Neurologist: మెదడును మెల్లగా దెబ్బతీసే 7 అలవాట్లు.. హెచ్చరిస్తున్న న్యూరాలజిస్ట్
ఈ వార్తాకథనం ఏంటి
మన శరీరంలో అత్యంత క్లిష్టమైన, ముఖ్యమైన అవయవం మెదడు. ఆలోచనలు చేయడం, విషయాలను గుర్తుంచుకోవడం, భావోద్వేగాలను వ్యక్తపరచడం, కదలికలను నియంత్రించడం వంటి ప్రతి చర్య వెనుక మెదడే ప్రధాన శక్తి. అందుకే మెదడు ఆరోగ్యం కాపాడుకోవడం అంటే మన జీవన ప్రమాణాన్ని, ఆయుష్షును మెరుగుపరచుకోవడమే. అయితే ప్రస్తుత ఆధునిక జీవనశైలిలో మనం అలవాటు చేసుకున్న కొన్ని చర్యలు మెదడుకు మెల్లగా హానికరమవుతున్నాయని న్యూరాలజిస్ట్ లు వెల్లడిస్తున్నారు.
వివరాలు
మెదడుకు హానికరమైన 7 అలవాట్లు
1. ఆరు గంటల కంటే తక్కువ నిద్రపోవడం మెదడు సమర్థంగా పనిచేయాలంటే రోజుకు సుమారు 7-8 గంటల నిద్ర అవసరం. రోజూ 6 గంటల కంటే తక్కువ నిద్రపోతే జ్ఞాపకశక్తి మందగిస్తుంది. అలాగే ప్రతిస్పందన వేగం తగ్గిపోవడంతో పాటు భవిష్యత్తులో పక్షవాతం (స్ట్రోక్) వచ్చే ప్రమాదం పెరుగుతుంది. 2. ఎక్కువసేపు కదలకుండా కూర్చోవడం వర్క్ ఫ్రం హోమ్ లేదా డెస్క్ ఉద్యోగాల కారణంగా గంటల తరబడి కూర్చోవడం సాధారణమైపోయింది. రోజుకు 8-10 గంటలు శారీరక కదలికలేకుండా ఉండటం గుండె సంబంధిత సమస్యలతో పాటు మతిమరుపు (డిమెన్షియా) ప్రమాదాన్ని కూడా పెంచుతుంది.
వివరాలు
3. నిద్రకు ముందు ఫోన్ వాడకం
రాత్రిపూట పడుకునే ముందు ఎక్కువసేపు మొబైల్లో సోషల్ మీడియా చూడడం వల్ల 'మెలటోనిన్' అనే నిద్ర హార్మోన్ ఉత్పత్తి తగ్గుతుంది. దీని ఫలితంగా గాఢ నిద్ర లోపిస్తుంది. దీర్ఘకాలంలో ఇది మెదడు పనితీరును దెబ్బతీస్తుంది. 4. వ్యాయామాన్ని విస్మరించడం శారీరక వ్యాయామం చేయకపోతే మెదడులో 'బిడిఎన్ఎఫ్' (Brain Derived Neurotrophic Factor) అనే ముఖ్యమైన గ్రోత్ ఫ్యాక్టర్ స్థాయి తగ్గుతుంది. ఇది మెదడు కణాల పెరుగుదల, నేర్చుకునే సామర్థ్యం, జ్ఞాపకశక్తి మెరుగుదలకు అవసరమైన ప్రోటీన్.
వివరాలు
5. బీపీ, షుగర్ నియంత్రణలో లేకపోవడం
రక్తపోటు మరియు రక్తంలో చక్కెర స్థాయిలు అదుపులో లేకపోతే మెదడులోని చిన్న రక్తనాళాలు దెబ్బతింటాయి. దీని వల్ల భవిష్యత్తులో బ్రెయిన్ స్ట్రోక్ ముప్పు ఎక్కువవుతుంది. 6. దీర్ఘకాలిక ఒత్తిడి ఎప్పటికప్పుడు ఒత్తిడికి లోనవడం మెదడులోని 'హిప్పోకాంపస్' భాగంపై ప్రతికూల ప్రభావం చూపుతుంది. దీని పరిమాణం తగ్గిపోవడం వల్ల జ్ఞాపకశక్తి బలహీనమవుతుంది.
వివరాలు
7. గురకను పట్టించుకోకపోవడం
నిద్రలో గురక రావడం సాధారణం అనిపించినా, అది 'స్లీప్ అప్నియా'కి సంకేతం కావచ్చు. ఈ పరిస్థితిలో మెదడుకు తగిన ఆక్సిజన్ అందదు. ఫలితంగా ఏకాగ్రత లోపించడం, బ్రెయిన్ ఫాగ్, పక్షవాతం వంటి సమస్యలు తలెత్తే అవకాశం ఉంది. "కేవలం వయసు పెరగడం వల్లనే కాదు, మన జీవనశైలి కారణంగానే మెదడు త్వరగా వృద్ధాప్యంలోకి జారుతుంది. కాబట్టి ప్రతిరోజూ శారీరకంగా చురుకుగా ఉండాలి, సమృద్ధిగా నిద్రపోవాలి, ఆరోగ్యాన్ని కాపాడుకోవాలి" అని డాక్టర్లు సూచిస్తున్నారు.