట్టకూడని 5 ప్రదేశాలుఇవే.. చాణక్యుడు చెప్పిన జీవిత పాఠాలు
ఈ వార్తాకథనం ఏంటి
భారత చరిత్రలో అపూర్వమైన ప్రాభవాన్ని చూపిన మహానుభావుల్లో ఆచార్య చాణక్యుడు ఒకరు. కౌటిల్యుడు అనే పేరుతో కూడా ప్రసిద్ధి పొందిన ఆయన కేవలం రాజనీతి నిపుణుడే కాక, గౌరవనీయమైన తత్వవేత్త, ఆర్థిక శాస్త్రజ్ఞుడు, యుద్ధ వ్యూహకర్త. మౌర్య సామ్రాజ్య నిర్మాణంలో కీలకమైన పాత్ర పోషించిన ఈ మహాగురువు రాసిన 'అర్థశాస్త్రం' గ్రంథం నేటికీ రాజనీతి, పరిపాలన, ఆర్థిక వ్యవస్థలపై శాస్త్రీయ మార్గదర్శకంగా గుర్తింపు పొందుతోంది. జీవితంలో విజయాన్ని సాధించాలన్నా, గౌరవప్రదమైన జీవనం గడపాలన్నా చాణక్య సూత్రాలు నేటికీ ఉపయోగకరమని భావించబడుతున్నాయి.
వివరాలు
చంద్రగుప్తుడికి యుద్ధ కళలు, రాజనీతి, పరిపాలనా నైపుణ్యాలను బోధించిన చాణక్య
చాణక్యుడి జీవితంలో అత్యంత మలుపుతిప్పిన ఘట్టం.. నంద వంశ పతనం, మౌర్య సామ్రాజ్య స్థాపన. అప్పటి పాలకుడు ధననందుడు ప్రజలను అణచివేస్తూ, అహంకారంతో వ్యవహరించేవాడు. ఒక సందర్భంలో ధననందుడు చాణక్యుడిని అవమానించడంతో, ప్రతీకారంగా నంద వంశాన్ని పూర్తిగా నిర్మూలిస్తానని చాణక్యుడు ప్రతిజ్ఞ చేశాడు. ఆ లక్ష్యానికి చేరుకోవడానికి ఆయన చంద్రగుప్త అనే యువకున్ని గుర్తించాడు. నాయకత్వం, ధైర్యం, రాజకీయ చాతుర్యం ఉన్న ఈ యువకున్ని చాణక్యుడు యోధుడిగా, పాలకుడిగా తీర్చిదిద్దాడు. తన అపారమైన వ్యూహజ్ఞానంతో ఆయన చంద్రగుప్తుడికి యుద్ధ కళలు, రాజనీతి, పరిపాలనా నైపుణ్యాలను బోధించాడు. చివరకు చంద్రగుప్తుడు బలమైన సైన్యాన్ని ఏర్పాటు చేసి నంద వంశాన్ని ఓడించి మౌర్య సామ్రాజ్యాన్ని స్థాపించాడు. చాణక్యుడు అతని ప్రధానమంత్రి, సలహాదారుగా కొనసాగాడు.
వివరాలు
ఎప్పటికీ అడుగు పెట్టకూడని 5 ప్రదేశాలుఇవే..
చాణక్యుడు తన చాణక్య నీతిలో, జీవితంలో శాంతి, గౌరవం, విజయాన్ని కాపాడుకోవాలంటే కొన్ని ప్రదేశాలకు ఎప్పుడూ వెళ్లకూడదని హెచ్చరించారు. ఆయన ప్రకారం దూరంగా ఉండాల్సిన ఆ ఐదు ప్రదేశాలు ఇవే.. 1. గౌరవం లేని ప్రదేశం ఎక్కడైతే మీకు మర్యాద, గౌరవం లేకపోతుందో, అలాంటి ప్రదేశంలో ఉండటం వల్ల మీ విలువ తగ్గిపోతుంది. మీ ఆత్మవిశ్వాసం దెబ్బతింటుంది. ధనం కంటే ఆత్మగౌరవాన్ని ప్రాముఖ్యంగా భావించేవారు అలాంటి వాతావరణాన్ని వెంటనే వదిలివేయాలి.
వివరాలు
2. విద్యాబుద్ధులకు విలువ లేని ప్రదేశం
చదువుకు,జ్ఞానానికి ప్రాధాన్యం లేని చోట జీవించడం అంటే భవిష్యత్తు లేని అంధకారంలో నడిచినట్టే. అలాంటి ప్రదేశంలో నివసించడం మీ ఎదుగుదలనే కాదు, మీ పిల్లల భవిష్యత్తును కూడా అడ్డుకుంటుంది. జ్ఞానం సంపాదించే అవకాశాలు లేని చోట జీవితం వ్యర్థమని ఆయన చెప్పారు. 3.ఉపాధి అవకాశాలు లేని ప్రదేశం జీవనాధారానికి ఉపాధి అత్యవసరం. కష్టపడి పనిచేసే అవకాశాలు లేని చోట నిరుద్యోగం, పేదరికం తప్పవు. ఇది కుటుంబాన్ని ఆర్థిక సంక్షోభంలోకి నెడుతుంది. కాబట్టి ఉపాధి లేని ప్రాంతాన్ని వీలైనంత త్వరగా విడిచిపోవడం శ్రేయస్కరం.
వివరాలు
4.బంధువులు, స్నేహితులు లేని ప్రదేశం
మనం సహజంగానే సంఘజీవులం. కష్టసుఖాల్లో తోడ్పడే మనుషులు లేకుండా కొత్త ప్రదేశంలో నివసించడం ప్రమాదకరం. సమస్యలు వచ్చినప్పుడు ఒంటరిగా ఎదుర్కోవాల్సి వస్తుంది. అందుకే మనవాళ్లు, మిత్రులు లేని చోట నివాసం ఉండకూడదని ఆయన సూచించారు. 5. త్యాగం, దయ, నైతిక విలువలు లేని ప్రదేశం ఎక్కడైతే ప్రజల్లో త్యాగభావం, కరుణ, సహాయసిద్ధత, నైతికత ఉండవో, అలాంటి వాతావరణంలో పెరిగితే చెడు ప్రభావం తప్పదు. మంచిని నేర్చుకోలేని చోట జీవించడం వల్ల ఎటువంటి ప్రయోజనం ఉండదని చాణక్యుడు పేర్కొన్నారు.