#InternationalYogaDay: అసలు యోగ ఎందుకు చేయాలి? తెలుసుకోవాల్సిన ముఖ్యమైన విషయాలివే..
ఈ వార్తాకథనం ఏంటి
యోగం అనేది కేవలం శారీరక వ్యాయామం మాత్రమే కాదు. ఇది శరీరం, మనసు, ఆత్మ మధ్య సమతుల్యతను నెలకొల్పే సంపూర్ణ జీవన విధానం. ఆరోగ్యవంతమైన, ప్రశాంతమైన, సాత్వికమైన జీవితాన్ని గడపాలనుకునే ప్రతి ఒక్కరికీ యోగం ఎంతో అవసరం. రోజుకు కనీసం 30 నిమిషాలు యోగాభ్యాసానికి కేటాయించడం ద్వారా అనేక శారీరక, మానసిక సమస్యలను నియంత్రించుకోవచ్చు. అయితే, ఆధునిక జీవనశైలిలో యోగం అసలు విలువను చాలా మంది విస్మరిస్తున్నారు.
వివరాలు
ప్రపంచవ్యాప్తంగా గుర్తింపు..
యోగం అనేది జీవన తత్వమనే భావనకు ప్రపంచవ్యాప్తంగా గుర్తింపు లభించింది. భారత ప్రధానమంత్రి నరేంద్ర మోదీ చేసిన కృషి ఫలితంగా ఐక్యరాజ్యసమితి జనరల్ అసెంబ్లీ ప్రతి సంవత్సరం జూన్ 21ను అంతర్జాతీయ యోగా దినోత్సవంగా ప్రకటించింది. ఇది యోగం విశ్వవ్యాప్త ప్రాముఖ్యతకు నిదర్శనం. "యోగ ఫర్ వెల్-బీయింగ్" అనే సందేశంతో ప్రారంభమైన ఈ ఉద్యమం ప్రపంచవ్యాప్తంగా కోట్లాది మందిని ఆరోగ్యవంతమైన జీవనశైలి వైపు నడిపిస్తోంది.
వివరాలు
అష్టాంగ యోగం - యోగంలోని ఎనిమిది అంగాలు..
యోగశాస్త్రంలో ఎనిమిది ప్రధాన అంగాలు ఉన్నాయి. ఇవి వ్యక్తి శారీరక, మానసిక, ఆధ్యాత్మిక వికాసానికి మార్గనిర్దేశం చేస్తాయి. 1.యమ: సమాజంలో నైతిక విలువలను పాటించే నియమాలు. ఇందులో అహింస, సత్యం, అస్తేయం, బ్రహ్మచర్యం, అపరిగ్రహం ఉంటాయి. 2. నియమ: వ్యక్తిగత క్రమశిక్షణకు సంబంధించిన సూత్రాలు. శౌచం, సంతోషం, తపస్సు, స్వాధ్యాయం, ఈశ్వరప్రణిధానం ఇందులో భాగాలు. 3. ఆసనం: శరీరాన్ని స్థిరంగా, సమతుల్యంగా ఉంచే భంగిమలు. 4. ప్రాణాయామం: శ్వాసను నియంత్రించే సాధన ద్వారా శరీరంలో ప్రాణశక్తిని సమతుల్యం చేయడం.
వివరాలు
మనస్సుపై ఏకాగ్రత..
5. ప్రత్యాహారం: ఇంద్రియాలను బాహ్య విషయాల నుంచి మరల్చి అంతర్ముఖంగా మలచడం. 6. ధారణ: మనస్సును ఒకే విషయంపై కేంద్రీకరించడం. 7. ధ్యానం: మనస్సును ప్రశాంతంగా, స్థిరంగా ఉంచే లోతైన సాధన. 8. సమాధి: ఆత్మసాక్షాత్కారం పొంది పరమాత్మతో ఐక్యమయ్యే అత్యున్నత స్థితి.
వివరాలు
యోగం వల్ల కలిగే ప్రయోజనాలు ఇవే..
శరీరానికి బలం, వశ్యతను పెంచుతుంది. కండరాలను దృఢంగా మారుస్తుంది. రోగనిరోధక శక్తిని మెరుగుపరుస్తుంది. రక్త ప్రసరణను సక్రమంగా నిర్వహించడంలో సహాయపడుతుంది. గుండె ఆరోగ్యాన్ని కాపాడుతుంది. నాడీ వ్యవస్థ పనితీరును మెరుగుపరుస్తుంది. ఒత్తిడి, ఆందోళనను తగ్గిస్తుంది. ఏకాగ్రత, జ్ఞాపకశక్తిని పెంపొందిస్తుంది. మానసిక ప్రశాంతతను అందిస్తుంది. ఆత్మవిశ్వాసం, ఆత్మపరిశీలనను పెంచుతుంది. ధ్యానం ద్వారా లోతైన తత్వచింతన కలుగుతుంది. భౌతిక విషయాలపై అధిక మమకారం తగ్గుతుంది. "నేను శరీరం కాదు... నేను ఆత్మను" అనే ఆత్మజ్ఞానం కలుగుతుంది. బ్రహ్మజ్ఞానాన్ని పొందే దిశగా వ్యక్తిని నడిపిస్తుంది.
వివరాలు
యోగం ఒక జీవన విధానం..
యోగం అనేది కేవలం కొన్ని ఆసనాలు చేసే ప్రక్రియ కాదు. అది ఒక జీవనశైలి, ఒక తత్వం, వ్యక్తిత్వాన్ని మార్చే సాధన. మనిషి తన అసలైన స్వరూపాన్ని తెలుసుకునేందుకు యోగం ఉత్తమ మార్గం. ఈ అంతర్జాతీయ యోగా దినోత్సవం సందర్భంగా యోగాన్ని ప్రతి ఒక్కరూ తమ దైనందిన జీవితంలో భాగం చేసుకుని, ఆరోగ్యవంతమైన, ప్రశాంతమైన, సార్థకమైన జీవితానికి నాంది పలుకుదాం.