ప్రేరణ: అంతా అయిపోయిందనుకోకండి, చీకటి పడ్డ తర్వాతే చంద్రుడు వస్తాడు
జీవితంలో కష్టాలు కామన్. వస్తుంటాయి పోతుంటాయి. కొన్ని కొన్నిసార్లు కష్టాలనేవి అసలు పోవేమో అనిపిస్తుంటుంది. చేస్తున్న వ్యాపారం నష్టాల్లోకి వెళ్ళిందని బాధపడుతుంటే, అవసరం కోసం మీ దగ్గర అప్పుగా తీసుకున్నవాళ్ళు అప్పు ఎగ్గొట్టి మిమ్మల్ని ఇంకాస్త కష్టాల్లోకి నెడతారు. చేతిలో రూపాయి కూడా లేదు. వేరే వ్యాపారం మొదలెట్టాలన్నా కుదరని పని. జాబ్ చేద్దామంటే ఈ ఏజ్ లో జాబ్ ఇచ్చే వాళ్ళు కనిపించట్లేదు. ఒకవేళ ఇచ్చినా, వ్యాపారంలో వచ్చిన నష్టాల్ని భర్తీ చేయడానికే అవి సరిపోవడం లేదు. మీ దగ్గర డబ్బు లేకపోయేసరికి మీ భార్యకు మీరు నచ్చడం లేదు. సంవత్సరం వరకూ చూసి తన అయిష్టతను మీ మీద కోపం రూపంలో చూపిస్తోంది.
జీవితంలో చీకటి ఏర్పడినా కళ్ళు తెరిచే ఉంచాలి.
కొన్నాళ్ళకు మిమ్మల్ని వదిలిపెట్టి మీ భార్య వెళ్ళిపోయింది. పిల్లలు మీకు దూరమయ్యారు. ఒంటరిగా మిగిలిపోయారు. మీ పరిస్థితిని చూసి తోటివాళ్ళు మీకు సాయం చేయడానిక్కూడా ముందుకు రావడం లేదు. కొందరైతే మీకు ఇలాంటి పరిస్థితే కరెక్ట్ అనుకుంటూ ఆనందపడుతున్నారు. మీరు రోడ్డు మీద నడుస్తుంటే మీ దరిద్రాన్ని చూసి జాలిపడే వారికంటే నవ్వేవాళ్లే ఎక్కువగా ఉన్నారు. ఒంటరిగా బ్రతుకుతున్నారు. తల్లీ, తండ్రీ, భార్య, స్నేహం అన్నీ మీకు దూరమైపోయాయి. ఇలాంటి టైమ్ లో జీవితం ఎందుకురా అని అనిపిస్తుండవచ్చు. కానీ అలా అనుకోకూడదు. జీవితంలో చీకటి వచ్చింది కదా అనీ చీకట్లో కలిసిపోవాలని ఆలోచించకూడదు. చీకట్లోనూ కళ్ళు తెరిచే ఉంచాలి. అప్పుడే మీకు చంద్రుడి వెలుగు కనిపిస్తుంది.
కష్టాల సమయం పూర్తవగానే వచ్చేవి సుఖాలే
జీవితంలో అన్నీ కోల్పోయిన మళ్ళీ నిలబడడానికి ఒక అవకాశం తప్పకుండా ఉంటుంది. మీరు చేయాల్సిందల్లా ఆ అవకాశాన్ని తొందరగా అన్వేషించడమే. అమావాస్య వచ్చిందని పౌర్ణమి రాకుండా పోతుందా? జీవితం కూడా అంతే. కష్టాలు మిమ్మల్ని పూర్తిగా కమ్మేసినా భయపడకుండా నడిచిన వాళ్లకే పౌర్ణమి తాలూకు వెలుగు కనిపిస్తుంది. అమావాస్య నుండి పౌర్ణమికి 15రోజుల సమయం పడుతుంది. కష్టాలు కూడా అంతే. తొలగిపోవడానికి టైమ్ పడుతుంది. కానీ ఖచ్చితంగా తొలగిపోతాయి. మీ జీవితంలో చీకటి ఏర్పడిందని భయపడితే జీవితం చీకటిలో కలిసిపోతుంది. చీకట్లోనూ ముందుకు నడిస్తే వెలుగు దగ్గరవుతుంది.
ఈ టైమ్ లైన్ ని షేర్ చేయండి