ప్రేరణ: ఆకాశం అందదని ఆలోచించడం మానేస్తే అంతరిక్షమనే విజయం చేరుకోలేం
ఒక పని మొదలు పెట్టే ముందు కొన్ని వందల ఆలోచనలు వస్తాయి. ఆ పని పూర్తవుతుందా లేదా? నా వల్ల అవుతుందా కాదా? నేను చేయగలనా లేదా అని అనిపిస్తుంటుంది. అలా అనిపించడంలో తప్పు లేదు కానీ, ఆ ఆలోచనను పట్టుకుని పనులను మొదలు పెట్టకపోవడమే తప్పు. పని మొదలు పెట్టక ముందు ఆ పనిచేయడం మనవల్ల కాదేమో అనిపిస్తుంది. ఆ టైమ్ లో మీరు పని ఆపేసారనుకోండి. ఖచ్చితంగా మీ వల్ల ఆ పని పూర్తి కాదు, మీకు రావాల్సిన విజయం రాదు. ఈ ప్రపంచంలో అసాధ్యమైనది ఏదీ లేదు. ప్రతీదీ సాధ్యమే. ఒక పని అసాధ్యమైనదని మీకనిపించిందంటే, దాన్ని సాధ్యం చేసే దారుల గురించి మీరు ఆలోచించట్లేదన్నమాట.
ఆలోచించడం మానేస్తే అంతరిక్షం చేరుకోలేం
ఆకాశం అందదని ఆలోచించడం మానేస్తే, ఇప్పటికి కూడా అంతరిక్షాన్ని గుర్తించలేకపోయే వాళ్ళం. చంద్రుడి మీద అడుగు పెట్టకపోయే వాళ్ళం. అంగారకుడి మీద మనుషులున్నారా అని ప్రయోగాలు చేయకపోయేవాళ్ళం. ఒక్క సైన్స్ విషయంలోనే కాదు, ఏ విషయంలోనైనా ఇది వర్తిస్తుంది. తెలుగు సినిమాకు ఆస్కార్ వస్తుందా? ఛాన్సే లేదనుకున్న చాలామందికి నాటు నాటు పాట ఒక సమాధానంలా నిలిచింది. అసాధ్యం అనుకున్న పనులు సాధ్యం చేయాలంటే తెలివి ఉంటే సరిపోదు, తెలివిని తెలివిగా ఉపయోగించడం తెలిసుండాలి. అలాంటప్పుడే ఆస్కార్ అయినా, అంతరిక్షం అయినా ఖచ్చితంగా అందుతుంది. అలా మీరు కొత్త ఎత్తులు ఎక్కినపుడు ప్రపంచం మొత్తం మిమ్మల్ని కొత్తగా చూడటం మొదలుపెడుతుంది. మీతో రావడం మొదలు పెడుతుంది.
